Tujyane i Cannes, umujyi wihariye mu kwakira amaserukiramuco ahambaye ku Isi (Amafoto)

Yanditswe na Karirima A. Ngarambe
Kuya 5 Ukuboza 2019 saa 10:00
Yasuwe :
0 0

Iyo umuntu atekereje Umujyi wa Cannes, ntiyarenza ingohe akayaga kava mu mazi magari awukikije, ibyiza nyaburanga byizihira abashaka kuwusohokeramo no kuruhuka ndetse n’iserukiramuco ngarukamwaka rya film riwuberamo.

Umujyi wa Cannes uherereye mu gace ka Côte d’Azur [Kitwa French Riviera mu Cyongereza cyangwa Costa Azzurra mu Gitaliyani] ku Nkombe y’Inyanja ya Méditerranée mu Majyepfo ashyira Uburasirazuba bw’u Bufaransa.

Cannes yamamaye cyane kubera ubwiza bw’ikirere cyaho, amaserukiramuco arimo iryo ku rwego mpuzamahanga rya Sinema rihuriramo ibihangange mu bijyanye na sinema ndetse n’amamurikagurisha ahuza ibihugu bitandukanye ku Isi.

Uyu mujyi uri ku buso bwa kilometero kare 19.62, ubushakashatsi bwo mu 2015 bwagaragaje ko utuwe n’abaturage basaga 74,285.

Cannes iri mu mijyi ikundwa, ikanagendwa cyane mu iherereye mu gace ka Côte d’Azur nka Nice na Saint Tropez.

Abatembera muri uyu mujyi ni abaherwe bafite agatubutse ariko hari n’ahagenewe abafite ubushobozi buciriritse.

Ba mukerarugendo batembera muri uyu mujyi, abenshi basura ahantu nyaburanga hatandukanye harimo Église Notre Dame d’Esperance, yubatswe mu kinyejana cya 16.

Hafi y’iyo kiliziya hari inzu ndangamurage yiswe “Musée de la Castre”, ibarizwamo ibikoresho by’ubugeni ndetse yubatse mu buryo abayisura bashobora kuyurira bakayihagarara hejuru bakitegera ibice biyikikije.

Ubwamamare bw’Umujyi wa Cannes kandi bunashingiye ku Iserukiramuco Ngarukamwaka rya film riba muri Gicurasi, aho ibyamamare mu Isi ya Sinema bihurira.

Ribera ahazwi nka Palais des Festivals aherekanirwa film zatunganyijwe mu mfuruka zose z’umubumbe.

Muri aba harimo n’abafite amaraso y’u Rwanda kuko nko mu Iserukiramuco Cannes Film Festival ryabaga ku nshuro ya 71 muri Gicurasi 2018 ryitabiriwe na Miss Sonia Rolland.

Uyu yatoranyijwe mu bahanga muri sinema bakoze film nziza ku bagore, ndetse hari izerekanwa zirimo ‘Femmes du Rwanda’ na ‘Une Vie Ordinaire’.

Cannes Festival yahawe izina rya International Film Festival mu 2002 yerekanirwamo film z’ubwoko bwose n’ibyegeranyo byakorewe ku Isi hose. Yashinzwe ku wa 20 Nzeri 1946. Mu nzu iberamo iryo serukiramuco uyo winjiyemo ubonamo amafoto y’ibihangange byanditse amateka muri Sinema guhera kuri Sylvester Stallone twamenye nka Rambo n’abandi.

-  Izingiro ry’ubwamamare bwa Cannes

Iyo uvuye muri metero nke mu Mujyi wa Cannes hari uturwa tune turi hamwe twitwa “Îles de Lérins” turimo Sainte-Marguerite nini kandi yishimirwa gusurwa mu mpeshyi.

Cannes iherereye mu gace ka Côté d’azur ku Nyanja ya Méditerrané, Akarere kari gatuwe cyane kuva mu kinyejana cya Mbere ya XIX. Abaturage baho bari batunzwe n’uburobyi n’indi mirimo ifitanye isano n’ubushabitsi bukorerwa hafi y’amazi.

Nyuma y’intambara nyinshi zahabereye ku bavuga Igifaransa n’Icyongereza n’ururimi rwo muri Espagne mu ntangiriro z’ikinyejana ya 19 nibwo Cannes yagaruye agahenge ku bwa Henry Peter Brougham wari Chancelier w’u Bwongereza. Kuva icyo gihe iterambere rya Côte d’Azur ryarihuse, itera imbere bidasubira inyuma.

Uyu mujyi kandi waje kwamamara, ugira umwihariko udasanzwe ku Isi guhera hagati mu kinyejana cya 19 kubera Iserukiramuco rya Film rikorerwa i Cannes.

Uyu munsi ni ahantu hakomeye haruhukira ibyamamare kandi hakabera amaserukiramuco yo ku rwego ruhanitse, inama zakira abakuru b’ibihugu n’abandi bayobozi bo ku rwego rwo hejuru.

Bakururwa cyane n’uburyo uyu mujyi wateje imbere ubukerarugendo n’ibijyana nabyo haba mu kwakira abantu no kuzamura ibikorwa remezo by’amahoteli, amaresitora ndetse inzu nyinshi zizwi zicuruza imyenda n’ibijyanye n’imideli zihafite ibyicaro.

Ibi byiyongeraho n’ibihe byiza ako karere kagira nk’izuba hagati y’inyanja n’ubutaka nabyo bikurura abakerarugendo, hakarushaho kuba umuryango winjiza ubukungu n’isura nziza y’u Bufaransa.

Hari benshi basura aha hantu bashaka kujya gutemberera ku bwogero no kuhogera. Abenshi banishimira kuba bafata ka vino kiganje muri uyu mujyi nk’ikinyobwa gikundwa n’abahatemberera.

Cannes mu 2011 yakiriye Inama ya G20, ihurirwamo n’abayobozi b’Ibihugu nk’u Bufaransa, Amerika, u Bwongereza n’ibindi by’ibikomerezwa.

Cannes ifite amahoteli ari ku rwego rw’inyenyeri eshanu arenga atanu yamamaye kubera gutanga serivisi zo ku rwego rwo hejuru.

Umujyi wa Cannes ni wo wakira imurikagurisha rikomeye ry’Ubukerarugendo rizwi ku izina rya ILTM (International Luxury Travel Market). Kuri ubu riri kuhabera ku nshuro ya kane ndetse u Rwanda binyuze mu Kigo cy’Igihugu cy’Iterambere (RDB) rurahagarariwe mu nyubako iryakira ya ‘Palais des Festivals’.

ILTM ihuza abaguzi, abagurisha n’abafatanyabikorwa mu bijyanye n’ubukerarugendo bwo ku rwego rwo hejuru ‘‘Tourisme de Luxe.’’; ryitabirwa n’abaturutse mu bihugu bitandukanye byo muri Afurika, Aziya, Amerika y’Epfo, Cannes, iby’Abarabu n’u Bushinwa.

Ahabera iserukiramuco rya film i Cannes ni hafi y'amazi
Ahirengeye kuri uyu musozi uri hejuru uba ureba inyandiko nini ya Cannes aho uri hose
Bamwe mu Banyarwanda bagize itsinda riri kumurika ubukerarugendo bw'u Rwanda ubwo bageraga ku Kibuga cy'Indege cyo mu Mujyi wa Cannes
Cannes ni umujyi ufite amateka yihariye ku byamamare bizwi mu ruganda rwa sinema
Abasura Umujyi wa Cannes ntibarenza ingohe icyo kunywa
Imihanda igana mu ngo z'abaherwe batuye mu Mujyi wa Cannes
Inyubako z'i Cannes zirimo izigerekeranye zikorerwamo ibintu bitandukanye ku butaka buto
Ni umujyi abawutuye baba bahumeka akayaga kava mu nyanja iwukikije
Ni agace keza kizihirwa cyane na ba mukerarugendo
Inyubako ziri muri uyu mujyi ziteye amabengeza
Ubushabitsi bukorerwa muri aka gace bwiganjemo ubushingiye ku buryobyi, ubwikorezi bwo mu mazi n'indi mirimo iyishamikiyeho
Isuku iri mu biri ku isonga muri uyu mujyi
Ingoro ndangamurage ibitsemo ibihangano byo hambere iri mu zisurwa cyane
Inyubako za kera zirasigasirwa bikomeye, iyi nzu ni inyubako ntakorwaho yo hambere
Inzu yerekana film, icyo Abafaransa bita "7ème art"
Mu gihe ahandi mu Burayi imbeho ica ibintu i Cannes abantu baba bibereye hanze banywa ikawa n'icyayi mu gitondo
Église Notre Dame d’Esperance yubatswe mu myaka yo hambere iri mu nyubako zifite amateka muri uyu mujyi
Umuhanda ugana kuri Palais des Festivals, inyubako yakira inama zikomeye n'amaserukiramuco mpuzamahanga
Umuhanda uhuza umujyi rwagati n'inzu zitaruye mu gace gatuwe
Usanga henshi handitse ko Ubuzima ari ukubaho mu byishimo kubera agaciro baha kwidagadura
Utuyira ducamo imodoka hagati y'ibipangu by'abifite n'ibyamamare bihatuye
Zimwe mu nyubako usanga zikorerwamo n'inzu z'imideli zikomeye mu Mujyi rwagati i Cannes
Umujyi wa Cannes wiganjemo inyubako zijyanye n'igihe
Ibigezweho byose wabisanga muri uyu mujyi
I Cannes ni umujyi wihariye mu kwakira amaserukiramuco ahambaye ku Isi ku buryo hari aho usanga hari ibyapa by'abahanga mu bya sinema bazwi
Ibicuruzwa by'Uruganda rwambika abantu rwo mu Butaliyani rwa Dolce & Gabbana rwashinzwe mu 1985 birahaboneka
Uyu mujyi urimo imihanda ikozwe neza
Ishusho ya Cannes uyirebeye hejuru ku musozi
French Riviera ni agace gateye amabengeza mu Bufaransa
Ibiranga sinema byose biba bigaragara muri uyu mujyi ukunzwe kugendwamo n'abahanzi bakomeye muri uyu mwuga
Ibirwa byagutse biri i Cannes ni Saint Honorat na Sainte Marguerite bisurwa cyane na ba mukerarugendo
Ibyamamare ubisanga ku nkuta z'inzu zitandukanye mu mujyi byarakorewe ibibumbano
I Cannes mu gitondo butangiye gucya

Amafoto: Karirima A. Ngarambe / Cannes


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .