00:00:00 IGIHE NETWORK KN KINYARWANDA EN ENGLISH FR FRANCAIS

Sudani: Abanyarwanda bizihije Umunsi wo Kwibohora28, bibutswa akamaro kawo ku gihugu

Yanditswe na Muyisenge Jean Felix
Kuya 8 July 2022 saa 05:48
Yasuwe :

Abanyarwanda baba muri Sudani bifatanyije n’inshuti zabo mu Kwizihiza ku nshuro ya 28 Umunsi wo Kwibohora. Ni mu birori byabereye i Khartoum mu Murwa Mukuru wa Sudani, ku wa kane tariki ya 7 Nyakanga 2022.

Ni igikorwa cyateguwe na Ambasade y’u Rwanda muri Sudani ku bufatanye n’Abanyarwanda batuye muri iki gihugu; cyitabiriwe abayobozi mu miryango itegamiye kuri Leta, abikorera, abadipolomate n’abandi.

Cyaranzwe n’ibikorwa bitandukanye birimo imbyino gakondo z’Abanyarwanda, filime y’icyegeranyo yerekana urugendo rwaganishije ku kwibohora n’ubusabane.

Uhagarariye inyungu z’u Rwanda muri Sudani, Buhungu Abel, yagaragaje akamaro k’Umunsi wo Kwibohora ku Banyarwanda cyane ko tariki ya 4 Nyakanga mu 1994 ari bwo Ingabo za FPR Inkotanyi zahagaritse Jenoside yakorerwaga Abatutsi.

Yagize ati “Uyu munsi wizihizwa buri tariki ya 4 Nyakanga ku rwego rw’igihugu. Ni uwo kuzirikana ubutwari n’umurava w’abari muri FPR Inkotanyi n’ubuyobozi bushoboye bwa Perezida Paul Kagame dukesha uyu munsi wo kwibohora turi kwizihiza none”.

Yavuze ko urugendo rw’imyaka 28 nyuma ya Jenoside yakorewe Abatusti rwaranzwe n’umuhate no kudacika intege kw’Abanyarwanda na politiki z’iterambere n’ubuyobozi bwiza byateje imbere igihugu.

Yakomeje ati “Nyuma yo kwibohora hakurikiyeho umuvuno mushya wo kongera kuzahura indangagaciro z’Abanyarwanda, kubaka ubufatanye, guhangana n’ibyaha bya Jenoside n’ibitekerezo bihembera ingengabitekerezo, guteza imbere abagore n’urubyiruko, kwimakaza umutekano kuri bose, kuzahura ubukungu no kongera guhanagura isura y’u Rwanda yari yarangiritse ku rwego mpuzamahanga.”

Buhungu yakomeje agaragaza ingamba zafashwe kugira ngo ibi bigerweho zirimo ishyirwaho z’Inkiko Gacaca, Gahunda y’Ubudehe, Girinka Munyarwanda n’izindi zabyaye umusaruro n’icyerekezo cy’u Rwanda.

Yakomeje agaragaza ko u Rwanda rugihangayikishijwe n’abakomeza gupfobya Jenoside yakorewe Abatusi, abagoreka amateka yayiranze n’abakwirakwiza imvugo zihembera amacakuburi mu Banyarwanda.

Yibukije abitabiriye iki gikorwa ko ubu icyiciro kigezweho ari icyo kuzamura umuvuduko w’iterambere ry’ubukungu.

Ati “Turimo kubona izamuka mu itumanaho hagati y’abantu haba mu rwego rwa politiki n’ubucuruzi. Tugendeye kuri politiki y’u Rwanda ifungutse mu mitangire ya visa kandi yorohereza ishoramari aho ubu ruri ku mwanya wa 2 ku Mugabane wa Afurika n’uwa 38 ku Isi yose.’’

Yashishikarije ba mukerarugendo n’abashoramari bakomoka muri Sudani kuzirikana u Rwanda no kurushyira ku rutonde rw’ibanze rw’ubukerarugendo, ubucuruzi n’ishoramari.

Uhagarariye Inyungu z'u Rwanda muri Sudani, Buhungu Abel, yagaragaje akamaro k'Umunsi wo Kwibohora mu buzima bw'Abanyarwanda
Abitabiriye uyu muhango bakase gâteau y'isabukuru y'imyaka 28 u Rwanda rwibohoye
Nyuma y'uyu muhango habayeho no gusabana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .