Abanyarwanda baba muri Amerika batanze miliyoni zisaga 45 Frw zo gufasha abagizweho ingaruka na COVID-19

Yanditswe na IGIHE
Kuya 4 Kamena 2020 saa 09:05
Yasuwe :
0 0

Abanyarwanda baba muri Leta zunze Ubumwe za Amerika batanze ibihumbi 47.9 by’amadolari ya Amerika (asaga miliyoni 45 Frw), nk’umusanzu wabo mu guhangana n’ingaruka icyorezo cya Coronavirus gikomeye kugira ku baturarwanda.

Mu gukumira ko iki cyorezo cyarushaho gukwirakwira mu gihugu, Guverinoma y’u Rwanda yafashe ingamba zirimo gufunga ibikorwa bitandukanye, ingendo zitari ngombwa zirahagarikwa, bigira ingaruka ku bantu benshi cyane cyane abaryaga ari uko uwo munsi bakoze. Guverinoma yahise itangira kugoboka bene abo bantu.

Ubu imirimo myinshi imaze gusubukurwa, iheruka ni ingendo z’abamotari nubwo zigifunzwe mu turere twa Rusizi na Rubavu.

Umuvugizi wa Diaspora nyarwanda muri Amerika akaba na Visi Perezida w’Umuryango w’Abanyarwanda baba muri uwo mugabane, Emmanuel Muvunyi, yavuze ko bashimira Perezida Paul Kagame ku mbaraga n’ibyiza akomeje kugeza ku gihugu, harimo n’ingamba zo kurinda ubuzima bw’abaturarwanda mu kurwanya ikwirakwira ry’icyorezo cya COVID-19.

Yavuze ko bijyanye n’ingamba u Rwanda rwafashe, rwabaye icyitegererezo birenga na Afurika, mu gihe nko kuri Amerika, kubera uburangare no gutinda gushyiraho ingamba zo kwirinda ikwirakwiza rya Coronanavirus, iki cyorezo gikomeje guhitana imbaga y’abantu benshi.

Yakomeje ati “Natwe nk’abanyarwanda batuye muri Amerika mu mpanuro nyakubahwa Perezida wa Repubulika adahwema kutugezaho, abatuye muri diaspora ni uko aho duherereye twaje guhaha ubwenge, ubumenyi no gushaka imibereho, dusabwa gusubiza amaso inyuma tukibuka n’aho dukomoka n’imiryango twasize inyuma, kutibagirwa igihugu cyatubyaye, kuko ni cyo cyatugize abo turi bo.”

Ni muri urwo rwego bishyize hamwe bakusanya inkunga yo gufasha abaturarwanda babikeneye, kubera ingaruka za Coronavirus.

Yakomeje ati “Abanyarwanda batuye ku mugabane wa Amerika bazakomeza gushyigikira gahunda za Leta ziteza imbere imibereho yabaturarwanda ndetse n’igihugu muri rusange.”

Mu ibaruwa bandikiwe n’Umunyamabaga wa Leta muri Minisiteri y’Imari n’Igenamigambi ushinzwe Imari ya Leta, Richard Tusabe, ku wa 29 Gicurasi 2020, Guverinoma y’u Rwanda yashimiye aba banyarwanda ku musanzu batanze.

Yakomeje ati “Mu izina rya Guverinoma y’u Rwanda, ndifuza kubashimira nabamenyesha ko twakiriye umusanzu wanyu ungana na USD 47.918,04, mu guhangana n’ingaruka zirimo guterwa n’icyorezo cya COVID-19 binyuze mu bikorwa byo kwita ku mibereho y’abaturage.”

Iki cyorezo cyageze mu Rwanda muri Werurwe, kugeza ubu abamaze kwandura ni 397, mu gihe abantu babiri bamaze guhitanwa n’iyi ndwara.

Umuvugizi wa Diaspora nyarwanda muri Amerika akaba na Visi Perezida w’Umuryango w’Abanyarwanda baba muri uwo mugabane, Emmanuel Muvunyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .