USA: Minisitiri Shyaka yasabye abanyarwanda baba mu mahanga gukomeza kuba umwe

Yanditswe na IGIHE
Kuya 12 Gashyantare 2020 saa 09:13
Yasuwe :
0 0

Minisitiri w’Ubutegetsi bw’Igihugu, Prof Anastase Shyaka, yasabye abanyarwanda baba mu mahanga gukomeza kuba umwe no guhorana u Rwanda ku mutima mu byo bakora byose.

Yabitangaje tariki 8 Gashyantare muri Leta ya Maryland, muri Leta Zunze Ubumwe za Amerika mu muhango ngarukamwaka wo gusengera u Rwanda uzwi nka Annual Rwanda Prayer Banquet wabereye muri Sheraton Hotel.

Ni ku nshuro ya 18 abanyarwanda baba mu mahanga, inshuti z’u Rwanda bavuye mu bice bitandukanye bya Amerika birimo Washington DC, Maryland na Virginia n’ahandi, bahura bagashimira Imana ibyo yagejeje kuri bo n’igihugu cyabo, no kuyiragiza umwaka mushya.

Mu myaka 18 ishize, intego y’uyu muhango wo gusengera u Rwanda iracyari ukuragiza Imana u Rwanda, gusengera abayobozi barwo, abaturage barwo, guteza imbere ubumwe, kwizera n’urukundo.

Minisitiri Anastase Shyaka wari umushyitsi mukuru, yasobanuriye abari aho indangangaciro zigaragaraza umuyobozi mwiza kandi ukomeye, aboneraho umwanya wo gusaba abanyarwanda bari mu mahanga gukomeza kunga ubumwe no kuzirikana u Rwanda mu byo bakora byose.

Perezida wa Rwanda Prayer Banquet, Antoinette Kanyabutembo, yashimiye abitabiriye iryo sengesho rigamije kuragiza Imana u Rwanda, abasaba gusengera amezi make asigaye ngo icyerecyezo igihugu cyari cyarihaye cya 2020 kirangire no kuyiragiza icyerecyezo gishya 2050.

Umushoramari Dale Dawson uri no mu bajyanama ba Perezida Paul Kagame, yahishuye uburyo bwa mbere aza mu Rwanda yabitewe na Musenyeri John Rucyahana, yahagera akumva ahamagariwe gufasha abanyarwanda.

Yahise ashinga umuryango Bridge2Rwanda ufasha abanyeshuri b’abanyarwanda b’abahanga kubona uburezi mpuzamahanga no gukurura abashoramari kuza gushora imari yabo mu Rwanda. Guhera mu 2002, Dawson na Bridge2Rwanda bagize uruhare mu gutangiza no guteza imbere ubucuruzi butandukanye n’indi mishinga igamije guteza imbere abaturage.

Umuyobozi wungirije wa Kaminuza y’u Rwanda ushinzwe iterambere, Dr Charles Muligande yagarutse ku rugendo rwe ubwo yagarukaga mu Rwanda mu 1994 avuye i Washington DC , avuga ku ngorane igihugu cyahuye nazo n’uburyo cyongeye kwiyubaka . Muligande kandi yavuze ko kwizera n’agakiza aribyo byagiye bimuyobora mu mirimo yose yagiye ashingwa.

Ambasaderi w’u Rwanda muri Leta Zunze Ubumwe za Amerika, Mathilde Mukantabana yasabye umwanya wo gusengera abayobozi ba diaspora nyarwanda, abateguye ayo masengesho n’abandi kugira ngo babashe gusohoza inshingano bahawe.

Uyu mwaka insanganyamatsiko y’umuhango wo gusengera u Rwanda yari ijambo riboneka muri Zaburi igice cya 100:5 rivuga riti “Kuko Uwiteka ari mwiza, Imbabazi ze zihoraho iteka ryose, Umurava we uhoraho ibihe byose.”

Ambasaderi Mukantabana (ibumoso), Minisitiri Shyaka n'umushoramari Dale Dawson
Abanyarwanda baba mu mahanga basabwe gukomeza kuba umwe
Aya masengesho yabaye umwanya wo kuragiza Imana icyerecyezo 2050 u Rwanda rwatangiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza