Koreya y’Epfo: Abanyarwanda basabwe kongera imbaraga mu guhashya udutsiko tw’abahakana Jenoside

Yanditswe na IGIHE
Kuya 7 Mata 2021 saa 07:58
Yasuwe :
0 0

Abanyarwanda baba muri Koreya y’Epfo n’inshuti z’u Rwanda bifatanyije kuri uyu wa Gatatu, tariki 7 Mata 2021, kwibuka ku nshuro ya 27 Jenoside yakorewe Abatutsi, basabwa imbaraga mu guhashya udutsiko tw’abagishaka guhakana no gupfobya iyo Jenoside.

Iki gikorwa cyakozwe hifashishijwe ikoranabuhanga kubera ibihe Isi irimo byo kwirinda icyorezo cya Covid-19.

Icyo gikorwa cyayobowe na Ambasaderi w’u Rwanda muri icyo gihugu, Yasmin Amri Sued, cyahurije hamwe abantu basaga ijana na makumyabiri, barimo abayobozi batandukanye ndetse n’Abanyarwanda batuye mu bihugu bya Koreya y’Epfo na Cambodia.

Abandi bitabiriye icyo gikorwa harimo Kim Gunn, Minisitiri wungirije ushinzwe ibya Politiki muri Minisiteri y’Ububanyi n’Amahanga ya Koreya y’Epfo, abahagarariye ibihugu byabo n’imiryango mpuzamahanga muri icyo gihugu ndetse na Ambasaderi Colin Keating watanze ikiganiro nk’inararibonye.

Ambasaderi Keating yahoze ahagarariye igihugu cye cya Nouvelle Zelande mu Muryango w’Abibumbye ndetse no mu Kanama gashinzwe Amahoro n’Umutekano ku Isi, mu gihe Jenoside yakorewe Abatutsi yakorwaga mu Rwanda mu 1994.

Igikorwa cyo kwibuka cyabimburiwe no gucana urumuri rw’icyizere, aho Ambasaderi Carlos Victor Boungou, uhagarariye Gabon muri Koreya y’Epfo, akaba ari na we Ambasaderi umaze igihe kinini muri icyo gihugu, yasabye abitabiriye uwo muhango bose gucana ururimo rw’icyizere bari bateguye buri umwe aho yaherereye hose.

Minisitiri Kim Gunn yavuze ko mu izina rya Guverinoma ya Koreya, igihugu cye cyifatanyije n’Abanyarwanda muri ibi bihe byo kwibuka ku nshuro ya 27 Jenoside yakorewe Abatutsi mu Rwanda. Yongeraho ko igihe nk’iki cyo kwibuka gihabwa uburemere bukomeye mu gihugu cye kigeze gusenyuka, kikanabura abacyo babarirwa muri za miliyoni, ubu kikaba cyarongeye kwiyubaka.

Kim Gunn yavuze ko igihe nk’iki ari icyo gushimangira ingamba zo guharanira ko Jenoside atakongera kubaho aho ariho hose ku Isi.

Yatanze urugero ko bikorwa by’ivanguraruhu bikorerwa abirabura ndetse n’Abanya-Aziya, aboneraho gusaba abitabiriye uwo muhango kwamagana bivuye inyuma ibyo bikorwa by’ivangura kugira ngo ibyabaye mu Rwanda mu gihe cya Jenoside yakorewe Abatutsi bitazongera kubaho ukundi.

Ambasaderi Colin Keating yasobanuye uburyo Umuryango w’Abibumbye wateshutse ku nshingano zawo zo gutabara u Rwanda n’Abatutsi bari barimo guhigwa no kwicwa mu gihugu. Yavuze ko Jenoside yakorewe Abatutsi mu 1994 yateguwe igashyirwa mu bikorwa na leta yariho icyo gihe.

Yatanze umukoro ku bantu bose kwifatanya n’Abanyarwanda mu rugamba rwo kurwanya abahakana Jenoside yo mu 1994 yakorewe Abatutsi mu Rwanda ndetse no guhora baharanira ko ibyabaye mu Rwanda bitazongera kubaho.

Ambasaderi Colin Keating yavuze ko bishimishije kubona u Rwanda kuri ubu rufite umutekano usesuye, ubu rutera imbere, kandi rugira uruhare mu kugarura amahoro n’ahandi ku Isi.

Ambasaderi w’u Rwanda muri Koreya y’Epfo, Yasmin Amri Sued, yashimiye abitabiriye uyu muhango wo kwifatanya n’Abanyarwanda kwibuka Jenoside.

Yavuze ku mateka ya Jenoside yakorewe Abatutsi mu Rwanda kuva mu itegura ryayo kugeza mu ishyirwa mu bikorwa, bigizwemo uruhare n’ubuyobozi bubi bwari buriho.

Ambasaderi Amri Sued yavuze ko Jenoside yo mu 1994 yakorewe Abatutsi mu Rwanda yaje guhagarikwa n’Abanyarwanda batabaye igihugu, bagizwe n’ingabo zahoze ari iza RPA zari ziyobowe na Perezida Paul Kagame.

Yavuze ko guhera ubwo u Rwanda ruharanira ubumwe mu gihugu himakazwa indangagaciro z’ubunyarwanda, ubwiyunge, ubutabera, gukorera hamwe, kwishakamo ibisubizo no guharanira iterambere rirambye.

Ambasaderi Amri Sued yasabye abahagarariye ibihugu byabo n’imiryango mpuzamahanga kurwanya bivuye inyuma udutsiko tugenda twaguka hirya no hino tw’abapfobya n’abahakana Jenoside yakorewe Abatutsi mu Rwanda.

Yavuze ko utwo dutsiko tugizwe n’abaharanira guhindura amateka ya Jenoside yakorewe Abatutsi, baharanira kugira abere abayikoze no gusiga icyasha abayikorewe, abarokotse ndetse n’abayihagaritse.

Yongeraho ko bamwe muri bo bashigikiwe n’utundi dutsiko twa bamwe mu banyamahanga babatiza umurindi muri ibyo bikorwa by’ihakana n’ipfobya bya Jenoside yakorewe Abatutsi. Yasabye abitabiriye uwo muhango kurwanya bivuye inyuma iyo ngengabitekerezo mbi ya Jenoside n’amacakubiri.

Jenoside yakorewe Abatutsi mu 1994 yahitanye Abatutsi basaga miliyoni mu minsi ijana.

Ambasaderi Amri Sued yasabye amahanga gufasha u Rwanda mu guhashya udutsiko tw'abapfobya Jenoside yakorewe Abatutsi
Ubutumwa bwose bwatanzwe ni ubugaruka ku mateka ya Jenoside yakorewe Abatutsi n'icyakorwa ngo jenoside itazagira ahandi iba
Abahagarariye ibihugu byabo ndetse n’Abanyarwanda batuye mu bihugu bya Koreya y’Epfo na Cambodia basaga ijana ni bo bakurikiye uyu muhango
Minisitiri wungirije ushinzwe ibya Politiki muri Minisiteri y’Ububanyi n’Amahanga ya Koreya y’Epfo, Kim Gunn, yavuze ko ibyabaye mu Rwanda bidakwiriye kugira ahandi biba
Hatanzwe ubutumwa butandukanye binyuze muri filime mbarankuru igaragaza amateka ya Jenoside yakorewe Abatutsi n'uko Abanyarwanda bongeye kubana nyuma ya 1994

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .