00:00:00 IGIHE NETWORK KN KINYARWANDA EN ENGLISH FR FRANCAIS

Umwihariko w’igitaramo The Ben azakorera muri Suède

Yanditswe na Karirima A. Ngarambe
Kuya 7 July 2022 saa 09:08
Yasuwe :

Mu gihugu cya Suède hateguwe igitaramo kizitabirwa n’umuhanzi The Ben, aho azagaragariza Abanyaburayi bo mu Majyaruguru ubudasa bw’u Rwanda mu bijyanye n’ihame ry’uburinganire no guteza imbere umukobwa n’umugore.

The Ben azaririmba mu gitaramo cyo gutangiza igikorwa gihuza Umugabane wa Afurika n’Ibihugu by’Amajyaruguru y’ u Burayi hifashishijwe umuco na muzika.

Ni igikorwa azatangira kuwa Gatandatu tariki ya 30 Nyakanga 2022 aho mu Mujyi wa Uppsala muri Suède, ahazatangira igitaramo ngarukamwaka kizajya gihuza abanyafurika n’abakomoka mu bihugu bya Suède, Finland, Denmark, Norvège na Iceland. Intego y’ibi bitaramo ni ugusabana no kumurika umuco wa buri gihugu .

Iki gitaramo cyateguwe n’Umunyarwanda utuye muri Suède, Blaise Ntezimana binyuze mu muryango yashinze Africa- Nordic.

The Ben azafatanya n’abahanzi bo muri Suède barimo Joseph Nordin ucuraga gitari, Martin Luther Kintu ukomoka mu gihugu cya Uganda akaba atuye muri Suède n’itorero Inyaruguru ry’Abanyarwanda batuye muri iki gihugu.

Muri icyo gitaramo hateganyijwe kumurikwa amashusho agaragaza ahantu nyaburanga mu Rwanda ndetse no kugaragaza amahirwe yo gushora imari mu Rwanda, hifashishijwe amashusho n’ikoranabuhanga.

Umwihariko w’iki gitaramo, ni uko Umuhanzi The Ben yagituye abakobwa n’abagore bari mu bihugu by’u Burayi, akazabaha urubuga rwo kugaragaza buri wese impano yaba yibitseho.

Ntezimana ati “Bizaba umwanya wo kugaragaza umwihariko w’ubuyobozi bw’igihugu cyacu wo guhora ku mwanya wa mbere muri Afurika mu guteza imbere umugore , ku rwego rw’Isi kikazaba gikurikiranywe n’abo mu bihugu by’u Burayi bw’amajyaruguru.”

Yavuze ko ajya gutekereza guhuza Abanyaburayi n’Abanyafurika binyuze mu buhanzi n’umuco, yabitewe no kumva afite inyota yo gufatanya na Ambasade y’uRwanda muri ibyo bihugu ndetse na bagenzi be b’Abanyarwanda bahatuye gukora igishoboka cyose ngo hamenyekane isura nyayo y’u Rwanda na Afurika.

Yavuze ko ari uburyo bwo gufasha Abanyaburayi kubona aho bahaha umuco nyafurika n’ibyiza byawo, n’Abanyafurika bagire aho bamenyera kandi banahaha ibyiza biri mu muco w’Abanyaburayi bo mu Majyaruguru.

The Ben ni umuhanzi ufite abakunzi benshi haba muri Afurika no ku Mugabane w’u Burayi. Iki gitaramo kandi gitegerezanyijwe amatsiko kubera inyota Abanyaburayi bafite yo kumenya byimbitse umuco w’u Rwanda ndetse na Afurika.

The Ben yiteguye kwifashisha umuziki mu kugaragaza ubudasa bw'u Rwanda mu guteza mbere abari n'abategarugori
Ntezimana afite intego yo kumenyekanisha umuco wa Afurika mu Burayi
Joseph Nordin azacuranga muri iki gitaramo
Dekula Band yiteguye gususurutsa abazitabira iki gitaramo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .