00:00:00 IGIHE NETWORK KN KINYARWANDA EN ENGLISH FR FRANCAIS

Kwibuka ni imbaraga zo guhangana n’abapfobya Jenoside yakorewe Abatutsi- Maxime Prévot uyobora Namur

Yanditswe na Karirima A. Ngarambe
Kuya 6 June 2022 saa 11:39
Yasuwe :

Umuyobozi w’Umujyi wa Namur mu Bubiligi, Maxime Prévot, yavuze ko Kwibuka ari ingenzi kuko bifasha mu rugamba rwo guhangana n’abahakana, bakanapfobya Jenoside yakorewe Abatutsi mu 1994.

Ni ubutumwa yagarutseho ubwo yitabiraga igikorwa cyo Kwibuka ku nshuro ya 28 Jenoside yakorewe Abatutsi, cyabereye muri Namur, Umurwa Mukuru w’igice kivuga Ururimi rw’Igifaransa mu Bubiligi cyitwa Wallonie, tariki ya 4 Kamena 2022.

Iki gikorwa cyitabiriwe n’Abanyarwanda baba mu Bubiligi n’inshuti zabo baturutse mu bice bitandukanye.

Ni igikorwa cyatangijwe no gukora urugendo rwo Kwibuka, mu kuzirikana ibihe bigoye Abatutsi banyuzemo mu mezi atatu bahigwa amanywa n’ijoro, ariko cyane kibutsa urugendo bakoraga bajya kwicwa.

Maxime Prévot ni umunyapolitiki w’imyaka 44 y’amavuko akaba ari Perezida w’Ishyaka LE (Les Engagées) akaba Umudepite mu Nteko Ishinga Amategeko y’u Bubiligi. Yavuze ko Kwibuka Jenoside yakorewe Abatutsi ari ukuzirikana inzirakarengane no gukomeza abayirokotse.

Yagize ati “Kwibuka ni uguha agaciro abishwe bazira gusa uko bavutse no kongera kuvugurura uburyo turwanya ingengabitekerezo ya Jenoside yakorewe Abatutsi haba twe ubwacu cyangwa abo dufatanyije.’’

Maxime Prévot yavuze ko atari ubwa mbere igikorwa cyo kwibuka cyibereye mu Mujyi wa Namur ariko uyu mwaka byo harimo akarusho kuko yacyitabiriye nyuma yo kuva mu Rwanda aho yiboneye n’amaso ye ibyahabereye.

Umuyobozi w’Umujyi wa Namur mu Bubiligi, Maxime Prévot, yavuze ko Kwibuka ari ingenzi kuko bifasha mu rugamba rwo guhangana n’abahakana Jenoside yakorewe Abatutsi

Yavuze ko ubwo yari i Kigali mu mwaka ushize aho yari yitabiriye Inama ihuza aba-Meya bo mu bihugu bivuga Igifaransa, Maxime Prévot yasuye Urwibutso rwa Jenoside rwa Kigali ku Gisozi ndetse n’Ingoro Ndangamateka y’Urugamba rwo Guhagarika Jenoside iri ku Kimihurura.

Yasobanuye ko aha yahaboneye byinshi ku mateka yagejeje u Rwanda kuri Jenoside mu 1994 n’uko igihugu cyongeye kwiyubaka.

Yakomeje ati “Ibyo nabonye, uyu munsi biranyemerera kongera kwiyumvisha umubabaro Abanyarwanda n’Abatutsi by’umwihariko banyuzemo mu gihe cya Jenoside iteye ubwoba.’’

“Imyaka 28 irashize, u Rwanda ruhuye n’ibihe bikomeye, nyuma y’imyaka 28 u Rwanda, abarokotse iyi Jenoside yakorewe Abatutsi ntibibagirwa akababaro bahuye nako, ntibibagirwa imiryango yabo, inshuti zabo n’abandi bishwe bazira akarengane. Iyo twibuka byongera gutanga ishusho y’ubuzima bubi banyuzemo.’’

Nubwo u Rwanda rwanyuze mu bihe bikomeye bya Jenoside, amahanga arushima ko rwabashije kwiyubaka, ubu rukaba ari icyitegererezo ku bihugu byinshi.

Maxime Prévot yasobanuye ko nyuma y’imyaka 28, u Rwanda rwongeye kubona imbaraga zo kwiyubaka no kwiteza imbere.

Yakomeje avuga ko muri iyi minsi hakomeza kugaragara abahakana n’abapfobya Jenoside yakorewe Abatutsi aho usanga ababikora baba bagamije kubabaza abarokotse cyane cyane.

Ati “Ni ingenzi gushyigikira umuhate wo gukomeza kubaho ku barokotse no kubarinda, by’umwihariko kubarinda abahakana n’abapfobya Jenoside.’’

“Kwibuka ni uguha agaciro inzirakarengane no kongera kuvugurura uburyo turwanya ingengabitekerezo ya Jenoside haba twe ubwacu cyangwa abo dufatanyije.’’

Yavuze ko uburyo bwiza bwo gushyigikira abarokotse ari ukububakamo icyizere, binyuze mu kubaba hafi.

Ati “Jenoside yabereye mu maso y’Isi ikwiye kuyisigira isomo ko ivangura ryose ridakwiye kurebererwa.”

Maxime Prévot yashimangiye ko Kwibuka bikwiye guhoraho kuko bifasha abakiri bato kumenya amateka no kwirinda ko ibyabaye byazasubira.

Mu Bubiligi, igikorwa cyo kwibuka kirakomeje mu gihe cy’iminsi ijana yakozwemo Jenoside yakorewe Abatutsi. Mbere ya Namur, cyabereye mu mijyi itandukanye irimo Bruxelles, Liège, Charleroi, Mons, Namur. Hatahiwe Umujyi wa Anvers ku wa Gatandatu tariki 11 Kamena 2022.

Kuva ku wa 7 Mata 2022, Abanyarwanda bose bifatanyije n’amahanga mu minsi 100 yo Kwibuka ku nshuro ya 28 Jenoside yakorewe Abatutsi, yahitanye ubuzima bw’inzirakarengane zirenga miliyoni mu mezi atatu.

Indi nkuru wasoma: Amb. Sebashongore yagaragaje ko abapfobya n’abahakana Jenoside yakorewe Abatutsi badakwiye kurebererwa

Amb. Sebashongore yavuze ko abapfobya n'abahakana Jenoside yakorewe Abatutsi badakwiye kurebererwa
Igikorwa cyo Kwibuka ku nshuro ya 28 Jenoside yakorewe Abatutsi cyitabiriwe n'abantu batandukanye, cyabereye mu Mujyi wa Namur

Andi mafoto yaranze Igikorwa cyo Kwibuka mu Mujyi wa Namur

Abana bakiri bato ni bo bari batwaye icyapa kinini cyerekana ko abari muri uru rugendo bibukaga Jenoside yakorewe Abatutsi mu 1994
Abitabiriye igikorwa cyo kwibuka bari bacanye n'urumuri rw'icyizere
Si ku nshuro ya mbere, abatuye muri Namur bahurira mu gikorwa cyo kwibuka Jenoside yakorewe Abatutsi
Abakiri bato na bo bacanye urumuri rw'icyizere
Abanyarwanda n'inshuti zabo zo mu Mujyi wa Namur bifatanyije mu gikorwa cyo kwibuka Jenoside yakorewe Abatutsi
Maxime Prévot asuhuza Urubyiruko rw'Abanyarwanda rwifatanyije n'ababyeyi barwo kwibuka abazize Jenoside yakorewe Abatutsi
Amb. Sebashongore yavuze ko abapfobya n'abahakana Jenoside yakorewe Abatutsi badakwiye kurebererwa
Umuhuzabikorwa w’Igikorwa cyo kwibuka ku nshuro ya 28 abazize Jenoside yakorewe Abatutsi mu Mujyi wa Namur, Philbert Rugumire, yashimye abacyitabiriye
Lionel Karugarama uri mu bagize itsinda ryateguye iki gikorwa yavuze ko ari ingenzi gufata umwanya wo kwibuka abishwe muri Jenoside yakorewe Abatutsi
Umuyobozi w’Umujyi wa Namur mu Bubiligi, Maxime Prévot, yavuze ko Kwibuka ari ingenzi kuko bifasha mu rugamba rwo guhangana n’abahakana Jenoside yakorewe Abatutsi
Béatrice Mukamurindwa warokotse Jenoside yakorewe Abatutsi yatanze ubuhamye bwe, anavuga ku Ishyirahamwe yashinze rifasha abashakisha abana batandukanye n’ababyeyi muri Jenoside yise CCMES (Cri du Coeur d'une Mère qui Espère)
Igikorwa cyo Kwibuka ku nshuro ya 28 Jenoside yakorewe Abatutsi cyitabiriwe n'abantu batandukanye, cyabereye mu Mujyi wa Namur
Batezwe amatwi ibiganiro byatangiwe muri "Jardin du Mayeur''
Abanyarwanda batuye Namur bashimiwe uko bitabiriye igikorwa cyo kwibuka ari benshi
Basobanuriwe uko Jenoside yateguwe ikanashyirwa mu bikorwa n'ubutegetsi bubi
Abakiri bato na bo bitabiriye igikorwa cyo kwibuka Jenoside yakorewe Abatutsi no kunamira inzirakarengane zayo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .