00:00:00 IGIHE NETWORK KN KINYARWANDA EN ENGLISH FR FRANCAIS

Ibuka-USA yahuje abarokotse Jenoside baganira ku mateka yayo n’ingamba zo kuyirwanya

Yanditswe na Karirima A. Ngarambe
Kuya 3 June 2022 saa 02:37
Yasuwe :

Ku nshuro ya mbere Umuryango Ibuka-USA wahuje abatuye muri Leta Zunze Ubumwe za Amerika n’abandi baturutse mu bihugu bitandukanye mu gikorwa cyo kwibuka ku nshuro ya 28 Jenoside yakorewe Abatutsi no kuganira ku ngamba zo guhangana n’abahakana bakanayipfobya.

Ni igikorwa cyabereye muri Leta ya Utah mu Mujyi wa Salt Lake ku wa 29 Gicurasi 2022. Cyabimburiwe n’isengesho rya Pasiteri Rick Warren.

Abitabiriye iki gikorwa baturutse mu Rwanda barimo Nkuranga Egide uyobora Ibuka-Rwanda; Gatari Egide uyobora GAERG; Mukabayire Valérie uyobora AVEGA; Audace Mudahemuka uyobora AERG n’abandi. Hari kandi abahanzi Jean de Dieu Rwamihare uzwi nka Bonhomme na Munyanshoza Dieudonné ’Mibirizi’.

Ibiganiro binyuranye ku mateka yagejeje u Rwanda kuri Jenoside yakorewe Abatutsi ni kimwe mu byaranze iki gikorwa cya Ibuka- USA, umuryango umaze umwaka n’igice uvutse.

Umuyobozi wa Ibuka-USA, Jason Havuga Nshimye, yavuze ko nyuma y’uko uyu muryango uvuka byari bikenewe ko abanyamuryango n’inshuti zabo bahura amaso ku yandi kugira ngo baganire ibintu binyuranye n’ingorane bahura na zo mu guhangana n’ingaruka za Jenoside yakorewe Abatutsi mu 1994.

Yasobanuye uko Ibuka-USA yavutse n’intego zayo zo kurengera inyungu z’abarokotse, kurinda amateka no kurwanya abapfobya bakanahakana Jenoside yakorewe abatutsi.

Nshimye yavuze kandi ko babonye umwanya wo kungurana ibitekerezo ku ngamba zo kubungabunga amateka no kuyandika kugira ngo atazibagirana.

Umuyobozi wa Ibuka-Rwanda, Nkuranga Egide, yibukije ko mu nshingano z’uyu muryango harimo kuba umuvugizi w’abacitse ku icumu rya Jenoside yakorewe Abatutsi, mu bibazo bitandukanye birimo ubutabera kugira ngo hakurikiranwe abayigizemo uruhare.

Hari kandi gufasha abarokotse kubona imitungo yabo, kwibuka abishwe muri Jenoside no kwita ku mibereho y’abacitse ku icumu babashakira aho baba, kubavuza, amashuri y’abana n’ibindi.

Nkuranga yasabye abari aho gufatanya gucyemura ibibazo by’abacitse ku icumu bashyize hamwe, kwigisha abana babo amateka ya Jenoside, gushyira ingufu mu kurwanya abahakana bakanapfobya Jenoside yakorewe Abatutsi abo ari bo bose, aho bari hose.

Mu kiganiro cyatanzwe na Mutanguha Freddy, Umuyobozi w’Urwibutso rwo ku Gisozi, yavuze ko ari nk’igitangaza kurokoka kandi ingaruka za Jenoside zikurikirana abarokotse imyaka myinshi.

Yavuze ko ingaruka za Jenoside zihindura imyitwarire y’umuntu n’ubuzima bwe asigaje ku Isi bitewe no kwibuka abe, inshuti, n’abaturanyi yabuze. Ibi ni byo bibyara ihahamuka kuri bamwe mu barokotse.

Mutanguha yavuze ko abari n’abategarugori bari hagati y’imyaka 13-35, bagera ku bihumbi 250 bafashwe ku ngufu, bamwe bakanduzwa indwara zidakira nka SIDA.

Umudepite muri Leta ya Utah, Angelo Romero, yashimiye Abanyarwanda batuye muri iyo leta kandi anabizeza imikoranire mu kurinda amateka.

Leta ya Utah ni yo muri USA yafashe iya mbere mu kwemeza itariki 7 Mata nk’umunsi wo kwibuka Jenoside yakorewe Abatutsi mu Rwanda.

Depite Angelo Romero yashimishijwe no kuba Leta ye yaratoranyijwe kuberamo iki gikorwa cyo gihuza abarokotse batuye muri Amerika bwa mbere n’ubwo bari basanzwe bibuka buri mwaka.

Mujawayo Esther utuye mu Budage yatanze ikiganiro cy’uburyo bwo gufasha uwagize ihungabana. Yagarutse ku bimenyetso by’ihungabana agira inama abarokotse kwitabaza abaganga babishoboye kuko bifasha mu gukira ibikomere bitagaragara n’ibigaragara.

Mu buhamya bwatanzwe na Batamuriza Daphine, yasobanuye ukuntu yari afite imyaka ibiri mukuru agahora amuhetse ku mugongo n’ukuntu bombi bajugunywe mu cyobo cyuzuye imirambo inshuro nyinshi.

Yavuze ko mukuru we yakomeje kumwihishana kugeza ubwo rimwe yamusize munsi y’igiti kuko yatekerezaga ko yapfuye, ariko nyuma agarutse agasangab agihumeka akongera akamuheka. Ni ubuhamya bwarijije benshi kuko ni ubwa mbere abuvuze nyuma yo kumara imyaka myinshi yarananiwe kuvuga ibyamubayeho.

Ku munsi wa gatatu w’iki gikorwa hakozwe urugendo rwo kwibuka rwitabiriwe n’Abanyarwanda n’inshuti z’u Rwanda. Abitabiriye iki gikorwa kandi basabye Leta Zunze Ubumwe za Amerika kwemeza inyito ya Jenoside yakorewe Abatutsi mu 1994, aho kuyita andi mazina.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .