Higiro Prosper yatanze impapuro zimuhesha guhagararira u Rwanda muri Canada nka Ambasaderi

Yanditswe na Twarabanye Venuste
Kuya 1 Ugushyingo 2019 saa 10:03
Yasuwe :
0 0

Prosper Higiro yashyikirije Guverineri mukuru wa Canada, Julie Payette, ibyangombwa bimuhesha guhagararira u Rwanda muri icyo gihugu nka Ambasaderi.

Higiro ni umwe mu bahagarariye u Rwanda mu bihugu 15 by’amahanga bashyizweho na Perezida Paul Kagame kuwa 15 Nyakanga 2019, agera mu murwa mukuru Ottawa ku wa 26 Ukwakira 2019. Kuri uyu wa Gatanu nibwo yatanze impapuro zimuhesha guhagararira u Rwanda muri Canada.

Ubutumwa Ambasade y’u Rwanda muri Canada yanyujije kuri Twitter bugira buti “Nyakubahwa Prosper Higiro nyuma yo kugera muri Canada ku itariki 26 Ukwakira 2019 yashyikirije ibyangombwa bimwemerera kuba ambasaderi no gusimbura uwamubanjirije, kuri Guverineri mukuru wa Canada, Julie Payette.”

Bukomeza buvuga ko yamugaragarije ko yiteguye gushimangira umubano mwiza usanzwe hagati y’ibihugu byombi. U Rwanda na Canada bifitanye umubano kuva mu 1963.

Higiro ni umunyapolitiki akaba yaranabaye umuyobozi w’Ishyaka riharanira Ukwishyira Ukizana, PL. Yabaye umusenateri, yaniyamamaje ku mwanya wa Perezida wa repubulika mu matora yo mu 2010.

Perezida Paul Kagame na Minisitiri w’Intebe wa Canada, Justin Trudeau, baheruka kugirana ibiganiro umwaka ushize i Erevan muri Arménie, ubwo bari bitabiriye inama ya 17 y’abakuru b’ibihugu na za Guverinoma bigize Umuryango uhuza ibihugu bikoresha ururimi rw’Igifaransa, OIF.

Ni inama yanemerejwemo Louise Mushikiwabo nk’umunyamabanga mukuru wa OIF, asimbuye umunya-Canada Michaelle Jean wari usanzwe kuri uwo mwanya.

Minisitiri w’Intebe Trudeau, abinyujije kuri Twitter yatangaje ko baganiriye “ku buryo Canada yakorana n’u Rwanda na Afurika yunze Ubumwe mu guhanga amahirwe agenewe urubyiruko n’iterambere mu nyungu z’ibihugu byombi.”

Muri Mata uyu mwaka wa 2019 Guverineri Julie Payette yasuye u Rwanda, yitabira umuhango wo Kwibuka ku nshuro ya 25 Jenoside yakorewe Abatutsi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza