00:00:00 IGIHE NETWORK KN KINYARWANDA EN ENGLISH FR FRANCAIS

Abanyarwanda baba muri UAE, Arabie Saoudite na Bahrain bahuriye ku gikorwa cyo Kwibuka

Yanditswe na IGIHE
Kuya 29 June 2022 saa 09:30
Yasuwe :

Umuryango w’Abanyarwanda baba muri Leta zunze Ubumwe z’Abarabu (UAE), Ubwami bwa Arabie Saoudite n’Ubwami bwa Bahrain bahuriye mu gikorwa cya Kwibuka ku nshuro ya 28 Jenoside yakorewe Abatutsi, cyabereye i Abu Dhabi.

Ni igikorwa cyabaye ku wa 26 Kamena 2022, hagamijwe guha agaciro Abatutsi basaga miliyoni imwe bishwe mu minsi ijana gusa.

Ni umuhango kandi witabiriwe n’abayobozi batandukanye ndetse n’inshuti z’u Rwanda. Watazwemo ubutumwa bugaruka ku bihe bikomeye u Rwanda rwaciyemo, n’intambwe zimaze guterwa mu kwiyubaka.

Ambasaderi w’u Rwanda muri UAE, Emmanuel Hategeka, yagize ati "Kongera kwiyubaka k’u Rwanda nyuma ya 1994 ni umusaruro wo kubabarira, ukudaheranwa kw’abaturage n’ubuyobozi bureba kure. Twarageragejwe, tugera aho tuba igihugu cyananiwe, ducikamo ibice, ariko twanze guheranwa nabyo, tubivanamo amasomo akomeye."

Yibukije ko abasore n’inkumi bahagaritse Jenoside batanze umusanzu ukomeye wo kubaka u Rwanda rushya rurangajwe imbere na Perezida Paul Kagame, ku buryo inshingano zikomeye ziri imbere ziri mu maboko y’urubyiruko.

Yakomeje ati "U Rwanda rwimakaje urugendo rushya rw’imyaka 30 rujyanye n’icyerekezo 2050 rwo kubaka ubuzima buteye imbere kandi buhesheje ishema abaturage bose. Urubyiruko rwacu uyu munsi rufite inshingano, kandi turasaba mwese urubyiruko kuzirikana indangagaciro nyarwanda z’ubudaheranwa, gukunda igihugu, umurava no kwihesha agaciro, kugira ngo mukomeze guhesha ishema u Rwanda aho muri hose."

Umuyobozi muri Minisiteri y’Ububanyi n’amahanga ya UAE Ushinzwe Afurika, Khalid Al-Rashidi, yavuze ko Guverinoma y’iki gihugu yifatanyije n’u Rwanda muri ubi bihe.

Yagize ati "Nifatanyije namwe kuri uyu munsi mu guha icyubahiro no kwibuka abazize Jenoside yakorewe Abatutsi, ndetse tunifatanya n’abayirokotse baburiye inshuti zabo n’imiryango muri Jeoside. Twifatanyije n’Abanyarwanda mu kwibuka ibihe bikomeye banyuzemo mu mateka yabo."

Umushakashatsi akaba n’Umwalimu muri Zayed Military University, Dr. Francis Gaudreault, wavuze nk’inshuti y’u Rwanda, yashimangiye ko intwambwe u Rwanda rwabashije gutera rwazishobojwe n’ubudaheranwa bw’abaturage barwo, ndetse n’ubuyobozi bwiza rufite.

Yakomeje ati "Ubudaheranwa bw’u Rwanda ni kintu gitangaje. Iyo tuvuze igihugu ubwacyo, icyo bita ibitangaza by’u Rwanda, nk’uko tuvuga ibitangaza byo muri Aziya y’Iburasirazuba, kubasha guteza imbere igihugu gutya, ni ibihugu bingahe byateye intambwe nl’iyi nyuma y’ibizazane nka biriya? Ntekereza ko dukwiye kuvuga ku baturage b’u Rwanda, imiyoborere y’u Rwanda n’ubuyobozi rufite bitangaje."

Iki gikorwa cyo Kwibuka28 muri UAE kandi cyaranzwe n’ubutumwa bw’icyizere bw’urubyiruko n’ubuhamya bwa Pauline Kayitare Mukayiranga warokotse Jenoside yakorewe Abatutsi, wabaga i Karongi mu 1994, icyo gihe hari ku Kibuye.

Biteganywa ko ibikorwa byo kwibuka birimo kuba ku nsanganyamatsiko yo "Kwibuka Twiyubaka" byatangiye ku wa 7 Mata 2022, bizasozwa nyuma y’iminsi 100 – ishushanya iyo jenoside yamaze – kugeza ku wa 4 Nyakanga.

Abitabiriye iki gikorwa bafashe umwanya wo Kwibuka abazize Jenoside
Urubyiruko rwatanze ubutumwa bw'icyizere nyuma y'ibihe u Rwanda rwaciyemo
Ambasaderi Hategeka acana urumuri rw'Icyizere muri uyu muhango wo Kwibuka
Ambasaderi Hategeka yashimye ukudaheranwa kw’Abanyarwanda kwatumye bivana mu bibazo bya Jenoside
Umuyobozi muri Minisiteri y’Ububanyi n’amahanga ya UAE Ushinzwe Afurika, Khalid Al-Rashidi, ageza ijambo ku bitabiriye iki gikorwa
Pauline Kayitare Mukayiranga ageza ubuhamya bwe ku bitabiriye iki gikorwa
Uyu muhango witabiriwe n'Abanyarwanda n'inshuti z'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .