00:00:00 IGIHE NETWORK KN KINYARWANDA EN ENGLISH FR FRANCAIS

Massamba na Bruce Melodie bataramanye n’Abanyarwanda bo muri Norvège

Yanditswe na Karirima A. Ngarambe
Kuya 8 May 2022 saa 04:33
Yasuwe :

Abahanzi Massamba Intore na Bruce Melodie bitabiriye igitaramo cyabereye muri Norvège cyahurije hamwe Abanyarwanda n’inshuti z’u Rwanda batuye muri iki gihugu no mu bindi byo mu Majyaruguru y’u Burayi.

Iki gitaramo cyabaye mu ijoro rishyira ku wa 8 Gicurasi 2022 cyateguwe mu rwego rwo gushyigikira umushinga wo gutunganya no kubika indirimbo nyarwanda hakoreshejwe ikoranabuhanga.

Igikorwa cyo gukusanya no kubika indirimbo nyarwanda mu ikoranabuhanga cyatangiye gushyirwa mu bikorwa ku bufatanye bwa Kaminuza ya Agder muri Norvège, Guverinoma y’u Rwanda binyuze muri Ambasade yayo mu bihugu by’Amajyaruguru y’u Burayi na ’Rwandan Cultural Heritage Academy.’

Ni mu mushinga witwa ‘Cultural Heritage Digitalization’ uzamara imyaka itatu nk’uko byagarutsweho na Prof. Ghislain Maurice Norbert Ishimwe, Umwarimu muri Kaminuza ya Agder.

Yavuze ko indirimo zizakusanywa zizakurwa mu bice bitandukanye harimo iza kera uhereye mu bihe by’ubukoloni zibikwe hakoreshejwe ikoranabuhanga hirindwa ko zazimira ahubwo zibashe kugera ku bantu benshi.

Ambasaderi w’u Rwanda muri Norvège, Dr Gashumba Diane, yashimiye abagize uruhare kugira ngo iki gikorwa gishoboke barimo Abanyarwanda baba muri iki gihugu na Kaminuza ya Agder, leta y’u Rwanda binyuze muri Minisiteri y’Urubyiruko n’Umuco n’ubuyobozi bwa Ambasade.

Ati “Ndabashimiye, mwashyigikiye igikorwa cyo kubika neza umuziki w’u Rwanda kugira ngo udatakara. Twazanye u Rwanda hano muri Norvège, twazanye ikawa, twazanye umuganda, twazanye umuco wacu, twazanye abahanzi, twazanye urukundo.”

Intore Massamba na Bruce Melodie basusurukije abitabiriye iki gitaramo mu ndirimbo zitandukianye.

Uretse Abanyarwanda batuye muri Norvège, iki gitaramo cyanitabiriwe n’abaturutse mu bihugu by’u Burayi bw’Amajyaruguru byose nka Finland, Suède na Danemark. Harimo kandi inshuti z’u Rwanda, Abarundi, Abanya-Tanzania, Abanye-Congo ndetse n’Abanyarwanda baturutse mu Bubiligi.

Uretse iki gitaramo, habaye n’igikorwa cy’umuganda nka kimwe mu bikorwa by’umwihariko w’u Rwanda ndetse hanamurikwa ikawa y’u Rwanda muri Norvège. Uwitabiriye wese yahawe ikawa y’u Rwanda mu rwego rwo kurushaho kuyimenyekanisha.

Hashimiwe Minisiteri y’Urubyiruko n’Umuco; Ikigo cy’Ingoro z’Umurage na RwandAir ku bufatanye bwabo muri iki gikorwa aho ari kimwe mu byahuriyemo Abanyarwanda n’inshuti zabo muri iyi minsi nyuma y’imyaka irenga ibiri batabasha guhura kubera icyorezo cya Covid-19. Abanyafurika bo mu Karere bitabiriye ari benshi bishimira uko u Rwanda ruhuza abenegihugu barwo.

Bruce Melodie hamwe n'itsinda ryamucurangiye
Ibyishimo byabasabye barahaguruka bacinya akadiho
Iki gikorwa ni kimwe mu byahurije hamwe Abanyarwanda benshi muri iki gihugu nyuma y'imyaka ibiri bidashoboka kubera icyorezo cya Covid-19
Abitabiriye iki gitaramo bagaragazaga akanyamuneza ku maso bigaragaza ko bishimiye guhurira hamwe
Benshi bahagurutse bafasha Massamba gucinya umudiho
Ambasaderi w'u Rwanda mu bihugu byo mu Burayi bw'Amajyaruguru, Dr Gashumba Diane yamuritse ikawa y'u Rwanda
Bruce Melodie ubwo yari ageze ku rubyiniro yiteguye gususurutsa abari bamukurikiye
Ambasaderi Dr Gashumba mu bagaragaje ko banyuzwe n'iki gitaramo
Bruce Melodie yaririmbye zimwe mu ndirimbo ze zikindwa na benshi
Iki gitaramo cyateguwe mu rwego rwo gushyigikira umushinga wo kubika mu ikoranabuhanga indirimbo nyarwanda
Prof. Ghislain Maurice Norbert Ishimwe, Umwarimu muri Kaminuza ya Agder asobanura imiterere y'umushinga wo kubika indirimbo nyarwanda hakoreshejwe ikoranabuhanga
Abanyarwannda batuye muri Norvège no mu bindi bihugu byo mu Majyaruguru y'u Burayi bitabiriye iki gitaramo ari benshi
Massamba yataramanye n'abitabiriye igitaramo cyo gushyigikira igikorwa cyo kubika indirimbo nyarwanda hakoreshejwe ikoranabuhanga cyabereye Oslo muri Norvège
Bruce Melodie hamwe n'itsinda ryamucurangiye
Sugira Fidèle, umuhuzabikorwa w’iki gikorwa, ubwo yafunguraga igitaramo
Amb. Diane Gashumba n’umuhungu we bishimiye Abahanzi
Urugwiro rw’abanyarwanda n’umuhanzi Bruce Mélodie

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .