Ni igikorwa cyabaye kuri uyu wa Gatandatu hasozwa ibikorwa byo kwibuka Jenoside yakorewe Abatutsi byari bimaze iminsi bibera hirya no hino mu mu mijyi itandukanye y’u Bubiligi, bitegurwa n’imiryango y’abarokotse jenoside yakorewe Abatutsi n’inshuti zabo.

Ibikorwa byo kwibuka ku nshuro ya 28 Jenoside yakorewe Abatutsi, guhera tariki ya 7 Mata uyu mwaka, byabereye mu mijyi itandukanye y’u Bubiligi nka Bruxelles, Liége, Mons, Namur, Louvain-La-Neuve na Charleroi.

Kuri uyu wa Gatandatu uyu muhango wari witabiriwe n’abantu batandukanye barimo Ambasaderi w’u Rwanda mu Bubiligi, Sebashongore Dieudonné, uhagarariye u Rwanda mu gace ka Flandre ari naho hari umujyi wa Anvers, Gunther Vanpraet, Intumwa y’Umuyobozi w’Umujyi wa Anvers Echevin Meeuws Tom, Umuyobozi wa Ibuka Belgique, Ernest Sagaga n’abandi.

Ambasaderi Sebashongore yavuze ko ari iby’agaciro gakomeye kuba kwibuka Jenoside yakorewe Abatutsi, byabereye muri Anvers.

Yavuze ko ako gace kakunze kurangwa n’abantu bagize uruhare muri Jenoside yakorewe Abatutsi ndetse n’ababashyigikiye, gusa ashimira kuba imyumvire itangiye guhinduka, abantu bakamenya ukuri.

Ati “Icyiza ntabwo ari ibintu bigaragara muri Flandre yose. Hari Flandre yateye imbere yiteguye kumenya isura ya nyayo y’u Rwanda. Nibyo dushishikajwe no kubakiraho ibiraro bituma turenga ibihe byahise bibi bitabaye byiza, tugatangira urugendo rushya.”

Yakomeje agira ati “Flandre ni agace gatuwe na bamwe mu bagize uruhare muri Jenoside n’ababashyigikiye bidegembya. Twizeye ko ubutabera buzashyira iherezo kuri uwo muco wo kudahana. Amateka atwereka ko iyo bigeze kuri Jenoside, nta kujenjeka gukwiriye kubaho.”

Ambasaderi Sebashongore yavuze ko hashize umwaka muri Flandre hafunguwe ibiro by’uhagarariye u Rwanda muri ako gace (Consul), bigaragaza imbaraga zo kunoza umubano n’ubufatanye hagati y ‘u Rwanda n’icyo gice cy’u Bubiligi.

Ati “Flandre ni agace k’ubukungu kandi u Rwanda ruzi neza amahirwe ahari. U Rwanda na Flandre bifite byinshi byakungukiranaho.”

Yavuze ko igikorwa cyo kwibuka ari umwanya mwiza wo guhuriza hamwe umutima nk’Abanyarwanda n’inshuti zabo kuko ari igikorwa kitareba gusa abanyarwanda, bakibuka Abatutsi basaga miliyoni bishwe bazira uko bavutse.

Ati “Kuba turi kumwe n’abanyapolitiki hano ni ikimenyetso cyerekana icyubahiro baha igikorwa turimo, kuri twe kandi bidutera imbaraga. Bigaragaza kumvwa no gufatanya dukeneye ku bayobozi b’u Bubiligi muri uyu murimo wo kwibuka. Twizeye ko iyi ntambwe ya mbere, iba intangiriro y’ubufatanye bwa Ibuka n’abatuye Anvers bafite inkomoko mu Rwanda. Twizeye ko ubufatanye bwanyu buzigaragariza mu bikorwa bihuriweho.”

Ambasaderi Sebashongore yasabye abanyarwanda batuye Anvers kurangwa n’icyizere kuko aricyo cyafashije ingabo za FPR Inkotanyi, guhagarika Jenoside yakorewe Abatutsi zikabohora u Rwanda.

Ati “Icyizere nicyo cyaranze ingabo za FPR zabohoye u Rwanda imyaka 28 irashize kandi tuzahora tuzishimira. Icyizere nicyo cyaranze abo bagore n’abagabo bari biyemeje kurwanya umugambi mubisha wa Jenoside.”

Yakomeje agira ati “Nyuma ya Jenoside, icyo cyizere ni nacyo cyafashije mu rugendo rw’ubumwe n’ubwiyunge. Ni nacyo kidufasha kugira intego nziza z’ejo hazaza h’igihugu cyacu.”

Echevin Meeuws Tom, waje ahagarariye ubuyobozi bw’Umujyi wa Anvers, yagize ati “Hano muri aka karere kacu twumva cyane ububabare u Rwanda n’abanyarwanda bagize cyane abo tubana batuye muri Anvers, tuzi uko bamwe muri bo babuzwa ibitotsi no kwibuka imiryango yabo yishwe muri jenoside yakorewe Abatutsi.”

Yakomeje agira ati “Uyu mujyi tuzi kwibuka icyo aricyo kuko hari amateka natwe twagize mu bihe by’iyicwa ry’Abayahudi. Niyo mpamvu tubiha agaciro cyane. Ku bijyanye n’ahasabwa na Ibuka ho kujya bibukira, nzabiganiraho n’abandi bayobozi, kuko sinafatira icyemezo hano.”

Perezida wa Ibuka Belgique, Ernest Sagaga yabwiye IGIHE ko kuba kwibuka Jenoside yakorewe Abatutsi byabereye mu mujyi wa Anvers, ari ikintu gikomeye.

Ati “Anvers ni umujyi ukomeye, uri no mu gice cya Flandre gituwe n’abaturage benshi b’u Bubiligi. Kuba twaje uyu munsi, ni ukwerekana ko n’iki gice cy’u Bubiligi nacyo tugikomeyeho kugira ngo tunakirinde abaza kukibibamo imvugo ipfobya cyangwa se ihakana Jenoside yakorewe Abatutsi mu Rwanda mu 1994.”

Sagaga yavuze ko mu gihe hibukwa abazize Jenoside yakorewe Abatutsi, ari byiza kuzirikana ku budaheranwa bw’abayirokotse.

Ati “Ntabwo twibagirwa n’abayirokotse cyane cyane ko muri ibi bikorwa baduherekeza, baduha ubuhamya bwabo, turabashimira uruhare babigizemo n’ubwitange bagaragaje kandi turi kumwe nabo iyi minsi ikurikiye aho tuzaba twibuka cyane cyane iminsi barokotse, iminsi bavuye mu bwihisho, iminsi baretse kwiheba ko batakibayeho ndetse akaba ari naho batangiye igikorwa cyo guharanira ubutabera ku bishwe ndetse no guharanira guhora duha agaciro mu kwibuka no kubabera abavugizi ari byo Ibuka yashingiwe.”

Nubwo ibikorwa byo kwibuka ku nshuro ya 28 Jenoside yakorewe Abatutsi bisojwe mu Bubiligi, Sagaga yijeje ko nka Ibuka batazahwema gukomeza guharanira ubutabera ku bagize uruhare muri Jenoside bataraburanishwa.

Ati “Ibuka yo ikomeje akazi ko guharanira ko abishwe batazibagirana, ko ubutabera bukomeza ku bataragezwa imbere y’inkiko haba mu Bubiligi ndetse n’ahandi.”

Uyu muhango Madamu Lydie Uwitonze, warokotse Jenoside yatanze ubuhamya agaragaza uburyo ingengabitekerezo ya Jenoside yigishijwe kuva kera bihereye mu mashuri.

Yavuze ku bihe bigoye we n’abavandimwe be banyuzemo muri Jenoside yakorewe Abatutsi, n’uburyo babashije kurokoka ubu bakaba bariyubatse.

Urubyiruko, abana bavuka ku b’Abanyarwanda batuye muri Anvers nabo bahawe umwanya muri iki gikorwa, mu mivugo basoma inyandiko zigamije kubafasha kuzirikana imiryango yabo yishwe muri Jenoside yakorewe Abatutsi mu 1994.

Ni igikorwa cyayobowe na Giramata Schmit, kandi Abahanzi barimo Cécile Kayirebwa na Umugwaneza Innocent bafatanya kuririmba indirimbo zo gufata mu mugongo abari aho.

Uhagarariye u Rwanda muri Flandre ari naho hari umujyi wa Anvers, Gunther Vanpraet atanga ubutumwa ku bitabiriye

Ambasaderi w’u Rwanda mu Bubiligi, Sebashongore Dieudonné yasabye abanyarwanda kurangwa n'icyizere

Umuyobozi wa Ibuka Belgique, Ernest Sagaga yashimye ubudaheranwa bw'abarokotse Jenoside yakorewe Abatutsi

Kayirebwa abinyujije mu bihangano bye, yahumurije abitabiriye

Lydie Uwitonze, warokotse Jenoside yatanze ubuhamya bw'inzira y'inzitane we n'umuryango we baciyemo muri Jenoside

Giramata Schmit wari umusangiza w'amagambo muri iki gikorwa

Uhagarariye u Rwanda mu gace ka Flandre ari naho hari umujyi wa Anvers, Gunther Vanpraet ni umwe mu bari bitabiriye

Echevin Meeuws Tom wa Anvers

Nshimiyimana ashimirwa na Mwunvirangoma bagize uruhre mu gutegura iki gikorwa cyo kwibuka

Abakuru n'abato bari bitabiriye ku bwinshi uyu muhango wo kwibuka

Abana bagaragaje umusanzu wabo ngo Jenoside itazongera ukundi

Hashimwe umubano mwiza ukomeje hagati y'umujyi wa Anvers n'u Rwanda muri rusange

Abanyarwanda n'inshuti batuye Anvers bari baje kwifatanya kwibuka ku nshuro ya 28 Jenoside yakorewe Abatutsi

Wabaye umwanya wo gusubiza amaso inyuma ku mateka ashaririya ya Jenoside yakorewe Abatutsi mu 1994

Charles Mwunvirangoma uyobora Diaspora Nyarwanda muri Anvers, akaba ni umwe mu bateguye iki gikorwa ashimira cyane abitabiriye baturutse hirya no hino

Lydie Uwitonze, warokotse Jenoside yatanze ubuhamya agaragaza uburyo ingengabitekerezo ya Jenoside yigishijwe kuva kera bihereye mu mashuri

Abanyarwanda n'inshuti z'u Rwanda batuye Anvers bari bitabiriye

Uhagarariye u Rwanda mu gace ka Flandre ari naho hari umujyi wa Anvers, Gunther Vanpraet

Ambasaderi Sebashongore yandika ubutumwa mu gitabo cy'abashyitsi

Abana bakomoka ku Banyarwanda batuye Anvers babinyujije mu mivugo, bagize uruhare mu gikorwa cyo kwibuka Jenoside mu mujyi wa Anvers

Umugwaneza Innocent aririmba indirimbo zo kwibuka

Ernest Sagaga yagaragaje ko ibikorwa byo gushakira ubutabera abazize Jenoside bigikomeje

Ernest Sagaga uyobora Ibuka Belgique asinya mu gitabo cy'abashyitsi

Charles Mwunvirangoma uyobora Diaspora Nyarwanda muri Anvers, ni umwe mu bateguye iki gikorwa

Giramata Schmit wayoboye iki gikorwa

Umuhanzi Cecile Kayirebwa akora mu nganzo

Abakiri bato basabwe gusigasira amateka kugira ngo Jenoside itazongera ukundi

Nshimiyimana (ibumoso) wari uhagarariye Abanyarwanda bari muri Diaspora Nyarwanda ya Flandre Occidentale bafatanyije gutegura iki gikorwa n'abatuye Anvers, ashimirwa na Mwunvirangoma

Bareba film Documentaire ku matera yagejeje u Rwanda mu bwicanyi bwakozwemo jenoside yakorewe Abatutsi

Filime mbarankuru ku mateka ya Jenoside yakorewe Abatutsi yarerekanywe muri uyu muhango

Bagaragarijwe uburyo bamwe mu Batutsi bicwaga bakajugunywa muri Nyabarongo mu gihe cya Jenoside

Ambasaderi Sebashongore yashimiye ubwitange bw'abanyarwanda batuye Anvers n'abandi baje kwifatanya mu kwibuka Jenoside yakorewe Abatutsi

Hatanzwe ubuhamya butandukanye bugaruka ku mateka yaranze Jenoside yakorewe Abatutsi

[email protected]