Inkanda House yashyize hanze imyambaro mishya (Amafoto)

Yanditswe na Uwiduhaye Theos
Kuya 5 Ugushyingo 2020 saa 03:11
Yasuwe :
0 0

Inzu ihanga imideli ya Inkanda House yatangijwe na Patrick Muhire Nshuti, yashyize hanze imyambaro mishya y’abahungu n’abakobwa yiswe ‘Ikilingo Collection’.

Muhire yabwiye IGIHE ko iyi myambaro ari imyambaro yatekereje mu bihe bya Coronavirus, ashaka kwerekana ko nyuma y’ubuzima bubi hashobora kubaho ubundi bwiza.

Ati “Nashatse kwerekana ko na nyuma y’urupfu hari ubuzima. Nyuma y’iminsi mibi twaciyemo ya Covid-19 ubuzima buracyakomeza. Ni aho nakuye igitekerezo cyo guhanga iyi myambaro.”

Iyi myambaro ni iya 23 mu yo yagiye ashyira hanze, akayereka abanyarwanda baba mu Rwanda ndetse n’abo hanze.

Uyu musore avuga ko nk’umuhanzi w’imideli, uri mu ba mbere bafashe iya mbere mu gukangurira abanyarwanda cyane cyane urubyiruko ko imideli ari ikintu cyateza umuntu ku giti cye imbere ndetse n’igihugu muri rusange yishimira urwego uru ruganga rugezeho.

Ati “Nishimira urwego imideli igezeho uyu munsi wa none mu Rwanda, tugitangira nta watwumvaga ndetse hari n’abadusekaga ariko ubu tumaze kuba benshi. Ibihangano byacu birambarwa hirya no hino mu Rwanda ndetse no hanze yarwo. Ni ikintu gishimishije.”

Inkanda House ni imwe mu nzu zihanga imideli zimaze igihe mu Rwanda kuko yatangiye mu 2010. Ikora imyambaro itandukanye irimo imico ivanze y’Abanyamahanga n’uwo mu Rwanda.

Izina ‘Inkanda’ risobanuye umwambaro w’abagore bo mu Rwanda rwo hambere nk’uko abakobwa n’abagabo bambaraga ishabure bagatega amasunzu, abagore bambaraga Inkanda bagasokoza uruhanika.

Inkanda yabaga ikoze mu ruhu cyangwa mu mpuzu bakayambara bayicyenyereye mu mabere. Uyu musore yahisemo iri zina mu gukomeza gusigasira umuco.

Muhire yavuze ko intego yari afite atangira ari ukumvisha abanyarwanda ko uruganda rw’imideli atari umwuga w’injiji.

Ati “Dutangira nari mfite icyifuzo cyo kurema mu mitwe y’abanyarwanda ko imideli cyangwa ubudozi atari umwuga w’injiji, ahubwo ko ushobora kurangiza kaminuza ugakora ubudozi kandi bugateza imbere igihugu nawe ubwawe.”

Yakomeje agira ati “Nashakaga gutinyura abana b’abanyarwanda ko kwihangira umurimo atari ugufungura Cyber Café gusa cyangwa Restaurant kandi nabigezeho. Nashakaga no kumvisha abanyarwanda muri rusange ko bashobora kwambara iby’iwabo bakaberwa batiriwe birukira muri caguwa n’imyenda iva i Burayi kandi bigenda biza rwose.”

Imyambaro ya Inkanda House yamamaye harimo “Inka ya Data Collection” yagiye hanze mu 2018, yari imyamabro ihuza gakondo nyarwanda n’ibigezweho.

Hari kandi ‘The black days of Marie Antoinette’ yerekanye ku bufatanye na Ambassade y’Ababiligi mu Rwanda. Iyi myambaro avuga ko yayihimbye ashaka kwibuka abantu bagize uruhare mu ruganda rw’imideli batabarutse.

Ati “Nashakaga kwibuka no guha agaciro abantu batuvuyemo baba Abanyarwanda cyangwa Abanyamahanga bagize uruhare mu mateka ya y’uruganda rw’imideli. Marie Antoinette nayitiriye yari Umwamikazi mu Bufaransa.”

Imyambaro Inkanda yatangiriyeho mu 2010 yayise “Bagilinkanda”, bishatse kuvuga ngo “Arahirwa ufite icyo akinga ku mubiri, ni umugisha kubona icyo wambara”.

Patrick Muhire Nshuti yize ibijyanye no gucunga imari. Iyi nzu ye ikora imyambaro y’abagabo n’abagore. Ni umwe mu batangije ‘Kigali Fashion Week’ yamenyekaniye abamurika imideli n’abayihanga benshi bo mu Rwanda.

Kanda hano urebe imyambaro ya Inkanda House yitwa ‘Inka ya Data Collection’ yagiye hanze mu 2018 :

Harimo imipira yo kwifubika
Ikilingo Collection ni imyambaro ya 23 ishyizwe hanze na Inkanda House
Imyambaro mishya ya Inkanda House irimo amashati meza y'abasore umuntu yakwifuza kurimbana
Inkanda House ikora imyenda y'abagabo n'abagore
Inkanda House imaze imyaka ikabakaba icumi itangiye ibikorwa byayo
Inkanda House ni imwe mu nzu zihanga imideli zimaze igihe mu Rwanda kuko yatangiye mu 2010. Ikora imyambaro itandukanye irimo imico ivanze y’Abanyamahanga n’uwo mu Rwanda
Inkanda House yatangiye ifite gahunda yo gukundisha abantu ibikorerwa mu Rwanda kandi iri kugenda ibigeraho
Inkanda ikora amakanzu anogeye ijisho abera abashaka kurimba
Iyi myambaro mishya irimo amakanzu umuntu yo gusohokana mu birori
Iyi myambaro mishya ya Inkanda House yiswe Ikilingo Collection yahanzwe kubera Coronavirus
Patrick Muhire watangije Inkanda House yashyize hanze imyambaro mishya
Sisi Ngamije mu mwambaro mushya Inkanda House iheruka gushyira hanze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .