00:00:00 IGIHE NETWORK KN KINYARWANDA EN ENGLISH FR FRANCAIS

Cynthia Urusaro na bagenzi be bijeje ko urubyiruko rutazatezuka ku gusigasira amateka ya Jenoside yakorewe Abatutsi

Yanditswe na Karirima A. Ngarambe
Kuya 30 Mata 2021 saa 10:26
Yasuwe :
0 0

Urubyiruko nyarwanda ruba mu Busuwisi rwijeje Abanyarwanda by’umwihariko abarokotse Jenoside yakorewe Abatutsi ko abakiri bato bazakomeza gusigasira amateka ya Jenoside, barwanya uwo ari we wese washaka kuyagoreka.

Cynthia Urusaro Imhof ni umwe mu rubyiruko ruherutse guhurira mu kiganiro cyateguwe na Ibuka-Mémoire & Justice -Suisse cyahawe inyito igira iti ‘ Mémoire et Jeunesse’ cyangwa se ‘Kwibuka mu Rubyiruko’.

Urundi rubyiruko rwatanze ikigananiro harimo Sarah Burckhaedt, ari na we wayoboye ikiganiro, Dany Nkurunziza, Larissa Igihozo, Migabo Gahigi na Cynthia Urusaro Imhof.

Mu gutangiza ibi biganiro, Murangira César uyobora Ibuka-Mémoire & Justice – Suisse yavuze ko bateguye ibyo biganiro bagamije guha urubuga abakiri bato kugira ngo baganire kuri Jenoside yakorewe Abatutsi, bamenye amateka y’igihugu.

Ati “Ni uguha urubuga n’ijambo urubyiruko rudukomokaho ngo twumve kandi baganire uko bashobora kwivugira amateka ya Jenoside yakorewe Abatutsi, bikaba ari bimwe mu byo twiyemeje mu mishinga yacu.”

Urusaro nyuma y’ibiganiro, yabwiye IGIHE ko urubyiruko nta yandi mahitamo rufite atari ugusigasira amateka igihugu cyanyuzemo.

Ati “Ndemeza kandi ndahamya ko twe twavutse nyuma ya jenoside yakorewe Abatutsi, cyangwa abari abana bato cyane mu 1994, tumaze kugira ubumenyi n’ubushobozi bwo kusa cya kivi kandi nta yandi mahitamo dufite. Aya mateka ni ayacu n’abadukomokaho.”

Yavuze ko mu gihe abakuze barokotse Jenoside yakorewe Abatutsi bagenda basaza, ari umukoro ku rubyiruko kubakorera mu ngata bagakomeza kuvuga ukuri kw’amateka baciyemo.

Ati “Biratugaragarira ko tugomba kugira ubwira bwo gusigasira aya mateka hakiri kare nkuko byakozwe mu mushinga w’Abayahudi bise ‘Derniers’ cyangwa se ‘Abanyuma barokotse jenoside’, bavuga abacitse ku icumu rya Jenoside yakorewe Abayahudi barimo basaza.”

Yakomeje agira ati “ Turi ikiraro cy’abishwe n’abarokotse bakuze n’abo tuzabyara mu gusigasira aya mateka. Ntabwo tuzemera ko aya mateka twasigiwe nk’umurage aba nka paji yanditse mu gitabo gusa, oya ahubwo tuzahaguruka tuyavuge tube abatangabuhamya n’abavugizi babo, kuko turiho twashibutse n’abatarabashije kubaho bishwe bazira ko ari Abatutsi.”

Urusaro yavuze ko urubyiruko rw’u Rwanda ubu rufite amahirwe yo kugira ubuyobozi bwiza bwumva akamaro ko kubungabunga amateka ya Jenoside yakorewe Abatutsi.

Ati “Mutwizere ntituzabatenguha mu kwibuka no guharanira ubusugire bw’aya mateka yiciwemo abacu mu buryo bw’ubugome ndengakamere, ariko abayarokotse ni abahamya bakomeye bo guha umwanya wo gutegwa amatwi.”

Dany Nkurunziza ari mu rubyiruko rwatanze ubuhamya, wavuze uburyo afite imyaka 17 yagiye mu gikorwa cyo kwibuka cyari cyateguwe na Ibuka- Suisse, bigatuma mu 2010 ajyana n’ababyeyi be mu Rwanda. Ubwo yari mu Rwanda basuye urwibutso rwa Jenoside muri Karongi (Kibuye), asangayo amazina ye ku rwibutso, ababyeyi bamubwira ko ari aya sekuru wishwe muri Jenoside bitiranwaga.

Nkurunziza yavuze ko yahavanye imbaraga zo guhashya uwo ari we wese ushaka guhakana Jenoside yakorewe Abatutsi.

Ati “ Iyo numvise abahakana n’abapfobya nsanga dufite byinshi byo gukora.”

Migabo Gahigi ufite imyaka 32, Jenoside yabaye afite imyaka itandatu. Yavuze ko kubera ko yari akiri muto, Jenoside itegurwa inashyirwa mu bikorwa atabashaga kumenya ibyari biri kuba. Amaze gukura nibwo yatangiye kugira amatsiko yo kumenya byinshi kuri Jenoside yakorewe Abatutsi, umuryango we ubimufashamo ari nabwo bagarukaga mu Rwanda i Bumbogo kumenya neza aho akomoka no gushaka imibiri y’abo mu muryango we bishwe muri Jenoside ngo ishyingurwe mu cyubahiro.

Kubera byinshi yabazwaga n’urungano ku ishuri, byatumye Mihigo aniyemeza gukora ubushakashatsi kuri Jenoside yakorewe Abatutsi.

Sarah Burckhaedt na we wavuze muri icyo kiganiro, yavuze ko atabashije kumenya amateka ya ba sekuru na nyirakuru, ba nyirasenge n’abandi bo mu muryango we bishwe muri Jenoside.

Mama we warokotse niwe wabashije kumubwira ayo mateka, bimufasha kumenya neza aho akomoka n’abo akomokaho.

Larissa Igihozo w’imyaka 22 ni umwe mu rubyiruko rwavutse nyuma ya Jenoside yakorewe Abatutsi. Bamwe bo mu muryango we bishwe muri Jenoside yakorewe Abatutsi barimo sekuru. Kugira ngo asobanukirwe amateka ya Jenoside, byasabye kujya mu Rwanda bimufasha gusobanukirwa byinshi atari azi.

Yagize ati “Sinibuka neza uko naje kumenya amateka y’ababyeyi banjye muri jenoside yakorewe Abatutsi, ndumva narabanaga nabyo kuva nkivuka, icyakora mfite imyaka 5 hari ibyo nibuka. Ndibuka ko hari indirimbo Papa yajyaga andirimbira, kugira ngo nsinzire kuko sinakundaga kuryama njyenyine, indirimbo nibuka bandirimbiraga ni “Ninda undirije umwana” bakambwira mu bibazo n’ababazaga ko Sogokuru yagiye mu ijuru n’aba masenge n’abandi. Ibyo byose nabigumanye mu mutwe ndabikurana nza kuzajya i Rwanda ngenda nsobanukirwa byinshi.”

Uru rubyiruko rwiyemeje gukomeza gusigasira amateka ya Jenoside yakorewe Abatutsi, rurwanya abashaka kuyagoreka cyangwa kuyahakana.

Larissa Igihozo w’imyaka 22 ni umwe mu rubyiruko rwavutse nyuma ya Jenoside yakorewe Abatutsi. Bamwe bo mu muryango we bishwe muri Jenoside yakorewe Abatutsi barimo sekuru. Kugira ngo asobanukirwe amateka ya Jenoside, byasabye kujya mu Rwanda bimufasha gusobanukirwa byinshi atari azi.
Nyuma yo kugera mu Rwanda akamenya neza amateka ya Jenoside yakorewe Abatutsi, Migabo Gahigi w'imyaka 32 yakozeho ubushakashatsi. Jenoside yabaye afite imyaka itandatu
Urugendo Dany Nkurunziza yagiriye mu Rwanda rwatumye asobanukirwa byinshi ku mateka ya Jenoside yakorewe Abatutsi n'uburyo abo mu muryango we bishwe
Sarah Burckhaedt ashimira mama we wamufashije kumenya neza amateka ya Jenoside yakorewe Abatutsi. Umuryango we urimo Sekuru na Nyirakuru, ba nyirasenge n’abandi barishwe muri Jenoside
Cynthia Urusaro Imhof w'imyaka 30 yavuze ko urubyiruko rufite umukoro wo gusigasira amateka ya Jenoside yakorewe Abatutsi no guhashya abayihakana
Rubayiza ni umwe mu babajije ibibazo
Murangira César uyobora Ibuka-Mémoire & Justice – Suisse yavuze ko bateguye ibyo biganiro bagamije guha urubuga abakiri bato kugira ngo baganire kuri Jenoside yakorewe Abatutsi
Ibi biganiro byitabiriwe n'urubyiruko rutandukanye ruba mu Busuwisi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .