Abanyarwanda bacanye umucyo muri Tokyo Africa Collections (Amafoto)

Yanditswe na Uwiduhaye Theos
Kuya 2 Nzeri 2019 saa 09:51
Yasuwe :
0 0

Mu ijoro ryo ku Cyumweru tariki 1 Nzeri 2019, Abanyarwanda bahuriye n’abandi bakora ibijyanye n’imideli mu gikorwa cya Tokyo Africa Collections cyabereye mu Buyapani.

Ni igikorwa cyabaye ku nshuro ya mbere cyitabiriwe n’Abanyarwanda nyuma y’ubufatanye n’abategura Kigali International Fashion Week.

Mbere y’igikorwa aba Banyarwanda bitabiriye Tokyo Fashion Week basuye ibigo bikomeye nka AOKI iri mu bigo bikora amakositimu akomeye mu Buyapani, kompanyi itegura icyayi cy’u Rwanda n’ibindi.

Aba Banyarwanda bageze mu Buyapani ku wa 27 Kanama 2019 bazagaruka i Kigali ku wa 5 Nzeri 2019.

Abahanga imideli bo mu Rwanda bitabiriye Tokyo Africa Collections barimo Murorunkwere Sandrine ufite inzu ihanga imideli ya Sahorn Fashion House na Karen Uwera ufite inzu y’imideli ya KARSSH Collection.

Mu berekana imideli bitabiriye baturutse mu Rwanda barimo Bella Christa Kanyange na Kaneza Lynka Amanda.

Kuva mu 2017, ibirori ngarukamwaka bya Kigali Fashion Week byagejejwe ku yindi ntera n’ababitegura bitangira kubera i Burayi nyuma y’imyaka irindwi bibera mu Rwanda gusa.

Icyo gihe ku ikubitiro byatangiriye i Berlin mu Budage, bikomereza i Amsterdam mu Buholandi, hanyuma bisorezwa i Bruxelles mu Bubiligi.
Ku wa Gatandatu tariki 6 Nyakanga 2019 habayeho igikorwa cya Kigali Fashion Week ku nshuro yacyo ya cumi kuva gitangijwe mu Rwanda, cyabereye muri Kigali Serena Hotel.

Cyahurije hamwe abamurika imideli batandukanye bo mu Rwanda no hanze yarwo ndetse n’abayihanga, biyerekanye mu buryo bwanyuze abacyitabiriye.

Herekanwe imyambaro itandukanye irimo iy’inzu zihanga imideli nka Ucoco na The 5 Mith yo mu Burundi, By The Way Clothes yo mu Bubiligi na Gissa Fashion Design yo muri Suède.

Abahanga imideli bo mu Rwanda biyerekanye barimo Aqua, Ihogoza Design, Dk Textiles, Iby’iwacu Summer Collection, Mundi Design na Karen Karsh wa Karsh Collections.

Sayaka Akimoto ushinzwe kumenyekanisha Tokyo Africa Collection 2019 na Leo Sugo utegura iki gikorwa bari mu bacyitabiriye.

Kigali Fashion Week yatangiye mu 2012, itangirana n’ibindi birori birimo icya Kampala, Bujumbura na Nairobi Fashion week.

Inategura ibitaramo muri Ghana n’ibindi bihugu bikomeye ndetse yanatangiye ibirori birimo Kigali International Fashion Week ibera mu Buholandi, u Bubiligi, u Budage n’u Bwongereza.

Uyu mwaka bazatangira ibindi birori birimo ibizabera i New York, Thailand na Singapore.

Umuyapani ubwo yari ari kwerekana imyambaro ya Karssh Colllections
Abanyamideli bo mu Buyapani ubwo bigaragazaga mu buryo bwanyuze benshi
Iki gikorwa cyitabiriwe n'abantu batandukanye
Abanyamideli biyerekanye mu buryo bitandukanye
John Bunyeshuri watangije Kigali Fashion Week (uri iburyo) ubwo yari ari imbere mu gikorwa cya Tokyo Africa Collections
Kaneza Lynka uri mu banyamideli bakomeye mu Rwanda (uri ibumoso) ubwo yiyerekanaga
Karsh Collections ubwo yari ari imbere imyambaro ye imaze kwerekanwa
Tokyo Africa Collections isigaye itegurwa ku bufatanye na Kigali Fashion Week
Abanyarwanda bari mu Buyapani bishimiye gusura AOKI ikora amakositimu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza