Umuryango w’Abanyarwanda baba mu Bufaransa wizihije isabukuru y’imyaka 30 (Amafoto)

Yanditswe na Karirima A. Ngarambe
Kuya 8 Ukuboza 2020 saa 06:42
Yasuwe :
0 0

Umuryango w’Abanyarwanda baba mu Bufaransa (Communauté Rwandaise de France-CRF) wizihije isabukuru y’imyaka 30 umaze utangijwe, hashimirwa abawuyoboye mu myaka yo hambere.

Uyu muhango wabaye ku wa 5 Ukuboza 2020, wakozwe hifashishijwe ikoranabuhanga nk’uburyo bwo kwirinda ikwirakwira ry’icyorezo cya COVID-19 yibasiye Isi.

Mu butumwa bwawutangiwemo, Abanyarwanda batuye, bakorera cyangwa biga mu Bufaransa bibukijwe kurushaho kuzirikana igihugu cy’abakurambere babo ngo bakomeze umurongo mwiza wo kwagura u Rwanda mu bikorwa no ku izina.

CRF yatangijwe mu 1990, abayiyoboye bashimiwe umuhate wabaranze mu gihe cyabo, bubaka urufatiro rw’umuryango uteye ushema kandi uharanira iterambere ridaheza. Aba barimo Gatera Augustin wayiyoboye hagati ya 1990-1995, Twahirwa André (1995-2001), Ngaruye Ildephonse (2001-2005), Dafroza Gauthier (2005-2007), Muhongerwa Chantal (2OO7-2009), Viviane Peyre Mitilla (2009-2012), Vanessa Rupia (2012-2016) na Rugina Jean-Pierre (2016-2019). Kuri ubu uyu muryango uyobowe na Uwase Ingabire Angelique kuva ku wa 7 Ugushyingo 2019.

Ambasaderi w’u Rwanda mu Bufaransa, Ngarambe François Xavier, wari umushyitsi mukuru muri iki gikorwa yashimiye abagize uruhare mu kugitegura.

Ati ‘‘Ndashima cyane abateguye iki gikorwa, kuba Ambasaderi ni ukwegera Abanyarwanda no gushyigikira ibikorwa byabo bihora binejeje ariko kandi ni inshingano y’ibanze. Guhagarira u Rwanda ni uguhagararira Abanyarwanda, no kubakorera.’’

Yavuze ko umuco w’Abanyarwanda ukwiye guhora ubaranga aho bari hose ndetse n’ururimi rukabahuza.

Ati ‘‘Kuba Abanyarwanda nyakuri, bafite uruhare mu kubaka u Rwanda rusagambye ruteye imbere, mbere na mbere ni ukurangwa n’umuco wacu no kuvuga ururimi rwacu. Ntibikwiye gukomeza kubona Abanyarwanda bahujwe n’ururimi rw’amahanga.’’

‘‘Ndashima ko iyi sabukuru atari iyo kwibuka ibyakozwe gusa, ahubwo ibaye iyo kwiyemeza kubaka Ubunyarwanda, gukomera ku muco wacu no kuvuga ururimi rwacu.’’

Ngarambe yijeje ko ambasade izakomeza gushyigikira ibikorwa byose by’Abanyarwanda bo mu Bufaransa biyemeje gufatanya n’abandi kubaka u Rwanda.

Uwase Angelique uyobora Umuryango w’Abanyarwanda baba mu Bufaransa yashimiye abitabiriye uyu muhango usobanuye byinshi kuri bo.

Ati ‘‘Kuva tariki ya 30 Ukuboza 1990, abagabo n’abagore bari bafite igitekerezo kiganisha hamwe ‘Urukundo rwaho bakomoka mu Rwanda’, bagize ubutwari bwo kwishyira hamwe bashinga uyu muryango CRF twizihiza imyaka 30 umaze bawushyizeho. Ntibatekereza ibyiza barimo bakorera urubyiruko arirwo twebwe twasanze baraduharuriye umuhanda, ndetse n’abazadukomokaho bose.’’

CRF kuva yashingwa ni umuryango ugamije ubumwe bw’Abanyarwanda, kugira uruvugiro no gusangira ijambo n’ubusabane biciye mu ndangagaciro z’umuco gakondo.

Uwase avuga ko nubwo itangira ritari ryoroshye ariko hari byinshi byagezweho birimo guharurira inzira ubumwe bw’Abanyarwanda no gukunda igihugu.

Ati ‘‘Iyi myaka 30 igaragarira mu bikorwa byinshi twagezeho kandi byatanze umusaruro ugaragara kandi ushimishije. Dukeneye gukomeza gushyiramo imbaraga.’’

CRF izakomeza inzira yo kubana no gukorana n’abandi neza, himakazwa cyane guhererekanya indangagaciro ziranga Abanyarwanda.

Mu mishinga uyu muryango uteganya gushyiramo imbaraga harimo gukomeza guteza imbere umuco biciye mu bahanzi, amatorero n’abandi basusurutsa ibikorwa bitandukanye.

Mu butumwa yahaye abitabiriye Rwanda Day yabereye mu Mujyi wa Bonn mu Budage mu 2019, Perezida Paul Kagame yavuze ko igihugu kimeze nk’indege iri mu kirere aho gihuriramo n’umuyaga ushaka kuyihagarika n’undi uri inyuma uyisunika.

Uwase yavuze ko Abanyarwanda bo mu mahanga bameze nka wa muyaga usunika indege ngo yihute igana imbere.

Ati ‘‘None se namwe mwanyemerera tugafatanya uwo mukoro Umukuru w’Igihugu yaduhaye?’’

Uyu muyobozi yashimye ibikorwa byakozwe muri uyu mwaka nubwo hari COVID-19 ariko hakajijwe ingamba z’ubwirinzi ndetse hakusanywa inkunga ya miliyoni 6 Frw zahawe abagizweho ingaruka n’ingamba zafashwe mu kwirinda iki cyorezo mu Rwanda.

Ati ‘‘Ndashimira byimazeyo ikipe dufatanya kuyobora CRF uburyo badahwema kwitanga kandi twese turi abakorerabushake kubera urukundo rw’aho dukomoka.’’

Ibi birori byanatangiwemo ibiganiro bise ‘‘Notre Identité’’ cyangwa ‘‘Abo turi bo’’, cyatanzwe na Rwegera Damien wabaye Umwarimu muri Kaminuza y’ u Rwanda mu byo bita Anthropologie. Yatanze ikiganiro cyimbitse ku mateka y’u Rwanda kuva rwabaho kugeza uyu munsi.

Bamwe mu Banyarwanda barimo abakuru n’abato batanze ubuhamya bw’uko uyu muryango bawubayemo, akamaro kawo n’ibindi bituma bishimira kuwubamo.

Abitabiriye iki gikorwa basurukijwe n’abahanzi batandukanye barimo abo mu Bubiligi bitwa Ingangare, umukirigitananga Déo Munyakazi, Viela Imeninema na Troupe yo mu Bufaransa yitwa Mpore baririmbye ndetse banavuga imivugo itandukanye iganisha ku muco n’ukwiyubaka k’u Rwanda.

Uwase Angelique uyobora Umuryango w’Abanyarwanda baba mu Bufaransa yashimiye abitabiriye uyu muhango
Ambasaderi w’u Rwanda mu Bufaransa, Ngarambe François Xavier, ni we wari umushyitsi mukuru muri ibi birori
Viela Imeninema na we ari mu bahanzi batumiwe
Bagilishya Louis atanga ibitekerezo muri ibi birori
Umuryango w’Abanyarwanda baba mu Bufaransa wizihije isabukuru y’imyaka 30 umaze ushinzwe
Damien Rwegera wabaye umwarimu muri Kaminuza y’ u Rwanda mu byo bita Anthropologie yatanze ikiganiro cyiswe "Notre Identité"
Bamwe mu bagize Troupe Mpore yo mu Bufaransa
Umukirigitananga Déo Munyakazi ukora umuziki gakondo ari mu basusurukije abitabiriye ibi birori
Ingangare zo mu Bubiligi zasusurukije abitabiriye ibi birori

-  Abayobozi b’Umuryango w’Abanyarwanda baba mu Bufaransa

-  Ababaye abayobozi b’Umuryango w’Abanyarwanda baba mu Bufaransa kuva mu 1990 bashimiwe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .