00:00:00 IGIHE NETWORK KN KINYARWANDA EN ENGLISH FR FRANCAIS

Amb Igor César yashimye urubyiruko ruba mu mahanga runyotewe no kubaka u Rwanda

Yanditswe na Karirima A. Ngarambe
Kuya 4 Ukuboza 2022 saa 12:31
Yasuwe :

Ambasaderi w’u Rwanda mu Budage, Igor César yashimye urubyiruko rw’Abanyarwanda ruba hirya no hino mu mahanga, rukomeje kugaragaza umuhate n’ubushake bwo gutanga umusanzu mu kubaka urwababyaye.

Ibi Ambasaderi Igor César yabigarutseho mu mpera z’iki cyumweru ubwo hasozwaga umwiherero w’abanyamuryango ba FPR-Inkotanyi baba mu Budage.

Uyu mwiherero ukorwa hagamijwe kurebera hamwe ubufatanye n’umusanzu bikenewe mu gukomeza guteza imbere u Rwanda, kumurikirwa ibyakozwe no kugaragarizwa imishinga iteganyijwe, witabiriwe n’abiganjemo urubyiruko biga cyangwa bakorera mu Budage.

Amb Igor César yavuze ko umwiherero w’uyu mwaka wari ufite umwihariko wo kuba waritabiriwe cyane n’urubyiruko, rugira n’uhare rukomeye mu kuwutegura n’ibiganiro byawubereyemo.

Ati "Uyu mwiherero witabiriwe mu buryo budasanzwe, kuva nagera hano ni ubwa mbere mbona umwiherero nk’uyu witabirwa n’abantu wavuga ko bari mu bice bitatu, ni ukuvuga abasore n’inkumi, ababyeyi, abakuze, abakora, abanyeshuri n’abarera."

Yakomeje avuga ko ibyo uru rubyiruko rwakoze bishimangira inyota rufite yo kugira uruhare mu guteza imbere urwababyaye.

Ati "Icy’ingenzi gikomeye, urubyiruko nirwo rwitabiriye cyane kandi rufata iya mbere mu gutegura uyu munsi ndetse rutanga n’ibitekerezo. Uruhare rwabo rushimangira inyota y’urubyiruko ruri hirya no hino mu mahanga yo gushaka kugira uruhare mu kubaka u Rwanda rwabo."

Ibiganiro byabereye muri uyu mwiherero byagarutse ku mateka y’umuryango FPR- Inkotanyi, uko wagutse ugera mu Budage n’ahandi hirya no hino ku Isi.

Ni ibintu Kayisire Maurice uyobora FPR-Inkotanyi muri iki gihugu avuga ko biba bikenewe cyane kuko bifasha urubyiruko kumenya amateka.

Ati "Ibyo biganiro bifasha abakiri bato gukomeza kuguma mu murongo no kumva ko urugendo rugihari no kumva ko ibintu bishoboka kuko n’ababikoze ubushobozi bari bafite natwe tubufite, ndetse dushobora no kurenzaho."

Yakomeje avuga ko bashimishijwe cyane n’ubwitabire buri hejuru mu rubyiruko.

Ati "Biradushimisha ko umubare w’urubyiruko ugenda wiyongera uko tugenda duhura, uyu munsi abarenga 50% bitabiriye uyu mwiherero ni urubyiruko, benshi bari mu mashuri abandi barayarangije, ariko akaba aribwo bagitangira akazi."

Umuhate w’uru rubyiruko wagarutsweho kandi na Ingabire Doreen uri mu bitabiriye uyu mwiherero w’Abanyamuryango ba FPR Inkotanyi mu Budage, avuye mu Rwanda.

Ingabire yavuze ko ubushake urubyiruko ruba mu mahanga rugaragaza bwerekana ko ejo hazaza h’u Rwanda ari heza.

Ati "Ni ikintu cyiza kubona urubyiruko uyu munsi rwicaye hamwe narwo rushishikajwe no kumva ndetse no kumenya neza Umuryango no gusobanukirwa neza iby’igihugu cyacu. Nabikunze cyane."

"Nakunze kandi kubona ukuntu urubyiruko rufite amatsiko n’ibibazo rubaza byiza, nkahita mbona igihe bazaba barangije ibyabazanye hano noneho baje kubishyira mu bikorwa mu gihugu cyabo, ubona ko dufite imbaraga nyinshi cyane z’urubyiruko ruri hanze ruzaza gushyira mu bikorwa ibyo bigiye hano."

Vainqueur Gabiro uri mu rubyiruko rwitabiriye uyu mwiherero, yavuze ko kuba bahabwa umwanya mu biganiro nk’ibi ari amahirwe urubyiruko rukwiriye kubyaza umusaruro.

Ati "Ni amahirwe ku rubyiruko kuba umuryango utekereza ku rubyiruko ndetse ukarushoramo, twarishimiye cyane kuko ari igihe cyiza cyo kwiga aho tuva n’aho tujya tukamenya urugendo igihugu cyanyuzemo kugira ngo cyibohore, cyimakaze ubumwe."

Uku guhura biri muri gahunda ngarukamwaka z’abanyamuryango ba FPR Inkotanyi batuye mu mpande zitandukanye z’Isi.

Ambasaderi w’u Rwanda mu Budage, Igor César yashimye urubyiruko rw’Abanyarwanda ruba hirya no hino mu mahanga rukomeje kugaragaza umuhate n’ubushake bwo gutanga umusanzu mu kubaka urwababyaye
Kayisire Maurice uyobora FPR-Inkotanyi mu Budage yavuze ko urubyiruko ruba rukenewe muri uyu mwiherero kuko birufasha kumenya amateka
Ingabire Doreen uri mu bitabiriye uyu mwiherero w’Abanyamuryango ba FPR Inkotanyi mu Budage avuye mu Rwanda, yashimye umuhate w'urubyiruko ruba mu mahanga
Vainqueur Gabiro uri mu rubyiruko rwitabiriye uyu mwiherero yavuze ko kuba bahabwa umwanya mu biganiro nk’ibi ari amahirwe urubyiruko rukwiriye kubyaza umusaruro
Umunyamakuru wa IGIHE, Karirima A. Ngarambe aganira na Amb Igor César

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .