Norvège: Hibutswe Jenoside yakorewe Abatutsi, urubyiruko rugaragazwa nk’icyizere cy’ejo hazaza

Yanditswe na IGIHE
Kuya 13 Mata 2021 saa 12:03
Yasuwe :
0 0

Umuryango ‘Urukundo’ washinzwe n’Abanyarwanda baba muri Norvège wateguye umuhango wo kwibuka ku nshuro ya 27 Jenoside yakorewe Abatutsi, hagaragazwa icyizere cy’ahazaza biturutse ku rubyiruko rwavutse nyuma ya Jenoside rwiyemeje no guhashya abahakana bakanapfobya Jenoside.

Uwo muhango wabaye kuwa Gatandatu tariki 10 Mata 2021 ukorwa hifashishijwe ikoranabuhanga mu rwego rwo kwirinda icyorezo cya Covid-19. Ni igikorwa urubyiruko rwahawemo umwanya ukomeye mu kumenya no gusigasira amateka y’ababyeyi babo.

Umuryango “Urukundo” washinzwe n’Abanyarwanda bishyize hamwe muri Norvège mu 1998. Impamvu ya mbere yo kuwushinga kwari ugushyira imbere igikorwa cyo kwibuka amateka ya Jenoside yakorewe Abatutsi, kurwanya ingengabitekerezo ya Jenoside cyangwa kuyipfobya no guha urugero rwiza urubyiruko ngo rutazagwa mu mutego mubisha.

Abatanze ibiganiro uwo mugoroba harimo Ambasaderi Christine Nkulikiyinka uhagarariye u Rwanda mu Burayi bw’Amajyaruguru; Peter Mugisha uhagarariye Umuryango w’Abanyarwanda batuye muri Norvège; Sugira Fidèle utuye muri Norvège akaba umwe mu bagize umuryango ‘Urukundo’ wanatanze ubuhamya bw’ubuzima bwe muri Jenoside yakorewe Abatutsi i Butare aho yari aherereye.

Ni umuhango kandi witabiriwe na Egide Nkuranga uyobora Umuryango Ibuka-Rwanda; Reverend Dr Antoine Rutayisire na Judence Kayitesi wanditse igitabo yise ‘A Broken life’ kivuga ku mateka ye muri Jenoside yakorewe Abatutsi n’uko yarokotse.

Umunyamakuru Karirima Ngarambe Aimable yagarutse ku biganiro bijyana n’ubuhamya n’ibitabo byanditswe cyane cyane ku mateka ya Jenoside yakorewe Abatutsi n’uburyo bimenyekanishwa biciye mu itangazamakuru.

Umuhanzi Bonhomme Rwamihire yaririmbye indirimbo ze zifasha cyane mu gihe cyo kwibuka.

Marie Chantal Muhigana uyubora Umuryango ‘Urukundo’ yashimiye abantu bose bifatanyije n’uwo muryango kwibuka inzirakarengane zishwe muri Jenoside yakorewe Abatutsi.

Yashimiye Kayitesi Judence wagize ubutwari bwo gusangiza abandi ubuhamya bw’uburyo yahizwe muri Jenoside n’uko yarokotse, amuhumuriza amubwira ko ntawe uzongera kumuhiga kuko ‘Inkotanyi zamurokoye ntaho zagiye.’

Muhigana yaboneyeho gushima urubyiruko cyane cyane urwavutse nyuma ya Jenoside, avuga ko rutanga icyizere ku gusigasira amateka no kubaka ejo hezaza heza.

Ati “Ndagira ngo mfate umwanya wihariye nshime abana bacu bavutse nyuma ya Jenoside yakorewe Abatutsi. Ubutumwa bukomeye batanze buhesha icyubahiro abazize akarengane muri Jenoside, abenshi bakaba batazamenya ba sekuru na ba nyirakuru ariko bifuza gukomeza gusigasira amateka y’umuryango wabo bakomokamo n’igihugu muri rusange”.

Yakomeje agira ati “Bana bacu muri urumuri rw’icyizere.”

Yavuze ko ikibazo gihangayikishije muri iyi minsi ari ihakana n’ipfobya bya Jenoside yakorewe Abatutsi bikomeje kwigaragaza mu itangazamakuru n’imbuga nkoranyambaga. Muhigana yasabye abarokotse gukomeza gushikama no guhangana n’abo bashaka guhindura amateka.

Ati “Duhanganye n’ikibazo kigenda gifata umurego cyo gupfobya Jenoside yakorewe Abatutsi aho bikorerwa ku mbuga nkoranyambaga, mu binyamakuru binyuranye cyane cyane iby’i Burayi nka za BBC ndetse no mu buzima busanzwe. Ntibigomba kuduca intege ngo bitubuze kwibuka abacu mu cyubahiro, ahubwo tugomba kugira imbaraga zo kubirwanya no kubitsinda.”

Yakomeje agira ati “Guhakana no gupfobya Jenoside ni ibintu bigomba kwamaganwa, ntibigomba kwihanganirwa kuko utabona ko Jenoside ari mbi, ni uko ashobora kuyishyigikira.”

Yagaragaje ko icyatumye Jenoside yakorewe Abatutsi iba abantu barebera ari umuco wo kudahana wari umaze igihe warimitswe guhera mu 1959 ubwo Abatutsi bicwaga, bagasahurwa, bakameneshwa ntihagire ubiryozwa, bikongera mu 1973, 1990, 1992 hose ababigizemo uruhare ntibahanwe.

Ati “Uko kudahana ikibi byatumye habaho Jenoside yakorewe Abatutsi mu 1994 ku manywa y’ihangu, Isi yose irebera. Kwamagana abapfobya Jenoside si ukuba intagondwa, si ugukwiza urwango, ni ugukumira imitekerereze mibi ishakira inyoroshyacyaha Jenoside yakorewe Abatutsi. Twese hamwe dukwiye guharanira ko itazongera ukundi.”

Yavuze ko uko byagenda kose ukuri kuzatsinda, dore ko n’amahanga yari yarinangiye kwemera Jenoside yakorewe Abatutsi yatangiye kuyemera.

Ati “Abacu bishwe ntibazabure kirengera twarasigaye. Duterwe imbaraga n’uko igihugu cyacu gifite ubuyobozi bwiza kandi bushoboye, giharanira kurwanya uwakoze icyaha agashakishwa agashyikirizwa ubutabera. Wowe warokotse Jenoside, wowe wabuze abawe wakundaga, ubwo uriho, ndiho. Ukubaho kwawe ni zo mbaraga zanjye! Dukomeze dushyire hamwe, duharanire ko Jenoside itazongera ukundi.”

Yashimiye ingabo za FPR Inkotanyi zatabaye abicwaga zigahagarika Jenoside, zikabikora nta bindi bihembo ziharanira. Yashimiye kandi ubuyobozi bwiza u Rwanda rufite bwita ku barokotse, bwanashyizemo amategeko ahana ingengabitekerezo ya Jenoside.

Muhigana yavuze ko mu gihe hibukwa abazize Jenoside yakorewe Abatutsi, ari ngombwa kwibuka n’abayirokotse ariko bagasigarana ibikomere n’ubumuga n’ababyeyi bakuze basizwe ari incike.

Ni muri urwo rwego ku bufatanye na Ibuka Rwanda hashyizweho agaseke ko gufasha abo basigaranye ibikomere, aho buri wese ufite ubushake atanga uko yifite.

Ku ikubitiro, ako gaseke kashyizwemo miliyoni 5 Frw ariko gufasha biracyakomeje ku muntu wese ubishaka.

Ushaka gutanga inkunga yakwifashisha konti y’umuryango Urukundo, IBAN: NO13 05322991594. BIC (Swift-adresse) DNBANOKK

Marie Chantal Muhigana uyobora Umuryango Urukundo yavuze ko hari icyizere ko nta Jenoside izongera kubaho kubera umuhate w'urubyiruko rwavutse nyuma ya Jenoside
Ambasaderi Christine Nkulikiyinka uhagarariye u Rwanda mu Burayi bw’Amajyaruguru yashimishijwe n’uko abana basobanurirwa amateka u Rwanda rwanyuzemo kugira ngo bamenye uko bitwara kandi bashyire imbere amahoro mu gihugu cyabo
Peter Mugisha, uhagarariye Umuryango w’Abanyarwanda batuye muri Norvège, ubwo yavugaga ijambo
Judence Kayitesi yanditse igitabo ku mateka ye yabayemo muri Jenoside yakorewe Abatutsi mu 1994, igitabo yise “A Broken life”. Muri uyu muhango yatanzemo ubuhamya
Muhigana Félix umwe mu bagize Umuryango Urukundo wafatanyije na Claude Nduwayo kuyobora uyu muhango wo kwibuka ku nshuro ya 27 Jenoside yakorewe Abatutsi mu 1994 mu Rwanda
Umuyobozi wungirije w'Umuryango "Urukundo", Nduwayo Claude
Révérend Dr Antoine Rutayisire, yatanze ikiganiro ku mateka yaciyemo n'ingero nyinshi zafasha abacitse ku icumu rya Jenoside yakorewe Abatutsi kumva ko batari bonyine. Yavuze no ku mateka na we yaciyemo atoroshye muri Jenoside mu buryo bwo gufasha urubyiruko kudaheranwa n'agahinda
Sugira Fidèle utuye muri Norvège, ni umwe mu bagize umuryango Urukundo watanze ubuhamya bw’ubuzima bwe muri Jenoside yakorewe Abatutsi
Egide Nkuranga uyobora Ibuka-Rwanda, yamaganye cyane ubutumwa bucishwa ku mbuga nkoranyambaga bugamije gutoneka Abacitse ku icumu rya Jenoside yakorewe Abatutsi, akangurira bantu kubyitondera no kubirwanya

Bamwe mu rubyiruko rwavuze imivugo n’abatanze ubutumwa muri uwo muhango


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .