Kwibuka26: Amb. Yasmin Amri Sued yasabye urubyiruko kurushaho gukurikirana amateka y’u Rwanda

Yanditswe na Twarabanye Venuste
Kuya 14 Mata 2020 saa 05:07
Yasuwe :
0 0

Ambasaderi w’u Rwanda muri Koreya y’Epfo, Yasmin Amri Sued yabwiye urubyiruko ko ari rwo musingi uzatuma amateka mabi ya Jenoside yakorewe Abatutsi mu 1994 atagira ahandi aba ku Isi, arusaba kurushaho kumenya amateka y’u Rwanda.

Ni ubutumwa, Amb. Yasmin Amri Sued yahaye urubyiruko rwitabiriye umuhango wo Kwibuka ku nshuro ya 26 Jenoside yakorewe Abatutsi wabereye muri Koreye y’Epfo, ku cyumweru tariki 12 Mata 2020, witabiriwe n’abanyarwanda baba muri icyo gihugu n’abo muri Cambodia bose hamwe bagera kuri 78.

Nyuma yo guhurizwa ku ikoranabuhanga kuko guhurira hamwe bitashobokaga kubera COVID-19, ibiganiro byatangijwe n’umunota wo Kwibuka.

Umuyobozi w’Umuryango w’Abanyarwanda baba muri Koreya y’Epfo, Abdul Karim Uzabakiriho, yavuze ko hakiri ikibazo cy’abakoze Jenoside bakidegembya kandi bakomeje gukwirakwiza ubutumwa bw’urwango.

Yavuze ko Imiryango mpuzamahanga irimo Umuryamgo w’abibumbye, Umuryango w’Ubumwe bw’u Burayi, Umuryango uharanira ubufatanye mu bukungu n’Iterambere (OECD), n’indi ifite inshingano zo gufatanya na Guverinoma y’u Rwanda n’abanyarwanda kurwanya ibyo bikorwa bibi.

Mu buhamya Alex Rugamba, wacitse ku icumu rya Jenoside akaba asoje amasomo muri kaminuza ya Konkuk, yavuze ko yari afite imyaka itandatu y’amavuko mu 1994 ubwo Jenoside yakorwaga, aho yabonye Se n’abavandimwe batandatu bicwa n’Interahamwe.

Yasangije abandi amateka y’inzira ikomeye yanyuzemo kugeza ubwo ingazo za RPA zihagaritse Jenoside akarokoka.

Rugamba yashimiye Guverinoma y’u Rwanda kuri gahunda yashyizeho zo gufasha abarokotse Jenoside, agaruka ku Kigega cya FARG, kinyuzwamo ubufasha burimo; kubakira amacumbi abarokotse, kwishyurira abana amashuri, gutanga ubuvuzi, Girinka ku barokotse n’izindi.

Amb. Yasmin Amri Sued u Rwanda rwafashe igihe cyo kumva imizi y’icyateye Jenoside no gusesengura ibikorwa biganisha kuri Jenoside asaba urubyiruko kwihatira kubimenya.

Ati “Rubyiruko rw’u Rwanda ndabasaba ngo mushyireho, mubyumve, munabisangizanye mumenye amateka yacu. Ni mwe musingi wo kugira ngo ibyabaye mu myaka 26 ishize bitazongera kubaho mu Rwanda n’ahandi ku Isi.”

Abahagarariye inyungu z’ibuhugu byabo muri Koreya y’Epfo, bifatanyije n’abanyarwanda batanga ubutumwa butandukanye.

Ambasaderi Hazem Fahmy uhagarariye Misiri i Seoul, yifurije Abanyarwanda amahoro n’uburumbuke. Ambasaderi Sylvestre Kouassi Bile wa Côte d’Ivoire, ashimangira ko urumuri rw’icyizere rugomba guhora rwaka kugira ngo Jenoside itazongera mu Rwanda n’ahandi ku Isi.

Amb. Matilda Masuka wa Tanzania, we yagize ati “Twifatanyije n’abavandimwe b’abanyarwanda kuvuga ngo ‘Ntibizongere kubaho ukundi’. Mu gihe dukomeje kubaka ibihugu byacu, tuzi ko ntacyo twageraho tudafatanyije ibyo Perezida Kagame yabyerekanye mu bikorwa bye.”

Hari kandi Ambasaderi Shiferaw Shigute Wolassa wa Ethiopia, washimye ibyo abanyarwanda n’abayobozi barwo bagezeho nyuma y’amateka mabi ya Jenoside yakorewe Abatutsi.

Ambasaderi Yasmin Amri Sued yasabye urubyiruko kumenya amateka y'u Rwanda no kuyamenyekanisha
Umuyobozi w’Umuryango w’Abanyarwanda baba muri Koreya y’Epfo, Abdul Karim Uzabakiriho, yavuze ko hakiri ikibazo cy’abakoze Jenoside bakidegembya kandi bakomeje gukwirakwiza ubutumwa bw’urwango
Alex Rugamba, wacitse ku icumu rya Jenoside akaba asoje amasomo muri kaminuza ya Konkuk yatanze ubuhamya bw'uburyo yabuze papa we n'abavandimwe be muri Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .