Scandinavia: Urubyiruko rw’Abanyarwanda rwasabwe kubakira ku butwari bw’Inkotanyi

Yanditswe na Karirima A. Ngarambe
Kuya 19 Mutarama 2021 saa 10:26
Yasuwe :
0 0

Urubyiruko rw’Abanyarwanda rutuye mu bihugu bya Scandinavia rwasabwe kubakira ku butwari bw’Inkotanyi zabohoye igihugu, na rwo rugakoresha imbaraga mu rugendo ruganisha igihugu ku iterambere ryifuzwa.

Ni ubutumwa bahawe ku wa 16 Mutarama 2021, mu biganiro byahawe insanganyamatsiko igira iti ‘‘Rwanda My Identity, My Future’’ ugenekereje mu Kinyarwanda bishatse kuvuga ngo ‘‘Uwo ndi we, ahazaza hanjye.’’

Ibi biganiro byateguwe na Ambasade y’u Rwanda ifite icyicaro muri Suède. Byahuje urubyiruko rutuye mu bihugu bya Scandinavia byo mu Majyaruguru y’u Burayi birimo Suède, Danmark, Norvège na Finland.

Byatumiwemo Minisitiri w’Umuco n’Urubyiruko, Mbabazi Rosemary wari Umushyitsi mukuru n’Umusore w’Umunyarwanda Sangwa Rwabuhihi, umwe mu rubyiruko rwize mu Mahanga akahakurira ariko akaba afite ibikorwa mu Rwanda.

Mu butumwa bw’ikaze, Ambasaderi w’u Rwanda muri Suède, Nkulikiyinka Christine yashimye urubyiruko rwitabiriye ibi biganiro byabaye hifashishijwe ikoranabuhanga mu rwego rwo kwirinda ikwirakwira rya Coronavirus.

Yagarutse ku ndangagaciro ziranga Umunyarwanda n’ibijyana nazo byose, ariko cyane ku rubyiruko avuga ku mahitamo bashobora kugira mu kwihitiramo imbere yabo heza haba mu mibereho isanzwe cyangwa mu kazi ka buri munsi kabo.

Yakomeje ati ‘‘Kumenya uwo uriwe, aho uturuka n’amateka yaho, indangagaciro zawe bituma umenya neza icyo ushaka naho bizakugeza mu buzima bwawe n’abawe mu buryo bufatika. Mukazavamo koko Abanyarwanda b’icyubahiro babereye u Rwanda.’’

Yavuze ko nubwo urubyiruko rufite ubumenyi butandukanye kandi rwize, runakurira mu mahanga ruhuriye ku kintu kimwe aricyo ‘Ubunyarwanda.’

Ati ‘‘Nagira ngo mbakangurire rwose kwiga ururimi rwanyu ubutaha tuzahurire aha tuganira mu Kinyarwanda twese. Ndabizi ko bitoroshye ariko ibintu byose iyo ubishyizemo ubushake wabigeraho.’’

Amb. Nkulikiyinka yavuze ko kugira ngo u Rwanda ruzagere ku ntego rwihaye ya 2050 rukeneye amaboko y’abana barwo bose.

Ati ‘‘Igihugu gikeneye umusanzu wanyu nk’urubyiruko. Ni mwe duhanze amaso kuko muri u Rwanda rw’ejo, ni mwe bayobozi b’ejo. Mumenye ko imiryango ifunguye iwanyu kuri mwe mwese rubyiruko kandi nta kiguzi kindi uretse gukorera hamwe.’’

Minisitiri Mbabazi na we yabwiye urubyiruko ko u Rwanda rwagutse, kuko rufite amaboko yarwo.

Ati ‘‘Mujye muhora mwifitemo ingufu n’ibitekerezo byiza kuko nibyo byubaka, mugire amatsiko, inyota yo gushaka kumenya kurushaho, aho abakuru batinya mwe mugereyo mu buryo bwo kubaka igihugu kandi mufite ubumenyi koko. Mufite igihugu kibakunda kibashyigikiye. Muhange ibishya mugumane ibitekerezo byiza no kwigirira icyizere.’’

Yavuze ko abato bakwiye gufatira urugero ku rubyiruko rwabohoye igihugu, rukakivana mu maboko y’ubutegetsi bubi.

Yakomeje ati ‘‘Inkotanyi zabohoye u Rwanda, bijye bibabera urugero, mwe muri Inkomezamihigo y’Inkotanyi, muri kandi Indangamirwa, muzabe Abanyarwanda bataneshwa kuko ni umurage w’Intagamburuzwa n’amananiza.’’

Minisitiri Mbabazi na we yabakanguriye kugira umurava mu kwiga Ikinyarwanda kuko ari ururimi rumwe ruhuza abenegihugu ari narwo moteri y’umuco gakondo ubaranga.

Ati ‘‘Umunyarwanda ubundi ahitamo imyico myiza y’aho atuye akayihuza n’iye kavukire bikarushaho kubaka. Mukomeze mube abavugizi ba ambasaderi beza mushakira u Rwanda abafatanyabikorwa, mwagura ubumenyi n’ibindi.’’

Yabibukije ko bakwiye gukoresha ubwenge, amaboko n’umutima kuko ari byo byubaka kandi bikabafasha kuba indashyikirwa no kurinda ibyagezweho.

Sangwa Rwabuhihi nk’umwe mu bakiri urubyiruko watumiwe yatanze ikiganiro yerekana urugendo rwe kuva akiri umunyeshuri kugeza ubwo arangije aho yakuriye mu Burayi, akaza kujyana ubumenyi yungutse kubukoresha afungura ibikorwa mu Rwanda.

Ibi biganiro byateguwe na Ambasade ifatanyije n’abayobozi b’imiryango Nyarwanda ziba muri ibi bihugu; byatumiwe mu rwego rwo kungurana ibitekerezo no kwimakaza umuco wo kwigira ku bandi. Urubyiruko rweretswe ko bitarusaba kuba mu Rwanda gusa ahubwo rushobora no gutangira umusanzu warwo aho ruri mu mahanga, rukazamura igihugu.

Hari abamaze gutera iya mbere muri ibyo bikorwa barimo uwitwa John Ntaganda ufite ishoramari ryo gucuruza ikawa y’u Rwanda mu Murwa Mukuru wa Helsinki muri Finland; yateguye aho abantu bicara bagasangira ariko kuri ubu yimukiye ku buryo bw’ikoranabuhanga kubera icyorezo cya Coronavirus.

Urubyiruko rwo muri Danemark narwo rwakoze Ishyirahamwe ryiswe ‘Turi kumwe’ aho bafasha abaturage kubagezaho amazi ndetse n’umuriro ukomoka ku ngufu z’imirasire y’izuba.

Nyuma y’ibiganiro by’abatumirwa, urubyiruko rwahawe umwanya usesuye wo kubaza no gusubizwa ibibazo bitandukanye.

Habayeho n’umwanya w’imikino yayobowe na Nkuliza Senghor aho abatsinze bahawe itike na RwandAir yo kuzasura u Rwanda.

Abakurikiye ibi biganiro kandi basangijwe indirimbo n’imivugo byateguwe n’urubyiruko byatumye uwo mugoroba uba mwiza kurushaho.

Minisitiri w’Umuco n’Urubyiruko, Mbabazi Rosemary, yasabye urubyiruko kurangwa n'indangagaciro z'ubupfura
Sangwa Rwabuhihi ni umwe mu rubyiruko rwize mu mahanga akahakurira, ubu akaba afite ibikorwa mu Rwanda
Urubyiruko rw’Abanyarwanda ruba muri Scandinavia rwaganirijwe ku ndangagaciro zikwiye kururanga
Ibi biganiro byagenewe urubyiruko rubarizwa mu bihugu bya Scandinavia byo mu Majyaruguru y’u Burayi birimo Suède, Danmark, Norvège na Finland
Ababikurikiye batanze ibitekerezo, banahabwa umwanya wo kubaza ibibazo bitandukanye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .