Amb. Habimana Saleh yasabye Abanyarwanda biga muri Maroc kubyaza umusaruro amahirwe bafite

Yanditswe na
Kuya 21 Ukuboza 2019 saa 11:06
Yasuwe :
0 0

Ambasaderi w’u Rwanda mu Bwami bwa Maroc, Sheikh Habimana Saleh, yasabye Abanyarwanda biga muri icyo gihugu kubyaza umusaruro amahirwe yose bafite, abasezeranya ko igihugu cyabo kibari hafi kandi kizakomeza kubafasha.

Ni ikiganiro yagiranye nabo ku mugoroba wo ku wa Kane tariki 19 Ukuboza 2019, cyitabirwa n’abiganjemo abanyeshuri biga mu murwa mukuru Rabat. Ni ikiganiro cyabaye ingirakamaro, gihurirana n’uko Abanyarwanda bari bakoraniye mu nama y’igihugu y’umushyikirano, bungurana ibitekerezo ku iterambere ry’igihugu cyabo.

Amb Habimana yabahaye impanuro zitandukanye, anabasezeranya ko nubwo biga kure y’igihugu cyabo batari bonyine.

Yibanze ku kubaganiriza ku mateka y’u Rwanda, ababwira imibereho y’Abanyarwanda bo hambere kugeza ku mahano ya Jenoside yakorewe Abatutsi mu 1994, ariko abibutsa ko amateka mabi u Rwanda rwanyuzemo yarangiye.

Yagarutse kuri gahunda ya Ndi Umunyarwanda, ashimangira ko igamije gukumira no kurwanya amacakubiri aho ava akagera. Amb. Habimana yabagaragarije ko bagomba guharanira kuba umwe, bikabafasha kugera ku zindi ntego zikomeye zo kwiteza imbere no guteza imbere igihugu.

Yabibukije inshingano zabo nk’Abanyarwanda

Mu gice cya kabiri cy’icyo kiganiro, Amb Habimana yibanze ku ruhare rwabo nk’Abanyarwanda baba muri Maroc, abashishikariza kubyaza umusaruro amahirwe bafite yo kwiga muri iki gihugu.

Yabakanguriye kwirinda ibishuko byabayobya, ahubwo ko bakwiriye gukomeza kugendera ku ndangaciro n’umuco nyarwanda, bikabafasha gukora cyane mu masomo yabo no mu bindi bakora.

Yahise abagenera ishimwe rizajya rihabwa buri mwaka umunyeshuli uzajya ahiga abandi mu byo yiga.

Yabasabye kandi gushyira ingufu mu gufatikanya amasomo yabo n’umuhate wo kumenya indimi, anabakangurira kwita cyane Icyarabu gikoreshwa muri Maroc, cyane ko u Rwanda rurimo kwagura umubano n’ibindi bihugu by’abarabu.

Ni ikiganiro Abanyarwanda baba muri Maroc bishimiye, ndetse bashimangira ko bazakomeza kuzirikana inshingano zabo, bakaba indashyikirwa mu byo bakora.

Amb Habimana aramutsa umwe mu bitabiriye iyo nama
Amb Habimana Saleh mu kiganiro cyitabiriwe n'abiga muri Maroc kimwe n'abanyarwanda bari muri icyo gihugu
Wabaye umwanya w'ingirakamaro ku banyeshuri
Wabaye umwanya wo kungurana ibitekerezo
Amb Habimana mu ifoto y'urwibutso n'abitabiriye iyi nama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .