00:00:00 IGIHE NETWORK KN KINYARWANDA EN ENGLISH FR FRANCAIS

Amb. Uwihanganye yasabye imbaraga mu kurwanya abapfobya Jenoside bagamije guhunga uruhare bayigizemo

Yanditswe na IGIHE
Kuya 22 April 2022 saa 08:08
Yasuwe :

Ambasaderi w’u Rwanda muri Singapore, Uwihanganye Jean De Dieu, yavuze ko urugamba rwo kurwanya abahakana n’abapfobya Jenoside yakorewe Abatutsi mu 1994, ari urwa buri wese kandi rukwiye gutsindwa.

Ni ubutumwa yahaye Abanyarwanda n’inshuti zabo mu gikorwa cyo Kwibuka ku nshuro ya 28 Jenoside yakorewe Abatutsi cyabereye mu Mujyi wa Melbourne muri Australia.

Ambasaderi Uwihanganye yibukije abacyitabiriye ko ari umwanya mwiza wo kuzirikana inzirakarengane za Jenoside yakorewe Abatutsi.

Yongeyeho ko nubwo Abanyarwanda n’inshuti zabo bafata uyu mwanya wo kwibuka ariko hari n’abakomeza gutiza umurindi ibikorwa byo gupfobya no guhakana Jenoside.

Yagize ati “Hari abandi kubera ipfunwe ry’uruhare bayigizemo cyangwa iry’uko bafite aho bahuriye n’ababigizemo uruhare, bashishikajwe no guhakana Jenoside bagamije kuyobya amateka mu nyungu zabo.’’

Ambasaderi Uwihanganye yavuze ko kurwanya abahakana Jenoside bisaba uruhare rwa buri wese.

Yashimangiye ko ari “urugamba tugomba kurwana kandi tukarutsinda.’’

Iki gikorwa cyo kwibuka cyabereye muri Hotel BrayBrook i Melbourne mu Ntara ya Victoria muri Australia, ku wa 7 Mata 2022, ubwo hatangizwaga Icyumweru cy’Icyunamo n’Iminsi 100 yo Kwibuka Jenoside yakorewe Abatutsi.

Cyitabiriwe n’abarenga 100 barimo Abanyarwanda n’inshuti zabo ndetse n’abanyacyubahiro barimo Ambasaderi w’u Rwanda muri icyo gihugu, Uwihanganye Jean De Dieu; Uhagarariye Ibiro bishinzwe Inyungu z’u Rwanda muri Melbourne (Consulate General), Micheal Roux na Elly Brooks uri mu bagize Inama y’Ubutetetsi y’Ingoro Ndangamateka kuri Jenoside yakorewe Abayahudi [Holocaust Museum], .

Basangijwe amateka yagejeje u Rwanda kuri Jenoside yakorewe Abatutsi n’uko igihugu cyayigobotoye kikongera kwiyubaka.

Umuhoza Frida wanditse igitabo "Chosen to die, Destined to live" yatanze ubuhamya bw’inzira y’umusaraba yanyuzemo muri Jenoside aho yarokotse wenyine mu muryango we wose akaba yarakuwe mu cyobo cyiciwemo uwo muryango we.

Yasoje agaragaza ko nyuma yo kongera kubakwamo icyizere, ubu yashoboye kudaheranwa n’agahinda.

Umuyobozi w’Abanyarwanda batuye mu Ntara ya Victoria, Umutoni Delphine, yashimiye abifatanyije na bo mu kwibuka Jenoside yakorewe Abatutsi kuko ari umwanya mwiza wo gukomeza kwibukiranya ububi bwayo ngo itazasubira ukundi.

Ambasaderi Uwihanganye yavuze ko kurwanya abahakana Jenoside bisaba uruhare rwa buri wese kugira ngo bigerweho
Ambasaderi Uwihanganye yavuze ko kwibuka ari umwanya mwiza wo kuzirikana inzirakarengane za Jenoside yakorewe Abatutsi
Iki gikorwa cyitabiriwe n'abantu b'ingeri zitandukanye
Abitabiriye iki gikorwa basobanuriwe amateka ya Jenoside yakorewe Abatutsi mu 1994, uko umugambi wayo wacuzwe n'uko washyizwe mu bikorwa
Ambasaderi w’u Rwanda muri Singapore, Uwihanganye Jean De Dieu, yabwiye Abanyarwanda baba muri Australia ko bakwiye gufata iya mbere mu gushyigikira urugamba rwo kurwanya abahakana n’abapfobya Jenoside yakorewe Abatutsi mu 1994
Abakiri bato na bo bahawe umwanya muri iki gikorwa cyo kwibuka

 Abanyarwanda bo muri Perth na bo bibutse Jenoside yakorewe Abatutsi

Abanyarwanda batuye mu Ntara ya Western Australia ku wa 10 Mata 2022, ni bwo bahuriye mu gikorwa cyo kwibuka Jenoside.

Cyitabiriwe n’abagera kuri 300 barimo 150 bari mu cyumba cyabereyemo n’abandi bakoresheje ikoranabuhanga bari mu bice bitandukanye by’Isi.

Mugema Innocent yatanze ubuhamya bw’ubuzima yabayemo muri Jenoside aho yari atuye mu Karere ka Nyanza. Yasabye buri wese gutanga umusanzu we mu guharanira ko Jenoside itazongera kuba ukundi.

Ambasaderi Jean De Dieu yashimye abitabiriye icyo gikorwa abibutsa ko kwibuka ari ngombwa kuko bifasha guha icyubahiro abazize Jenoside yakorewe Abatutsi.

Ati “Ni n’ingenzi kunamira abasize ubuzima bwabo ku rugamba rwo kuyihagarika ari bo dukesha amahoro u Rwanda rufite uyu munsi.’’

Yavuze ko hari icyizere ko Jenoside itazongera kubaho mu Rwanda kuko ubuyobozi bw’u Rwanda bwashyize imbaraga mu kubaka ubumwe bw’Abanyarwanda kandi bamaze gusobanukirwa ububi bwa Jenoside ku buryo badashobora gutega amatwi uwashaka kubasubiza mu macakubiri.

Umuyobozi wungirije w’Abanyarwanda batuye muri Perth, Mutamuriza Rosemine, yashimye abitabiriye icyo gikorwa, avuga ko gitegurwa buri mwaka kugira ngo abana bavutse nyuma ya Jenoside, abari bakiri bato ubwo yakorwaga ndetse n’abanyamahanga barusheho gusobanukirwa amateka yayo.

Ni igikorwa cyahuriyemo abantu b'ingeri zitandukanye
Ambasaderi Uwihanganye Jean de Dieu acana urumuri rw'icyizere
Abo mu Mujyi wa Perth bashimiwe uruhare rwabo mu bikorwa byo kwibuka
Hacanwe urumuri rw'icyizere cy'ahazaza h'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .