U Bubiligi: Abanyarwanda bahuriye mu rugendo rwa ‘‘Balade Santé’’ ku nshuro ya gatanu (Amafoto)

Yanditswe na IGIHE
Kuya 13 Kanama 2019 saa 07:30
Yasuwe :
0 0

Abanyarwanda b’ingeri zitandukanye barimo abana n’ababyeyi baba mu Bubiligi bifatanyije n’inshuti zabo mu gikorwa cy’urugendo ruzwi nka ‘‘Balade Santé’’ kigamije gusigasira ubuzima mu gukora imyitozo ngororangingo no gusabana.

Iki gikorwa ngarukamwaka gitegurwa na IGIHE, Ishami ryo ku Mugabane w’u Burayi rikorera mu Bubiligi, ku nshuro yacyo ya gatanu cyabereye ahitwa ‘‘Château de La Hulpe’’ kuri iki Cyumweru tariki ya 11 Kanama 2019.

Balade Santé igizwe n’urugendo rukorerwa ahantu hareshya n’ibilometero bitandatu, yatangiye gukorwa bwa mbere tariki ya 8 Ugushyingo 2015.

Uru rugendo rwateguwe ku bufatanye na “Resto Boule Bleu” iyobowe na Rusaro Yvette, “Roums Center Ltd” iyobowe na Rugerero Jean Pierre, “Africa Cash” ya Nsengiyumva Ramadhani na “Resto Archipel” iyobowe na Nadine Kaze, La Verdure iyobowe na Munyampeta Vital na DRB-Rugali, agace ka Brabant Wallon.

Umuyobozi uhagarariye IGIHE mu Burayi, Karirima A. Ngarambe, yagarutse ku mpamvu y’iki gikorwa, asobanura n’urugendo rw’imyaka 10 rwa IGIHE rwaranzwe n’imikoranire ihamye.

Ati” IGIHE irabashimira byimazeyo ku bwitabire bwanyu. Muri iyi myaka 10 ishize IGIHE yabaye ikiraro hagati ya diaspora n’u Rwanda ku buryo Umunyarwanda aho ari hose umunsi ku wundi yabashije guhora ajyana n’aho igihugu kiba kigeze ndetse na benshi muri mwe mukora ibikorwa bifitiye urwababyaye akamaro, kubimenyekanisha byarushijeho koroha, kandi inzira iracyakomeza”

“Kwitabira "Balade Santé" ni uburyo bwo kurushaho kwegerana, gusabana ari nako buri wese ananura umubiri n’ubwonko, dushimiye kandi na none buri wese witabiriye iki gikorwa.”

Yakomeje avuga ko icyizere cyabo ari igihango gihoraho mu kurushaho kunoza serivisi zaba iz’itangazamakuru n’izindi zitangwa na IGIHE Ltd.

Muri iki gikorwa kandi Abanyarwanda bafite ibikorwa mu Bubiligi no mu Rwanda bahawe umwanya wo gutanga ubuhamya bwaho bavuye naho bageze mu kwiteza imbere binyuze mu kwihangira imirimo.

Igikorwa cyasojwe n’ubusabane, indirimbo z’umuco gakondo no gusangira nk’uko byakorwaga mu buryo bw’Abanyarwanda bo hambere.

Abitabiriye iki gikorwa basabwe kandi kuzitabira Rwanda Day y’uyu mwaka izabera mu Mujyi wa Bonn mu Budage ku wa 24 Kanama 2019, ari benshi.

Dr Mugabo Gérard na Deo Mazina, bari batumiwe muri iki gikorwa cya Balade Santé, baganirije abitabiriye ku byiza byo gukora imyitozo ngororangingo bababwira ko ’Sport’ ari wo muti wa mbere w’ubuzima.

Château de La Hulpe aho uru rugendo rwabereye ni mu gace kagizwe n’ishyamba bita ‘‘Forêt de Soignes’’, harimo inzira zabugenewe mu gukoreramo ingendo n’ubusitani bwiza.

Ubu butaka bwagiye bugurwa n’abantu batandukanye ariko kugira ngo hamere uko hameze ubu byatangiye mu 1893 ubwo umutungo wagurwaga n’umunyenganda witwa Ernest Solvay, wahimbye sosiyete izwi cyane ku izina rya Solvay & Co, nyuma yaje kuharaga abana be bakomeza kuhakora neza.

Karirima Ngarambe uhagarariye IGIHE mu Bubiligi ageza ijambo ku bari bitabiriye iki gikorwa
Bagize umwanya wo gukora siporo
Abitabiriye iki gikorwa basubanuriwe uburyo siporo ari ingenzi mu buzima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza