Siboyintore yagaragaje ishusho y’ibyaha by’ingengabitekerezo no gupfobya Jenoside

Yanditswe na IGIHE
Kuya 2 Nzeri 2020 saa 05:12
Yasuwe :
0 0

Abanyarwanda bibumbiye muri Diaspora ya Amerika biyemeje kuganira no guha umwanya amateka ya Jenoside yakorewe Abatutsi mu 1994 mu rwego rwo kwibuka no gutanga umusanzu mu kurwanya ingengabitekerezo yayo.

Iki kiganiro gitegurwa n’abayobozi ba Diaspora Nyarwanda muri Amerika bafatanyije n’abandi Banyarwanda bo mu Rwanda no hirya no hino mu Burayi.

Muri uyu mwaka cyakozwe ku wa 22 Kanama 2020; cyatumiwemo Umuyobozi Mukuru ushinzwe gushakisha abakekwaho ibyaha bya Jenoside yakorewe Abatutsi bari mu mahanga, Siboyintore Jean Bosco; Umuyobozi Mukuru ushinzwe Ubushakashatsi n’Ububiko-Shakiro muri CNLG, Dr Gasanabo Jean Damascène; Murangwa Eugène washinze kandi uyobora Umuryango ‘‘Ishami Fondation’’ na Prof. John Musiine uyobora Umuryango w’Abanyarwanda batuye muri Amerika.

Ikiganiro cyayobowe na Karirima Ngarambe, umunyamakuru wa IGIHE afatanyije na Yvonne Umugwaneza wiga muri Kaminuza yo mu Mujyi wa Texas.

Siboyintore mu butumwa yatanze yagarutse ku nshingano z’Ubushinjacyaha zo gukurikirana no kuregera inkiko abakekwaho icyaha cy’ingengabitekerezo ya Jenoside yakorewe Abatutsi n’ibindi byaha bifitanye isano nayo.

Yasobanuye ko mbere y’uko itegeko rihana abakekwaho ibyaha rishyirwaho hari harimakajwe umuco w’ubutegetsi wo kudahana.

Ati “U Rwanda rwari rwarasinye amasezerano mpuzamahanga akumira akanayihagarika mu 1948, byerekana ko hajemo icyuho ari nayo mpamvu iyo Leta yari ifite umugambi wo kuzakora Jenoside, kuko amateka arabigaragaza. Mu 1994 aho Jenoside yakorewe haje kuba icyuho cy’itegeko kuko iyo itegeko ridahari ngo rihane icyaha runaka ubura icyo ukora ngo ugire aho ushingira uhana uwagikoze.’’

Muri Kanama 1996 nibwo itegeko rihana Jenoside ryagiyeho ndetse Leta y’Ubumwe bw’Abanyarwanda itangira gukosora ibyari byarakozwe na Leta zayibanjirije binyuze mu gushyiraho amategeko.

Mu 2001 hagiyeho irindi tegeko rihana amacakubiri n’ivangura, mu 2003 hajyaho irihana Jenoside n’ibyaha byibasiye inyokomuntu, mu 2008 hajyaho irihana ingengabitekerezo ya Jenoside ryavuguruwe mu 2013 rikaba ariryo Ubushinjacyaha bwifashisha mu gukurikirana abahakana bakanayipfobya.

Siboyintore akomeza agira ati “Ubushinjacyaha rero ntabwo twicaye kandi n’abacura imigambi mibi yo guhakana Jenoside yakorewe Abatutsi bo badahwema kuyicura.’’

Imibare yerekana ko mu 2012/13, hakiriwe amadosiye 90, Ubushinjacyaha bwatsinzemo 68; mu 2013/ 14 amadosiye yageze ku 136, Ubushinjacyaha buregera inkiko abo bantu butsinda ku kigero cya 79,4.

Izamuka ry’ibyaha by’ingengabitekerezo ahanini ryiyongera mu gihe cyo kwibuka Jenoside yakorewe Abatutsi.

Mu 2015 hakiriwe amadosiye 131 yatsinzwe ku kigero cya 86,2%, mu 2016 byaragabanutse ho gato bigera kuri 92. Mu 2016/17, amadosiye yariyongerereye agera 185, Ubushinjacyaha buyatsinda ku kigero cya 95,9%.

Mu 2017/18, amadosiye yarazamutse aba 209, Ubushinjacyaha butsinda ku kigero cya 74,6% mu gihe mu 2018/19 amadosiye yagabanutse.

Kugeza mu 2019/2020 inkiko zimaze kuregerwa amadosiye 154, Ubushinjacyaha bwayatsinze kuri 79,9%.

Yakomeje ati “Iyo urebye muri iyo myaka yose yatambutse, aya madosiye yiyongereye muri Mata, Gicurasi na Kamena mu gihe cyo kwibuka abishwe muri Jenoside yakorewe Abatutsi.’’

Hagati ya Nyakanga 2019 na Werurwe 2020 hakiriwe amadosiye 141, ariko uhereye muri Mata kugeza Kamena mu mezi atatu gusa hakiriwe amadosiye 182.

Siboyintore agira ati “Tugomba gukaza umurego mu kubashyikiriza inkiko [abakirangwa n’ingengabitekerezo ya Jenoside]. Ikindi navuga ni uko ibihano bahabwa navuga ko byoroshye kuko ni hagati y’imyaka itanu kugera kuri irindwi n’ihazabu iri hagati y’ibihumbi 500 na miliyoni.’’

Yavuze ko hari n’abantu bakoze Jenoside usanga barakomeje umugambi wo guhakana Jenoside yakorewe Abatutsi.

Ati “Abo duhura nabo kenshi mu magereza bayikoze bo rwose baratubwira ngo iyo tuza kuba twarayikoze nyabyo mwebwe ntimwakagombye kuba muri hano mutubaza ubusa.’’

Umuyobozi mukuru ushinzwe Ubushakashatsi n’Ububiko-Shakiro muri Komisiyo y’Igihugu yo Kurwanya Jenoside, CNLG, Dr Gasanabo Jean Damascène, yavuze ko hashyizweho uburyo bwo guhanahana amakuru mu kurwanya ingengabitekerezo n’ihakana rya Jenoside yakorewe Abatutsi.

Ati “Ubu tugeze mu gice cyo gukora ikindi gikorwa ku buryo uri mu Burayi, Amerika n’ahandi uzabasha kubona inyandiko z’inkiko igihe uzishakiye, waba umushakashatsi, umunyeshuri, ushinzwe umutekano n’abandi. Igihe nikigera tuzabimenyesha abantu.’’

CNLG imaze gukusanya mu buryo bw’ikoranabuhanga miliyoni 48 z’impapuro zerekana ubukana bwa Jenoside yakorewe Abatutsi.

Ati “Uyu munsi kandi hari inyandiko zitaratugeraho kuko zikiri mu rukiko rw’ubujurire mu mirenge, utugari n’ahandi. Twe nka CNLG dufasha izindi nzego zibishinzwe kubona inyandiko bifashisha kugira ngo bamenye ibyo bamwe bakoze muri Jenoside kugira ngo ubutabera bukore akazi kabwo.’’

CNLG itanga ibiganiro byinshi mu mashami atandukanye muri Kaminuza y’u Rwanda, ikanifashisha Ihuriro ry’Inteko Ishinga Amategeko n’abadepite n’abasenateri rikumira ipfobya n’ihakana rya Jenoside yakorewe Abatutsi.

Dr Gasanabo avuga ko ibindi biganiro bibera mu mashuri yisumbuye, muri gereza n’andi mashyirahamwe arimo nk’abamotari, abanyamadini n’Abanyarwanda bahunguka bakanyuzwa mu bigo byabugenewe.

Ati “Tubigisha ko buri Munyarwanda yakwifuriza undi mugenzi we ineza kuko bigana ku muco mwiza w’Abanyarwanda wo gufashanya, kuzuzanya aho guterana amabuye bikagera n’aho mwicana muterana amacumu n’imihoro.’’

Ikiganiro ku guhangana n’ingengabitekerezo ya Jenoside cyatangiwemo umurongo w’uburyo Abanyarwanda baba mu mahanga bajya batanga amakuru ku hari abakidegembya kandi bakenewe kugezwa imbere y’ubutabera.

Prof. John Musiine uyobora Umuryango w’Abanyarwanda batuye muri Amerika yashimangiye ko ibiganiro byateguwe bigamije guhuza Abanyarwanda bakibuka Jenoside, bakanafata ingamba zo kuyikumira.

Ati “Kwibuka no kuganira ku mateka ya Jenoside yakorewe Abatutsi ni ibya buri gihe. Si ngombwa kurindira icyunamo gusa kuko Umunyarwanda uwo ariwe wese naho aherereye akwiye guha ikiremwamuntu cyane abazize ubusa kubera uko bavutse agaciro. Ni no gushima ingabo za FPR Inkotanyi zahagaritse Jenoside zikanabohora igihugu cyari mu ivanguramoko n’uturere.’’

Mu bandi batanze ibitekerezo harimo Murangwa Eugène wamenyekanye nk’umukinnyi wa Rayon Sports bikaba biri no mu byamufashije kurokoka Jenoside kubera abo bakinanaga n’abakunzi ba Gikundiro RS bamukomeyeho.

Mu butumwa bwe yagarutse ku mpamvu yatumye yitabira ibikorwa birimo gushinga Ishyirahamwe Football for Hope, Peace and Unity (FHPU), Urumuri ihuza abarokotse Jenoside batuye mu Bwongereza na Survivors Tribune na Ishami Fondation i London.

-  Reba ikiganiro kirambuye unyuze hano

Siboyintore yagaragaje ko kurinda urubyiruko ingengabitekerezo ya Jenoside bizafasha kubaka u Rwanda ruhamye
Umuyobozi mukuru ushinzwe Ubushakashatsi n’Ububiko-Shakiro muri Komisiyo y’Igihugu yo Kurwanya Jenoside, CNLG, Dr Gasanabo Jean Damascène, yavuze ko hashyizweho uburyo bwo guhanahana amakuru mu kurwanya ingengabitekerezo n’ihakana rya Jenoside yakorewe Abatutsi
John Musiine uyobora Umuryango w'Abanyarwanda batuye muri Amerika yavuze ko bikwiye ko buri wese atanga umusanzu we ku guhangana n'abahakana bakanapfobya Jenoside
Murangwa Eugène yamenyekanye nk’umukinnyi wa Rayon Sports bikaba biri no mu byamufashije kurokoka Jenoside yakorewe Abatutsi
Ikiganiro cyayobowe na Karirima Ngarambe, umunyamakuru wa IGIHE
Yafatanyije na Umugwaneza Yvonne wiga muri Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .