Abashoramari bo mu Bubiligi bagiye kubaka inzu 1000 ziciriritse mu Rwanda

Yanditswe na Karirima A. Ngarambe
Kuya 1 Ukwakira 2019 saa 03:52
Yasuwe :
0 0

Abashoramari batandukanye bagiye kubaka inzu ziciriritse mu Rwanda binyuze mu mushinga bise Soteko, uzatangira mu mwaka utaha, ku buryo aba mbere bazaba babonye inzu zo guturamo zigezweho bitarenze umwaka wa 2021.

Uyu mushinga wamurikiwe Ambasaderi w’u Rwanda mu Bubiligi, Rugira Amandin, mu minsi ishize. Itsinda rizawukora rivuga ko ryahisemo u Rwanda kubera ko ari igihugu gitekanye kandi gikomeje kugaragaza ibikorwa by’iterambere muri Afurika no ku Isi muri rusange.

Uyu mushinga ugizwe n’abasore n’inkumi baturuka mu bihugu bitandukanye barimwo Joël Buleli ufite ubwenegihugu bw’u Bubiligi ukomoka muri RDC ari nawe uyobora itsinda, Roxana Dela Fiamor wo muri Iran ufite inkomoko no muri Togo, Ntiberamunda Philibert de Viron, Umubiligi ufite inkomoko mu Rwanda, n’abandi bafatanya bava mu Butaliyani no mu Bubiligi.

Umuyobozi wa Soteko , Joel Buleli, yabwiye IGIHE ko bahisemo gutangirira umushinga wabo mu Rwanda, kuko bitakiri ibanga, ntawe utifuza gushora imari muri iki gihugu kubera urwego kigezeho.

Soteko izakoresha uburyo bushya bujyanye n’imyubakire kandi mishya muri Afurika, igamije gutanga ibisubizo birambye mu iyubaka ry’inzu zijyanye n’igihe. Inzu zizubakwa zizaba zifite uburyo bufasha umuntu gukurikirnna ibikorerwa mu nzu ye yibereye ahandi aho ariho hose ku Isi, bigakorwa amasaha 24 kuri 24 bitabangamiye indi mirimo, n’icyangiritse akamenya uko ubikemura hakiri kare.

Buleli yakomeje ati "Ni umushinga kandi uzatanga ahokorerwa ibijyanye na serivisi zijyanye n’ahaturwa, inzu zihahirwamo amafunguro, ibiro n’ibindi bijyanye n’umujyi ugezweho. Ku ikubitiro hazaba hegereye inzira zigana ku kibuga kindege n’Umujyi rwagati wa kigali, inzu zikorerwamo ibijyanye n’umuco nka za sinema, inzu zikorerwamo ibiganiro mbwirwaruhame, inzu ndangamuzo n’ibindi."

Yavuze ko mu kubaka izi nzu hazibandwa ku bikoresho bikorerwa mu Rwanda kandi bikorwe n’Abanyarwanda n’ibindi bigo byo mu gihugu, ku buryo bizatanga akazi. Mu kurimbisha izi nyubako hazifashishwa Imigongo kuko itanga isura nziza y’igihugu.

Buleli yakomeje ati "Icyibandwaho cya mbere ni uko ibi bikorwa bya Soteko bigomba kugira ibiciro biciriritse, kandi mu buryo bw’amasezerano aciye mu mucyo kandi yizewe. Igice cya mbere kikazatangira muri Kanama 2020. Inyubako zigera ku ijana zizaba zimaze kuzura muri icyo gice cya mbere. Ibi bikazafasha gutangira gutuzwamo muri Nyakanga 2021."

Joel Buleli yavuze ko bamaze kugira amasezerano ku kigero cya 20 % ku nzu zizaturwamo mu Rwanda. Itsinda Soteko rizwi mu rugaga rwikiswe ‘Hub Africa’ rimaze kuba urugero ku bigo 34 byo ku Isi.

Soteko kandi ni bamwe mu bashoramari bazaba bari muri Rwanda Day izabera mu Mujyi wa Bonn ku wa 5 Ukwakira 2019.

Abagize Soteko basobanura uko umushinga wabo uzaba uteye
Abantu beretswe uko bagera kuri serivisi za Soteko mu ikoranabuhanga
Abantu benshi basinye amasezerano yo gutunga inzu muri uyu mushinga
Ubwo abagize Soteko bajyaga kureba Amb. Rugira Amandin ngo bamusobanurire umushinga bajyanye mu Rwanda
Izi nzu zizubakwa mu Mujyi wa Kigali zizaba zikorerwamo ibintu binyuranye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza