Malawi: Abanyarwanda basabye kwegerezwa RwandAir mu kwagura ubucuruzi bwabo

Yanditswe na Karirima A. Ngarambe
Kuya 23 Kamena 2019 saa 04:33
Yasuwe :
0 0

Abanyarwanda baba muri Malawi bifatanyije n’inshuti zabo mu busabane bwaganiriwemo ahakenewe kongerwa imbaraga mu rugendo rw’iterambere ryabo.

Ubu busabane bwahuje Abanyarwanda bacururiza muri Malawi, ababarizwa mu nzego z’ubuvuzi, uburezi n’abakora mu miryango mpuzamahanga ishamikiye kuri Loni n’indi. Bwabereye mu Mujyi wa Lilongwe ku wa 16 Kamena 2019.

Intego yabwo ijyanye no kwiyubaka, kurushaho kumenyana no kwigira hamwe uko ibikorwa bafite muri Malawi byakwaguka bikagera no mu Rwanda.

Umuyobozi w’Abanyarwanda baba muri Malawi, Ndatinya Juvénal, yavuze ko icyo gikorwa cyateguwe mu gufasha Abanyarwanda gukomeza kwiyubaka.

Yagize ati “Malawi ibamo Abanyarwanda benshi. Twaje guhaha kandi ntitugomba kurya ihaho twahashye ngo twibagirwe ku gicumbi ahari imiryango yacu n’inshuti zacu.’’

Ni igikorwa cyabaye mu gihe hibukwa ku nshuro ya 25 Jenoside yakorewe Abatutsi mu 1994 aho ku rwego rwa Ambasade y’u Rwanda muri Zambia na Malawi cyabereye i Lilongwe.

Ndatinya yakomeje avuga ko “Turashimira ubwitange bw’Abanyarwanda mu gihe cyo kwibuka cyane cyane urubyiruko rwatweretse icyizere cy’ejo hazaza.’’

‘‘Nkuko insanganyamatsiko y’uyu mwaka ikomeza ibitwibutsa ni ‘Kwibuka Twiyubaka’, twese dufatanije nimuze turwanye abapfobya n’abahakana Jenoside yakorewe Abatutsi, ababiba ingengabitekerezo bashaka kuryanisha Abanyarwanda no kugoreka amateka y’ibyabaye mu Rwanda.’’

Abanyarwanda baba muri Malawi basabwe kuba abambasaderi ba gahunda ya Visit Rwanda igamije gushishikariza abanyamahanga gusura u Rwanda n’iya Made in Rwanda iteza imbere ibikorera mu gihugu.

Ndatinya yagaragaje icyifuzo ko RwandAir yakwagura amarembo ikagera muri Malawi na Mozambique mu korohereza abacuruzi gukora ingendo.

Yagize ati “Turasaba inzego zose zirebwa n’iby’iyi ndege ko bakwihutisha gahunda yo gutangiza ingendo zayo muri Malawi. Byadufasha kujya mu Rwanda, Dubai, u Bushinwa n’u Buhinde tutanyuze kure, duhendwe tunategereze igihe kirekire.’’

Yagaragaje ko mu gihe Ikigo cy’Igihugu gishinzwe Ubwikorezi bw’Indege, RwandAir cyaba kihatangije ingendo, hari ubucuruzi bwagutse bwakongerwa mu byo ‘dukora kandi n’ubukerarugendo mu bihugu byombi bwakwagura amarembo.’

RwandAir igana mu byerekezo 28 mu bice bitandukanye by’Isi, ku wa 18 Kamena 2019, yatangije ingendo zerekeza mu Mujyi wa Guangzhou mu Bushinwa.

Abanyarwanda baba n’abakorera muri Malawi basabwe kubana neza no gukurikiza gahunda z’igihugu batuyemo n’icyo bavukamo, bakirinda amacakubiri, bagasenyera umugozi umwe bimika ubumwe n’ubwiyunge na Ndi Umunyarwanda.

Basabwe gukoresha umuco Nyarwanda, indangagaciro na kirazira ziwushingiyeho nk’intwaro yo kwiteza imbere.

Abashoramari bo muri Malawi basangijwe ahari amahirwe babyaza umusaruro mu Rwanda mu bijyanye n’ubukerarugendo, inganda ziciriritse n’imyidagaduro n’ibijyanye n’ubucuruzi.

Raporo ya Banki y’Isi yo mu Ukwakira 2018, yagaragaje ko mu koroshya ubucuruzi, u Rwanda ruri ku mwanya wa 29 mu bihugu 190 ku Isi, n’uwa kabiri muri Afurika inyuma y’Ibirwa bya Maurice.

Muri ubu busabane bwabahuje hanatangiwemo icyifuzo cyo gushyiraho umuryango uhuza Abanyarwanda n’abaturage ba Malawi.

U Rwanda na Malawi bifitanye umubano wihariye kuko nko muri Mata 2019, u Rwanda rwerekanye ikimenyetso cy’ubuvandimwe kuri iki gihugu cyashegeshwe n’inkubi y’umuyaga uvanze n’imvura wacyibasiriye mu ntangiriro z’umwaka, ruyigenera ibihumbi 200 by’amadolari (asaga miliyoni 180 Frw).

Abanyarwanda baba muri Malawi bahuriye mu busabane
Ni igikorwa cyabereye mu Mujyi wa Lilongwe muri Malawi
Abanyarwanda baba muri Malawi basabye kwegerezwa RwandAir mu kwagura ubucuruzi bwabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza