00:00:00 IGIHE NETWORK KN KINYARWANDA EN ENGLISH FR FRANCAIS

Pologne: Kwibuka nibihagarara, kurwanya Jenoside ntibizaba bifite ishingiro- Amb. Czerwnski

Yanditswe na Karirima A. Ngarambe
Kuya 18 May 2022 saa 06:52
Yasuwe :

Umujyanama wa Perezida wa Pologne mu bya Politiki Mpuzamahanga, Ambasaderi Pawel Czerwinski, yavuze ko ibikorwa byo kwibuka Jenoside yakorewe Abatutsi ari ingenzi mu rugamba rwo kurwanya ko yazagira ahandi iba ku Isi.

Ni mu kiganiro yagiranye na IGIHE nyuma y’igikorwa cyo kwibuka ku nshuro ya 28 Jenoside yakorewe Abatutsi cyabereye muri Pologne, cyabaye ku wa 12 Gicurasi 2022.

Ambasaderi Pawel Czerwinski yavuze ko kwibuka Jenoside yakorewe Abatutsi ari umwanya wibutsa ibindi bikorwa bibi byabaye nyuma y’Intambara ya Kabiri y’Isi n’uburyo Isi yose yababaye, ikiyemeza ko ibikorwa by’ubugome nka jenoside bitazongera kubaho ku Isi, ariko ikaza kuba no mu Rwanda.

Ati “Byarabaye ariko inshingano zacu uyu munsi ni ukwibuka duha agaciro abahitanywe na Jenoside n’abagizweho ingaruka n’aya makuba kandi tugomba gukura isomo mu byabaye.”

Yavuze ko ari ingenzi kurwanya ihakana ry’ibyaha nk’ibi kubera ko haba kuri Jenoside yakorewe Abayahudi, ku yo muri Combodge, muri Bosnie no mu Rwanda, usanga abahakana mbere na mbere bavuga ko nta cyabaye, ubundi bakavuga ko atari Jenoside.

Yakomeje agira ati “Dufite umuco nk’uwo wo guhakana kandi ni ngombwa kubirwanya kubera ko kwibuka nibihagarara, kurwanya ko ibintu nk’ibyo byongera kubaho ntibizaba bifite icyo bishingiyeho.”

Indi ngingo ikomeye Amb. Pawel yagarutseho ni uko umuryango mpuzamahanga ugomba gukorera hamwe hagafatwa ingamba zikumira ihohotera haba muri politiki z’imbere mu bihugu cyangwa mu butwererane mpuzamahanga.

Buri wese ngo agomba kubigiramo uruhare mu guharanira ko ihohotera ritaba uburyo bwo gukemura ikibazo icyo ari cyo cyose.

Yanavuze ko hagomba gushyirwaho uburyo ibyaha bikozwe na buri gihugu cyangwa buri munyapolitiki mu gice icyo ari cyo cyose cy’Isi bitinze cyangwa bitebutse yabiryozwa kubera ko ari bwo buryo bwiza bwo kurinda ko bitazongera kubaho.

Ati “Icyaha ntikigomba kureka guhanwa, ni yo mpamvu Pologne yafashije inkiko mpuzamahanga mu gukurikirana ibyaha bya Jenoside yakorewe Abatutsi mu Rwanda. Ibyabaye birababaje ariko tugomba no kureba imbere.”

Yashimye intambwe u Rwanda rwateye mu iterambere ry’ubukungu, uburezi n’uburyo rutanga umusanzu ukomeye muri politiki mpuzamahanga no kubungabunga amahoro ku Isi.

Mu rwego rwo kwagura imibanire hagati ya Pologne n’u Rwanda, biteganyijwe ko hazafungurwa Ambasade y’iki gihugu i Kigali, bikazagira uruhare runini mu kwagura ubufatanye hagati y’ibihugu byombi n’uburyo bigira uruhare mu bikorwa bitandukanye mu bindi bihugu.

Umujyanama wa Perezida wa Pologne, Amb. Pawel Czerwiński, yashimye uko u Rwanda rwiyubatse rukaba ari igihugu gitanga umusanzu mu bice bitandukanye
Amb. Prof. Shyaka agaira na Amb. Pawel Czerwnski, Umujyanama wa Perezida wa Pologne n’Intumwa ya Papa muri Pologne, Salvatore Pennacchio
Amb. Prof. Shyaka na madamu we (uri hagati) na Amb. Pawel Czerwnski, bakurikiye ibiganiro byo kwibuka Jenoside yakorewe Abatutsi byabereye mu Mujyi wa Varsovie

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .