00:00:00 IGIHE NETWORK KN KINYARWANDA EN ENGLISH FR FRANCAIS

Prof Shyaka yakomoje ku bukana bwa Jenoside, asaba amahanga guca umuco wo kudahana abajenosideri

Yanditswe na Karirima A. Ngarambe
Kuya 13 May 2022 saa 12:26
Yasuwe :

Ambasaderi w’u Rwanda muri Pologne, Prof Shyaka Anastase, yavuze ko Jenoside ari icyaha gifite ingaruka zikomeye, asaba ibihugu byose gukorana kugira ngo hafatwe ingamba zikwiye zo guhangana na zo binyuze no mu kugeza mu butabera abakekwaho kuyigiramo uruhare.

Ni ubutumwa yatanze kuri uyu wa Kane, tariki ya 12 Gicurasi 2022, mu gikorwa cyo kwibuka ku nshuro ya 28 Jenoside yakorewe Abatutsi mu 1994.

Iki gikorwa cyabereye mu Mujyi wa Varsovie muri Pologne. Ni ku nshuro ya mbere, Abanyarwanda baba muri iki gihugu bifatanyije n’inshuti zabo kwibuka Abatutsi bishwe bazira uko bavutse.

Cyitabiriwe n’Abanyarwanda baba n’abiga muri Pologne; inshuti zabo ndetse n’abayobozi bahagarariye inzego zitandukanye muri iki gihugu barimo Amb. Pawel Czerwiński, Umujyanama wa Perezida wa Pologne; Intumwa ya Papa, Arikiyepiskopi, Salvatore Pennacchio na Padiri Stanislaw Urbaniak wagizwe Umurinzi w’Igihango mu 2015 kubera uruhare rwe mu kurokora Abatutsi mu Ruhango.

Ambasaderi Prof Shyaka yasangije abitabiriye iki gikorwa amateka ya Jenoside n’ubukana yakoranywe.

Yifashishije ingero z’ibyabaye ku wa 12 Gicurasi mu 1994, agaragaza ubwicanyi bwakorewe Abatutsi i Nyabisindu muri Gitarama no mu Bisesero mu yahoze ari Perefegitura ya Kibuye.

Ati “Muri Gitarama kimwe no mu bindi bice by’u Rwanda, Abatutsi bahungiye mu nsengero batekereza ko bari buhakirire. Kuri uyu munsi mu myaka 28 ishize, Abatutsi 120 biciwe mu rusengero rwa ADEPR Nyabisindu aho bari bahungiye. Abakobwa n’abagore bafashwe ku ngufu, baratotezwa kugezwa bishwe. Turabibuka.’’

Yongeyeho ko ku wa 12 Gicurasi ari bwo mu Bisesero abicanyi biraye mu Batutsi bageragezaga kwirwanaho ariko imbaraga zikaza kubashirana bakicwamo benshi ku munsi wakurikiyeho kuko nta butabazi bari bafite.

Ati “Ingabo za FPR zari zikirwana n’ingabo zakoze Jenosise mu Burasirazuba no mu Majyepfo, zitaragera mu Burengerazuba bw’igihugu. Icyo gihe Isi yarareberaga.’’

Ambasaderi Prof Shyaka yavuze ko Abanyarwanda bibuka, bakanunamira Abatutsi barenga miliyoni bishwe muri Jenoside, hagamijwe guharanira ko babona ubutabera kandi na Jenoside ntizongere ukundi.

Yakomeje ati “Jenoside ni icyaha cy’indengakamere kandi gifite ingaruka zikomeye cyane. Ibihugu byose bikwiye kwita no gukorana mu gushyiraho ingamba zifasha mu kwirinda kugwirwa n’ubwo bwicanyi.

“Ni n’ingenzi kurwanya urwango n’ingengabitekerezo ya Jenoside mu guharanira kubaka amahoro arambye.’’

Abanyarwanda baba muri Pologne bibutse Jenoside yakorewe Abatutsi mu gihe havugwa abagerageza guhunga ubutabera mu bihugu by’amahanga.

Ubushinjacyaha bwashyizeho itsinda rishinzwe gutegura impapuro zohererezwa ibihugu by’amahanga zisaba ko abagize uruhare muri Jenoside yakorewe Abatutsi babituyemo bafatwa. Kuva mu 2007 kugeza mu mwaka ushize, bwari bumaze kohereza impapuro 1146 mu bihugu 33 byo muri Afurika n’ahandi.

Yavuze ko hari abarenga 1000 bidegembya mu mahanga. Ati “Turahamagarira ubufatanye bw’umuryango mpuzamahanga no kumva inshingano zo gushyira iherezo ku muco wo kudahana abakekwaho Jenoside yakorewe Abatutsi mu 1994.’’

Umujyanama wa Perezida wa Pologne, Amb. Pawel Czerwiński, yavuze ko buri wese afite inshingano zo kwibuka Abatutsi bishwe muri Jenoside no kurwanya abayirwanya.

Ati “Ni ingenzi guhangana n’abahakana Jenoside. Dufite umuco wo guhakana no gupfobya. Mu gihe kwibuka byarangira, byazagorana kurinda ikiremwamuntu kudahura n’ibyo cyanyuzemo.’’

Yavuze ko umuryango mpuzamahanga ukwiye gukorana mu kwirinda imvururu imbere mu gihugu no ku rwego mpuzamahanga.

Igikorwa cyo kwibuka muri Pologne cyatangijwe hacanwa Urumuri rw’icyizere nk’ikimenyetso cy’icyizere cy’ahazaza ndetse banasangijwe umuvugo ukubiyemo ubutumwa bwo kwibuka no kwiyubaka.

Ku wa 7 Mata 2022, ni bwo u Rwanda rwatangije Icyumweru cy’Icyunamo n’Iminsi 100 yahariwe kwibuka no kuzirikana ku nshuro ya 28 Jenoside yakorewe Abatutsi mu 1994, igahitana abarenga miliyoni mu mezi atatu.

Iki gikorwa cyabanjirijwe no gucana urumuri rw'icyizere
Ambasaderi w’u Rwanda muri Pologne, Prof Shyaka Anastase, yasabye ibihugu gukorana kugira ngo hafatwe ingamba zikwiye zo kugeza mu butabera abakekwaho kugira uruhare muri Jenoside yakorewe Abatutsi
Umutoni Pascaline wayoboye igikorwa cyo kwibuka Jenoside yakorewe Abatutsi muri Varsovie
Umujyanama wa Perezida wa Pologne, Amb. Pawel Czerwiński, yashimye uko u Rwanda rwiyubatse rukaba ari igihugu gitanga umusanzu mu bice bitandukanye
Umuyobozi muri University of Life Sciences SGGW akaba na Visi Perezida wa Conference of Polish Universities' Rectors, Prof. Michal Zasada, mu bitabiriye iki gikorwa
Amb. Shyaka Anastase yitabiriye iki gikorwa ari kumwe na Madamu we
Umuyobozi wa Diaspora muri Pologne, Nyombayire Allan, yitabiriye igikorwa cyo kwibuka
Joanna Kos Krauze ufite izina mu gutunganya filime akaba n'inshuti y'u Rwanda na we yitabiriye igikorwa cyo kwibuka Jenoside yakorewe Abatutsi
Hacanwe urumuri rw'icyizere cy'ahazaza h'u Rwanda
Hacanywe urumuri rw'icyizere
Padiri Stanislas Urbaniak yatanze ikiganiro-buhamya, uko yabashije k’ubw’Imana kurokora Abatutsi 500 bari bamuhungiyeho, interahamwe zishaka kumwica kugeza aho Inkotanyi zihagereye
Abitabiriye bakurikiranye ubuhamya n'ibiganiro bitandukanye byatanzwe
Abanyarwanda baba muri Pologne bifatanyije n'inshuti zabo kwibuka ku nshuro ya 28 Jenoside yakorewe Abatutsi
N'abanyamahanga bitabiriye iki gikorwa
Abitabiriye bafata ifoto y'urwibutso

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .