U Budage: Kayitesi Judence yanditse igitabo ku buzima bw’inzitane yanyuzemo muri Jenoside yakorewe Abatutsi

Yanditswe na Karirima A. Ngarambe
Kuya 25 Ukwakira 2019 saa 09:04
Yasuwe :
0 0

Kayitesi Judence, ni umubyeyi w’abana batatu warokotse Jenoside yakorewe Abatutsi mu 1994, yamusize ari imfubyi, ikamunyuza mu nzira y’akababaro n’ubuzima bw’inzitane, yifuje gusangiza abandi abinyujije mu gitabo cye cyanditse mu rurimi rw’Ikidage.

Iki gitabo cyitwa ‘Ein zerrochenes leben’ ugenekereje mu Kinyarwanda ni ‘Ubuzima bw’Inzitane’, kizamurikwa tariki ya 12 Ugushyingo 2019, mu Mujyi wa WT Tiengen.

Kayitesi w’imyaka 36, akomoka i Rutongo muri Gasabo, yageze mu Budage mu 2010, akaba ari umubyeyi w’abahunugu babiri, umwe w’imyaka 10 n’undi w’imyaka 11 n’umukobwa w’imyaka 12.

Mbere ya jenoside yakorewe Abatutsi yari mu muryango mugari w’abana batanu hicwa babiri bavukanaga na Se na Nyina baricwa. Kayitesi avuga ko mu muryango w’abantu barindwi basigaye ari batatu.

Mu kiganiro yagiranye na IGIHE, Kayitesi yavuze ko kwandika iki gitabo byaturutse ku mateka y’akababaro n’ubuzima bw’inzitane yanyuzemo muri Jenoside yakorewe Abatutsi.

Ati “Muri jenoside yakorewe Abatutsi barantemye mu mutwe noneho n’ubwenge [mémoire] bwanjye burasibama, nyuma mba ikiragi igihe kinini, biza kugenda bigabanuka kugeza ubwo iyo naganiraga n’umuntu we naramwumvaga ariko simbashe kuvuga nkahitamo kumwandikira”.

“Icyo gihe rero naje gufata icyemezo cyo kwandika aya mateka kugirango mbashe kuvuga ibyambayeho n’umuryango wanjye muri rusange, kuko kuba ikiragi byari byanteye ubwoba nti ‘bitazava aho bigaruka nkaba nagenda ntavuze ibyatubayeho muri iyo jenoside yadukorewe”.

Kayitesi avuga ko nyuma yo kubyara abana bajyaga bamubaza ibibazo bikorogoshora ngo kuki batabona ba sekuru, kuki batabona uyu n’uyu nk’abandi bigana, ibi bituma yumva ko agomba kubikura za nyandiko yabitse.

Ati “Na nyuma yaho ntangiye ubuhamya muri 2018 mu ruhame mu gihe cyo kwibuka, nahise mfata icyemezo byanyongereye imbaraga zo gukomeza kwandika igitabo”.

Akomeza avuga ko kwandika igitabo byari ugutanga umusanzu we kugira ngo bitazongera kubaho ukundi haba mu gihugu cy’u Rwanda cyangwa n’ahandi.

Ati “Ndifuza ko urubyiruko rwagisoma kugira ngo ntiruzagwe mu mutego”.

Iki gitabo cyanditse mu buryo bworoheje kuko buri wese wagize ibihe bikomeye azibonamo.

Kayitesi yatanze urugero rwibutsa ko umuntu agomba kudadira agira ati “Iyo utwaye imodoka urebera iby’imbere mu kirahure cyagutse kandi giherereye imbere, hanyuma washaka kureba iby’inyuma urungurikira mu turahure duto kandi akanya gato ngo wikomereze urugendo ujya imbere ibi bikaba bikubiye mu byemezo nafashe byo kudaheranwa n’agahinda cyangwa n’aya mateka mabi twarokotse ari nabyo mu gusoza nifuza ko nasangiza cyane urubyiruko, abana tubyara, n’abandi bose”.

Kayitesi avuga ko igitabo cye mu 2020 kizasohoka no mu Cyongereza hanyuma hagagurikiraho Igifaransa n’Ikinyarwanda

Kayitesi Judence yanditse ku mateka ashaririye yanyuzemo muri Jenoside yakorewe Abatutsi
Kayitesi yatemwe muri Jenoside bimugiraho ingaruka zirimo no kumara igihe ari ikiragi
Iki gitabo cyanditse mu Kidage biteganyijwe ko kizashyirwa mu zindi ndimi zirimo n'Ikinyarwanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza