U Busuwisi: Ambasaderi Rwakazina yibukije urubyiruko icyo rutegerejweho mu gusigasira ibyagezweho

Yanditswe na Ndayikunda Josué
Kuya 21 Ugushyingo 2019 saa 03:17
Yasuwe :
0 0

Ambasaderi w’u Rwanda mu Busuwisi, Rwakazina Marie Chantal, yashishikarije urubyiruko rutuye muri iki gihugu gutanga umusanzu warwo mu kubumbatira ibyo urwa Gasabo rwagezeho rwifashishije ubwenge, amaboko, imbaraga n’ubushishozi bwarwo.

Ibi Rwakazina yabitangarije i Genève mu mpera z’icyumweru gishize mu mugoroba wahuje Abanyarwanda n’inshuti z’igihugu zituye mu Busuwisi.

Ibiganiro byatangiwe muri iki gikorwa byibanze ahanini ku kurebera hamwe uburyo Abanyarwanda baba mu Busuwisi na bo bagira uruhare mu iterambere ry’u Rwanda no guteza imbere imikoranire hagati ya Ambasade n’Abanyarwanda babarizwa ku butaka bw’icyo gihugu.

Mu ijambo Rwakazina yagejeje ku bitabiriye uyu mugoroba, yasabye Abanyarwanda by’umwihariko urubyiruko rutuye mu Busuwisi kugira uruhare mu itarembere ry’igihugu no gusigasira ibyo cyagezeho.

Yagize ati “Turabasaba mwese, cyane cyane abakiri bato amaboko yanyu, imbaraga zanyu, ubwenge n’ubushishozi byanyu ngo tubumbatire ibyagezweho. Ariko cyane cyane turabasaba ngo mufate iya mbere mu gukemura bimwe mu bibazo igihugu cyacu kigihanganye nabyo.”

Ambasaderi Rwakazina yanasangije Abanyarwanda baba mu Busuwisi intambwe ishimishije u Rwanda rumaze gutera mu rugendo rwo kwiyubaka haba mu bukungu, mu mibereho myiza y’Abanyarwanda no mu miyoborere myiza. Yaboneyeho n’umwanya wo gukangurira abifuza gushora imari mu Rwanda ko imiryango ifunguye.

Rwakazina yanagarutse ku buryo u Rwanda rumaze kuba inyenyeri imurikira amahanga rubifashijwemo n’ubuyobozi bwiza burangajwe imbere na Paul Kagame. Yagarutse ku ruhare u Rwanda rwagize mu mavugurura atandukanye yakozwe mu Muryango wa Afurika Yunze Ubumwe akagira umumaro munini.

Uyu muhuro wabaye n’umwanya mwiza w’amashyirahamwe y’Abanyarwanda akorera mu Busuwisi kugaragaza ibikorwa bitandukanye nkaho “Ibuka-Suisse” n’Urunana yamurikiye abitabiriye iyi nama ibikorwa byabo bigamije kurwanya Jenoside n’ingengabitekerezo yayo no guteza imbere umuco Nyarwanda muri rusange.

Abanyarwanda baba mu Busuwisi bagaragarijwe kandi uburyo u Rwanda rushishikajwe no kwita ku mibereho y’abaturage barwo batuye mu mahanga, aho inyungu zabo zirengerwa mu buryo butandukanye.

Ambasaderi w’u Rwanda mu Busuwisi, Rwakazina Marie Chantal, yashishikarije urubyiruko rutuye gutanga umusanzu mu kubumbatira ibyo cyagezeho
Abanyarwanda n’inshuti zabo mu Busuwisi bahuriye i Genève mu mugoroba wo kuganira no gusabana
Ambasaderi Rwakazina Marie Chantal asuhuza bamwe mu bitabiriye iki gikorwa
Ni igikorwa cyatangiwemo impanuro zitandukanye zigamije kwibutsa urubyiruko kwibuka igihugu cyarwibarutse
Abitabiriye iki gikorwa batanze ibitekerezo n'inama zitandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza