00:00:00 IGIHE NETWORK KN KINYARWANDA EN ENGLISH FR FRANCAIS

Ambasaderi Nyiramatama yasabye ubufatanye bw’amahanga kugira ngo abagize uruhare muri Jenoside bafatwe

Yanditswe na Karirima A. Ngarambe
Kuya 9 Gicurasi 2021 saa 03:32
Yasuwe :
0 0

Kuri uyu wa Gatandatu tariki ya 08 Gicurasi 2021, Ambasade y’u Rwanda mu bwami bwa Maroc ku bufatanye n’ibiro by’Umuryango w’Abibumbye (UN) muri Maroc, Abanyarwanda baba mu gihugu cy’ubwami bwa Maroc hamwe n’Umuryango Fondation Diplomatique bibutse ku nshuro ya 27 Jenoside yakorewe Abatutsi mu 1994 mu Rwanda.

Uyu muhango witabiriwe n’abashyitsi batandukanye barimo ba ambasaderi b’ibihugu bya Afurika bahagarariye ibihugu byabo mu bwami bwa Maroc, Ambasaderi uhagarariye umuryango w’ibihugu by’u Burayi mu Bwami bwa Maroc, abahagarariye Kaminuza Nkuru mu bwami bwa Maroc.

Byabaye hifashishijwe ikoranabuhanga mu rwego rwo kwirinda icyorezo cya Coronavirus. Umushyitsi mukuru kuri uyu munsi yari Perezida w’Inteko Ishinga Amategeko, Umutwe w’Abadepite b’Ubwami bwa Maroc , Habib El Malki.

Ambasaderi Zaina Nyiramatama yagarutse ku mateka ya Jenoside yakorewe abatutsi mu 1994 aho yagaragaje ko yateguwe ikigishwa mu nzego zose ndetse ikanashyigikirwa n’ubuyobozi bubi bwarangwaga n’ivangura n’ironda byagejeje kuri Jenoside yahitanye abarenga miliyoni mu gihe cy’iminsi 100 gusa barimo abana, abagabo, abagore, urubyiruko, abasaza ndetse n’abarwayi bari bari mu bitaro.

Yishimiye kandi ko Jenoside yahagaritswe n’Abanyarwanda bari bagize ingabo za FPR ziyobowe na Perezida Paul Kagame. Yavuze ko kwibuka ari inshingano ku Banyarwanda ndetse no kukiremwamuntu cyose kuko ari ugusubiza agaciro abishwe, kugaragariza ubufatanye abasigaye no gushyigikira ubumwe n’ubwiyunge, bikaba kandi inzira yo kongera kwiyubaka.

Ambasaderi Nyiramatama yashimiye ibihugu byashyizeho amategeko ahana abahakana n’abagoreka amateka ya Jenoside yakorewe Abatutsi, bagashyiraho n’inzibutso za Jenoside yakorewe abatutsi mu 1994.

Yashimiye abagize uruhare mu ifatwa n’iburanishwa ry’abakekwaho uruhare muri Jenoside, akangurira n’abandi bose ko bakwiye kubikora kuko bidakwiye ko hari igihugu cyaha urubuga n’ubwisanzure ku bantu bakurikirenyweho icyaha gikomeye cya jenoside.

Umuyobozi mukuru ushinzwe ubushakashatsi muri Komisiyo y’igihugu ishinzwe kurwanya Jenoside (CNLG), Dr. Gasanabo Jean Damascene, yavuze ko abatutsi batotejwe guhera mu gihe cy’ubukolini na nyuma yabwo kuri Repubulika ya mbere n’iya kabiri, kugeza ku ishyirwa mu bikorwa ry’umugambi wa Jenoside yakorewe Abatutsi mu 1994.

Yavuze ko nubwo umuryango mpuzamahanga, Loni wemeje ko mu Rwanda habaye Jenoside yakorewe Abatutsi, hari abakiyihakana bagakwirakwiza n’ingengabitekerezo yayo bifashishije ikoranabuhanga nk’imbuga nkoranyambaga.

Dr Gasanabo yasabye abitabiriye umusanzu mu kurwanya abo bantu mu buryo bwose bushoboka.

Umuyobozi Uhagarariye Umuryango w’Abibumbye mu Bwami bwa Maroc Madamu Sylvia Lopez-Ekra, yagarutse ku kuba Jenoside yakorewe abatutsi mu 1994 ari cyo cyaha cy’indengakamere cyabayeho mu kinyejana cya 20 ndetse agaruka ku bubi bwa Jenoside. Yamaganye ikintu cyose cyatuma hongera kubaho ibikorwa byageza kuri Jenoside.

Perezida w’Inteko Ishinga Amategeko ya Maroc, Habik El Malki, yavuze ko Ubwami bwa Maroc bwifatanyije n’u Rwanda muri ibi bihe bikomeye byo kwibuka Jenoside yakorewe abatutsi mu 1994. Yavuze ko asobanukiwe neza n’icyo ibi bisobanuyo kuko yabashije gusura urwibutso rwaJenoside mu Rwanda akirebera ibyabaye.

Yavuze ku bubi bw’icyaha cya jenoside, ndetse ashima byimazeyo ubuyobozi bwiza bw’ u Rwanda burangajwe imbere na Perezida Paul Kagame wafashije abanyarwanda kwiyunga no kwiyubaka.

Yongeye kandi kwibutsa umubano ukomeye uri hagati y’u Rwanda n’Ubwami bwa Maroc ushingiye ku mubano w’urugero rw’ abakuru b’ibihugu byombi bahuje icyerekezo mu iterambere ry’ibihugu ndetse na Afurika.

Habik El Malki yavuze ko u Rwanda nyuma y’akaga rwagize ka Jenoside yakorewe Abatutsi, ubu ari icyitegererezo ku mugabane wose. Yibukije ko ariho mu mwaka 2018, hasinyiwe amasezererano ya Afurika yorohereza ubucuruzi ku bihugu by’umugabane (AfCTA), avuga ko byose byari birangajwe imbere na Perezida Paul Kagame.

Umunyarwanda uba muri Maroc akaba yararokotse Jenoside yakorewe Abatutsi, Jean Claude Gashumba, yatanze ubuhamya bw’ibyamubayeho we n’umuryango we muri Jenoside, aho yasigaye wenyine na mushiki we mu muryango wari urimo abana 13.

Yavuze ko yabuze ababyeyi n’abavandimwe bazira ko ari abatutsi nta kindi cyaha bakoze, ashimira ingabo za FPR zabashije kumurokora.

Gashumba yasabye abitabiriye uwo muhango ko bakwiriye gukora ibishoboka byose bakageza ubutumwa mu bihugu byabo n’ahandi bashobora kugeza ijwi ku isi yose, bakamagana Jenoside, baharanira ko itazongera kubaho ukundi kandi bagakurikirana abagize uruhare muri jenoside yakorewe abatutsi mu 1994 mu Rwanda kugira ngo abarokotse babone ubutabera binabafashe kurushaho kwiyubaka ndetse no kugera ku bumwe n’ubwiyunge buhamye.

Abanyarwanda biganjemo abanyeshuri baba mu bwami bwa Maroc batanze ubutumwa bw’icyizere bukubiyemo imbaraga zabo ku heza h’u Rwanda.

Mu bindi bikorwa byaranze uyu munsi wo kwibuka ku nshuro ya 27 Jenoside yakorewe abatutsi mu 1994 mu Rwanda wabereye mu Bwami bwa Maroc, Ambassade yatanze igitabo kigaragaza itegurwa n’ishyirwa mu bikorwa rya Jenoside yakorewe abatusi mu 1994 cyanditswe na Komisiyo y’igihugu ishinzwe kurwanya Jenoside (CNLG).

Hagaragajwe kandi icyegeranyo kigaragaza uko u Rwanda rwiyubatse nyuma ya Jenoside yakorewe abatutsi n’iterambere ryagezweho, ndetse n’icyizere gikomeye cy’ejo hasaza h’u Rwanda n’abanyarwanda.

Umunsi wasojwe n’igikorwa cyo gucana urumuri rw’icyizere n’abatumirwa b’imena, ruherezwa urubyiruko rw’abanyarwanda baba muri Maroc.

Ambasaderi Zaina Nyiramatama yasabye uruhare rw'amahanga mu gufata no kuburanisha abagize uruhare muri Jenoside yakorewe Abatutsi
Perezida w’Inteko Ishinga Amategeko ya Maroc Habik El Malki, yavuze ko Ubwami bwa Maroc bwifatanyije n’u Rwanda muri ibi bihe bikomeye byo kwibuka Jenoside yakorewe abatutsi mu 1994
Umuyobozi Uhagarariye Umuryango w’Abibumbye mu Bwami bwa Maroc Madamu Sylvia Lopez-Ekra, yagarutse ku kuba Jenoside yakorewe abatutsi mu 1994 ari cyo cyaha cy’indengakamere cyabayeho mu kinyejana cya 20 ndetse agaruka ku bubi bwa Jenoside
Uyu muhango witabiriwe n'abantu batandukanye
Hacanywe urumuri rw'icyizere mu kwerekana icyerecyezo cy'u Rwanda rushya nyuma ya Jenoside yakorewe Abatutsi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .