Umunyarwanda uba mu Bwongereza yoroje abatishoboye, anishyurira mituweli abasaga 300

Yanditswe na Bukuru JC
Kuya 4 Ugushyingo 2019 saa 12:29
Yasuwe :
0 0

Umunyarwanda uba mu Bwongereza, Manzi Aloys yoroje ingurube abaturage bo mu Karere ka Rulindo anishyurira ubwisungane mu kwivuza abasaga 300 batishoboye agamije gufasha aho avuka gutera imbere.

Manzi uvuka mu Murenge wa Base mu Karere ka Rulindo, amaze imyaka isaga 20 mu Bwongereza. Binyuze mu Muryango yashinze witwa “Manzi Foundation” tariki ya 3 Ugushyingo 2019, yishyuriye ubwisungane mu kwivuza imiryango 109 igizwe n’abantu 348, naho imiryango 10 itishoboye ihabwa ingurube zo korora.

Umwe mu banyamuryango ba ‘Manzi Fondation’, Vumiliya Marie Jeanne, yavuze ko Abanyarwanda bari mu bihugu bitandukanye byo ku Isi, baba bakwiye gusubiza amaso inyuma bakagira umusanzu batanga aho bakomoka.

Ati “Umunyarwanda ukunda u Rwanda uri mu mahanga, aba akwiye gushaka ubuzima hariya ariko akibuka gutanga umusanzu aho akomoka kugira ngo igihugu cye gikomeze gitere imbere.”

Umunyamabanga Nshingwabikorwa w’Umurenge wa Base, Mwumvinezayimana Fiacre, yashimye ubufasha abaturage bahawe, gusa abibutsa ko bikwiriye kubatera imbaraga zo kwishakira ibisubizo ntibategereze guhora bafashwa.

Ati “Kwishyurirwa mituweli si ishema, ahubwo hari igihe aba ari uburangare, ugasanga umuntu ahora ategereje ko azishyurirwa kandi mu by’ukuri afite uburyo bwo kubona amafaranga. Inama duhora tugira abaturage nuko bajya mu matsinda bakajya bazigama amafaranga azabafasha kwiyishyurira kandi birashoboka.”

Nyirabizeiyimana Valentine, ni umwe mu bishyuriwe ubwisungane mu kwivuza.

Yagize ati “Iyi ni inshuro ya kabiri, umuryango wanjye ugizwe n’abantu batanu wishyurirwa ubwisungane mu kwivuza na ‘Manzi Foundation’ ubu nagiye mu itsinda natangiye kwizigamira ku buryo umwaka utaha nanjye nziyishyurira.”

Mu rwego rwo kurwanya ubukene mu gace avukamo, Manzi Aloys, akora ibikorwa bitandukanye bigamije gufasha abaturage kwifasha birimo kuboroza amatungo magufi, kwishyurira amashuri y’imyuga bamwe mu bana bo mu miryango itishoboye no kubaha ibikoresho by’ishuri, guhemba abarimu bigisha mu mashuri abanza batsindishije neza n’ibindi.

Abaturage icumi barojwe na Manzi Aloys muri gahunda yo guteza imbere aho avuka
Abahawe ubwisungane mu kwivuza basabwe kwishakamo ibisubizo bidatuma bahora bategereje gufashwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza