00:00:00 IGIHE NETWORK KN KINYARWANDA EN ENGLISH FR FRANCAIS

Chimano wa Sauti Sol yagaragaye mu mashusho y’indirimbo yambaye umwambaro ya Tanga Designs

Yanditswe na Uwiduhaye Theos
Kuya 23 Mata 2021 saa 10:03
Yasuwe :
0 0

Umuririmbyi Willis Austin Chimano uri muri bane bagize itsinda rya Sauti Sol yagaragaye mu mwambaro wahanzwe na Niyitanga Olivier washinze inzu ihanga imideli ya Tanga Designs.

Uyu mwambaro uri mu yo aherutse gushyira hanze yise ‘Ikamba Collection’ ariko wo ukaba uri mu y’abahungu.

Chimano yagaragaye yambaye uyu mwambaro mu ndirimbo nshya iheruka kujya hanze yasubiranyemo n’umuhanzikazi wo muri Zimbabwe witwa Gemma Griffiths yitwa ‘Easy’.

Niyitanga Olivier yabwiye IGIHE ko kugira ngo umwambaro we wifashishwe muri iyi ndirimbo ariko uyu muhanzi yawubonye ku mbuga nkoranyambaga akawukunda akamusaba ko yawumukorera.

Ati “Yakunze ibihangano byanjye ku mbuga nkoranyambaga, noneho mvugana n’uwabikora kugira ngo mbone ibipimo bye bya nyabyo. Ndawushushanya nyuma nza kuwukora.”

Niyitanga aherutse kubwira IGIHE ko ‘Ikamba Collection’ yagize igitekerezo cyayo mu bihe bya Miss Rwanda 2020. Ngo yayise gutyo kuko buri wese wahatanaga yari afite amahirwe yo gutsinda akegukana ikamba.

Iyi myambaro mu buryo ikozwemo, ijyanishwa n’ibyitwa ‘Ibyanganga’ byambarwa mu mutwe, biba biriho amasaro. Biba bisa n’umwitero wo ku ikanzu iba imeze nk’umushanana. Igaragaza umuco w’u Rwanda.

Mu ikamba Collection harimo amakanzu y’abakobwa yiswe ‘Umutanana’. Kuyita gutya byaturutse n’ubundi ku izina rya Tanga yahuje n’umushanana.

Umutanana ni ikanzu igizwe n’imitako igiye itandukanye ku buryo umuntu ashobora kukubona akagira ngo wambaye umushanana ariko yakwitegereza agasanga ari ikanzu. Ifite nayo ibyanganga byayo.

Muri iyi myambaro harimo imeze nk’imikenyero ariko ifite amababa y’ibinyugunyugu, ndetse n’andi mababa. Avuga ko impamvu yahisemo kurimbisha iyi myambaro amababa yiganjemo ay’ibinyugunyugu ari uko utu dusimba tugira umwihariko wo kutajya dupfa ahubwo tugenda twihinduramo ibindi binyabuzima tugakomeza kuba ku Isi.

Niyitanga amaze kwambika ibyamamare bitandukanye mu Rwanda no hanze yarwo. Ubwo Mr Eazi yakoreraga igitaramo mu Rwanda mu 2017 yari yambaye imyambaro ye. Ni nawe ukunze kwambika ba nyampinga mu bihe bitandukanye.
Yari aherutse gushyira hanze imyambaro yise ‘Out Of This World TangaSS21’.

Reba indirimbo Chimano aba yambayemo umwambaro wa Tanga Designs

Chimano wa Sauti Sol yishimiye kwambara umwambaro wa Tanga Designs
Chimano yagaragaye yambaye umwambaro wahanzwe na Tanga Designs mu ndirimbo aherutse gukora
Uyu mwambaro uri mu yo Tanga Designs iheruka gusohora yitwa Ikamba Collection
Niyitanga Olivier watangije Tanga Designs ni umwe mu bahanzi b'imideli b'abahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .