U Budage: Abagize Ihuriro ry’Abagore bashimwe umusanzu mu kubaka ubumwe bw’Umuryango Nyarwanda

Yanditswe na Karirima A. Ngarambe
Kuya 23 Ukuboza 2020 saa 12:30
Yasuwe :
0 0

Abanyarwanda bagize Ihuriro ry’Abagore mu Budage bateguye ibiganiro n’ubusabane byo kwifurizanya gusoza umwaka wa 2020 mu mahoro no gukomeza kwirinda icyorezo cya Coronavirus cyugarije Isi.

Iki gikorwa cyabaye ku wa 19 Ugushyingo 2020, cyakozwe hifashishijwe ikoranabuhanga kubera kwirinda Coronavirus.

Cyitabiriwe n’abantu batandukanye barimo Umujyanama wa Mbere muri Ambasade y’u Rwanda mu Budage, Nshimiyimana Benedicto; Umunyamabanga wa Mbere, Umulisa Claudette; Uhagarariye Ihuriro ry’Abanyarwanda (Diaspora) mu Budage, Musoni Vedaste; Dr Mukansanga Virginie n’abandi Banyarwanda batuye mu Budage.

Mu ijambo rye, Nshimiyimana Benedicto, wari uhagarariye Ambasaderi w’u Rwanda mu Budage, Igor César, yashimye uruhare rw’Ihuriro ry’Abagore mu kubaka ubumwe bw’abari n’abategarugori mu muryango Nyarwanda.

Yagize ati “Ni byiza kubona uko mukomeza kuzirikana igihugu cyacu, ariko mudahwema gutera inkunga ibikorwa bitandukanye by’iterambere mu Rwanda.’’

Yavuze ko Amb. Igor César yamutumye kubasaba kwita ku cyiciro cy’abasheshakanguhe b’Abanyarwanda batuye mu Budage.

Yakomeje ati “Barahari, mubasure, mukurikirane n’imibereho yabo nkuko mu muco Nyarwanda bigenda, umwana amenya umubyeyi igihe bibaye ngombwa nk’uko umubyeyi arera abana neza kugira ngo bazavemo abagabo n’abagore babereye u Rwanda.’’

Yabasabye gukomeza kubaka ubumwe nk’Abanyarwanda binyuze mu kuganiriza abandi bataramenya ko bisanga mu byiza byubaka ubwo bumwe kuko biheza kandi imiryango yuguruye kuri buri wese.

Ati “Ndanabashishikariza kudata umwanya ku bashakira ikibi igihugu cyacu ahubwo mubamagane mu buryo bwose kuko bangiza bakanahemukira urubyiruko rwifuza u Rwanda rwiza, rutekanye, rw’amahoro turimo twubaka uyu munsi.’’

Umuyobozi w’Abari n’Abategarugori, Mukangango Maria, yavuze ko bihaye intego yo gukomeza gutanga umusanzu wabo mu kubaka igihugu.

Ati “Nk’abari n’abategarugori mu nshingano twihaye ni ugukomeza guhura no kuganira ku byafasha imiryango yacu duturukamo no gufatanya n’abandi bari mu gihugu cyane gufasha abadukeneyeho inkunga yaba iy’ibitekerezo cyangwa mu bikorwa bitandukanye. Ni ugushyira imbaraga mu mishinga itandukanye irimo ubworozi bw’amatungo n’iyindi mu Rwanda.’’

Abitabiriye ibi biganiro kandi bafashijwe kubwirwa uko bakwiye kwirinda Coronavirus, binyuze mu kiganiro cyatanzwe na Dr. Mukansanga Virginie, wagaragaje ishusho y’iki cyorezo, aho gushaka urukingo bigeze bijyanye n’ubushakashatsi bwa Robert Koch Institut.

Ibi byiyongereyeho ikiganiro kuri “Ndi Umunyarwanda’’ cyatanzwe n’Umujyanama wa Mbere muri Ambasade y’u Rwanda mu Budage, Nshimiyimana Benedicto.

Ndi Umunyarwanda ni gahunda yatangijwe mu 2013 igamije kongera kubaka ubumwe n’ubwiyunge bw’Abanyarwanda, yerekana ukuntu mbere y’Abakoloni abenegihugu bari bifitemo ishema ryo kuba Abanyarwanda mbere ya byose, kugira umuco n’ururimi rumwe bibahuza, bakagira ubutwari bwo kugikorera no kukirinda.

Nshimiyimana ati “Uyu munsi ibyo abo bakoloni basize babibye ni byo byatugejeje mu kwicamo ibice ariko bakoresheje indangamuntu irimo ubwoko, havuka amshyaka ya politiki agendera ku turere n’amoko. Ibi byatumye habaho ko Abanyarwanda batotejwe bakajyanwa ishyanga basanze batabyemera batangiza urugamba rwo kubohora igihugu ruyobowe n’ingabo za FPR Inkotanyi mu 1990. Intego yarwo ikaba kwari ukugarura ubumwe mu Banyarwanda bushingiye mu gusaranganya ubutegetsi.’’

Yavuze ko uyu munsi igihugu gitekanye, Abanyarwanda biteza imbere muri byose ndetse begerejwe amashuri, amavuriro n’ibindi bikorwa remezo.

Ati “Ubu u Rwanda ni igihugu gikomeje guhahirana no kubanira neza ibindi bihugu mu bufatanye n’ubwubahane, giteye ishema n’abagikomokaho aho bari hose ku Isi. Ndi Umunyarwanda kandi ni igihango n’icyomoro cy’amateka mabi u Rwanda rwaciyemo; ni uburyo bwo gukomeza kwereka no guha inzira nziza abana bacu bazakomeza ibyo twubatse.’’

Umuyobozi wa Diaspora mu Budage, Musoni Vedaste, mu ijambo rye yashishikarije Abanyarwanda bo mu Budage gukomeza kwiyubaka mu miryango kuko byose niho bihera bikagera no ku gihugu.

Uyu muhango wateguwe unashyirwa mu bikorwa n’itsinda rigizwe na Marie Mukangango wari umuhuzabikorwa; Olive Umumararungu, Visi Perezida; Taiko Celia Kamanzi, Umunyamabanga; Annonciata Haberer ushinzwe Umuco n’Umutungo; Marie Claire Girineza ushinzwe Umuco n’Imiyoborere myiza; Sylvia Schneider ushinzwe Ubutabera; Théodette Hauth ushinzwe Ishoramari na Joy Mutesi Szembek ushinzwe guhanga Udushya.

Aba bose batanze ibiganiro bijyanye n’ibyo bagezeho, banabazwa ibibazo bitandukanye bibyerekeye.

Abitabiriye iki gikorwa bagize n’umwanya wo gusabana, aho basusurukijwe n’abahanzi b’abahanga barimo Ngarukiye Daniel wo mu Bufaransa na Uwamahirwe Josée utuye mu Budage.

Umujyanama wa Mbere muri Ambasade y’u Rwanda mu Budage, Nshimiyimana Benedicto, yatanze ikiganiro kuri Ndi Umunyarwanda
Nshimiyimana Benedicto yatanze ubutumwa bwa Ambasaderi w’u Rwanda mu Budage, Igor César
Umumararungu Olive ni we wayoboye ibiganiro
Taiko Celia Kamanzi atanga ikiganiro
Théodette Hauth atanga ikiganiro
Umuyobozi w’Abari n’Abategarugori, Mukangango Maria, yavuze ko bihaye intego yo gukomeza gutanga umusanzu wabo mu kubaka igihugu
Mukandanga Jacqueline uyobora Ibuka mu Budage yakurikiye ibi biganiro
Dr Mukansanga Virginie yatanze ikiganiro ku ishusho ya Coronavirus n'ingamba zikwiye mu gukomeza kwirinda
Musoni Vedaste uyobora Diaspora y'Abanyarwanda mu Budage avuga ijambo
Annonciata Haberer ushinzwe Umuco n’Umutungo atanga ikiganiro
Girineza Claire atanga ikiganiro, yari kumwe na Gakuba Philbert
Abagize Ihuriro ry’Abagore baba mu Budage bashimwe umusanzu mu kubaka ubumwe bw’Umuryango Nyarwanda
Umuhanzi Daniel Ngarukiye yaririmbye yifashishije inanga
Uwamahirwe Josée yatanze ikiganiro, anataramira abitabiriye iki gikorwa mu ndirimbo
Hatanzwe ikiganiro ku buryo Ubunyarwanda bwasenywe n'uko bwongeye kubakwa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .