00:00:00 IGIHE NETWORK KN KINYARWANDA EN ENGLISH FR FRANCAIS

Imishinga y’Abafaransa ya miliyari zisaga 200 Frw yanditswe mu Rwanda mu myaka icumi

Yanditswe na Karirima A. Ngarambe
Kuya 5 Ukuboza 2022 saa 07:58
Yasuwe :

U Rwanda rurifuza ko ishoramari riturutse mu Bufaransa ryarushaho kwiyongera, nyuma y’uko mu myaka icumi ishize rwanditse imishinga y’ishoramari riturutse muri icyo gihugu ifite agaciro ka miliyari zisaga 197 Frw.

Byatangarijwe i Paris kuri uyu wa Mbere tariki 5 Ukuboza ubwo hatangizwaga ihuriro rigamije kumenyekanisha u Rwanda nk’ahantu habereye ishoramari.

Iri huriro ryatangiye kuri uyu wa mbere tariki 5 rikazasozwa ku wa 6 Ukuboza 2022. Ryateguwe n’Urwego rw’Igihugu rushinzwe Iterambere (RDB) Ishami ryarwo rishinzwe Ishoramari, ku bufatanye na Ambasade y’u Rwanda mu Bufaransa n’Urwego rw’abikorera mu Bufaransa (MEDEF).

Muri iri huriro hateguwe ibiganiro bihuza u Rwanda na bimwe mu bigo, n’abikorera baturuka mu mpande zitandukanye z’Isi baba mu Bufaransa.

U Bufaransa ni kimwe mu bihugu by’u Burayi gifite ishoramari rigenda ryiyongera muri Afurika, by’umwihariko mu Rwanda nyuma yo kuvugurura umubano hagati y’ibihugu byombi.

Urwego rw’Igihugu rushinzwe Iterambere (RDB) rwagaragaje ko ishoramari rivuye mu Bufaransa rijya mu Rwanda, guhera mu 2011 kugeza mu 2021 ryiyongereye rikagera ku gaciro ka $197,503 164 (asaga miliyari 200 Frw).

Mu mishinga 20 y’ishoramari yanditswe iri mu nzego zitandukanye nk’ubwubatsi bw’amacumbi aciriritse, ikoranabuhanga n’itumanaho, ubukerarugendo, urwego rw’imari n’ibindi.

Ambasaderi w’u Rwanda mu Bufaransa, François Nkulikiyimfura yabwiye IGIHE ko iri huriro ryitezweho kongera umubare w’abashoramari b’Abafaransa mu Rwanda.

Ati "Inyungu yacu ni uko birahesha akazi abanyarwanda kandi sosiyete zo mu Bufaransa zizaza gushora imari mu Rwanda. Aha abashoramari b’Abafaransa bavuze neza u Rwanda, basangiza abandi bagenzi babo ibyiza baboneye mu Rwanda, ejo n’ejobundi nibo bazatubera ba ambasaderi beza bazatuma tubona abandi bashoramari mu Rwanda."

Ambasaderi Nkulikiyimfura yavuze ko abo bashoramari basobanuriwe amahirwe y’ishoramari ari mu Rwanda mu nzego zitandukanye, ziganjemo izo igihugu gishyize imbere nk’ibikorwa remezo.

Abashoramari b’Abafaransa bakomeje kubona u Rwanda nk’ahantu ho gushora imari biturutse ku mubano mwiza uri hagati y’ibihugu byombi nyuma y’uruzinduko rwa Perezida Emmanuel Macron i Kigali muri Gicurasi 2021.

Nirwo ruzinduko rwa mbere umukuru w’u Bufaransa yari agiriye mu Rwanda mu myaka isaga icumi yari ishize. Hasinywe amasezerano atandukanye agamije inyungu ku mpande zombi.

Umuyobozi w’Ikigo TACTIS Innopolis gifite ishami mu Rwanda, kigamije guhanga udushya mu ikoranabuhanga, Stéphane Lelux, yavuze ko guhura kw’abashoramari b’Abafaransa n’u Rwanda ari ingenzi, by’umwihariko nyuma y’amezi 18 Perezida Emmanuel Macron agiriye uruzinduko mu Rwanda.

Yavuze ko mu gukomeza guteza imbere ubufatanye mu by’ubukungu, bifuza ivanwaho ryo gusora kabiri ku bicuruzwa bivuye mu Rwanda bijya mu Bufaransa cyangwa bivuye mu Bufaransa bijya mu Rwanda, ndetse ko hari icyizere ko bizashyirwa mu bikorwa mu gihe cya vuba.

Kuri ubu abashoramari benshi b’Abafaransa bakomeje gushora imari mu Rwanda.

Urugero ni nk’umushinga wiswe ‘Girinzu’ wo kubaka amacumbi aciriritse mu murenge wa Gahanga mu karere ka Kicukiro.

Ni ishoramari ry’Abafaransa Groupe Chevrillon na Stéphane Monceaux bafatanyije n’umunyarwandakazi Jacqueline Wibabara aho bifuza kujya bubaka inzu 200 buri mwaka kandi ziciriritse mu rwego rwo kugabanya icyuho cy’amacumbi aciriritse mu mujyi wa Kigali.

Sosiyete yitwa Duval Great Lakes Ltd ishamikiye kuri Sosiyete y’Abafaransa yitwa Groupe Duval nayo iri kubaka inyubako zigezweho ku Kimihurura ahahoze Minisiteri y’Ubutabera n’Urukiko rw’Ikirenga.

Hazaba hari ibikorwa bitandukanye nka hotel, amaguriro agezweho n’ibindi bikorwa by’ubucuruzi.

Ambasaderi w'u Rwanda mu Bufaransa, François Nkurikiyimfura yagaragaje amahirwe y'ishoramari u Rwanda rufite
Stéphane Lelux uyobora MEDEF avuga ijambo mu itangizwa ry'iri huriro
Philip Lucky uhagarariye RDB atanga ikiganiro
Abashoramari b'Abafaransa bagaragaje inyota yo gushora imari yabo mu Rwanda
Amb François Nkurikiyimfura yashishikarije abashoramari b'Abafaransa kubyaza umusaruro amahirwe u Rwanda rutanga
Ambasaderi François Nkurikiyimfura ubwo yari akurikiye ibiganiro byatanzwe
Amb François Nkurikiyimfura yijeje ubufatanye bwa Guverinoma y'u Rwanda mu gukomeza korohereza abashoramari
Impande zombi ziyemeje gukomeza ubufatanye bugamije iterambere rya bose

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .