Ibyo wamenya ku gitabo ’On n’oublie jamais rien’ cya Dr Gicali Marie-Josée

Yanditswe na Karirima A. Ngarambe
Kuya 12 Nzeri 2019 saa 06:22
Yasuwe :
0 0

Dr Marie Josée Gicali, ni umwe mu barokotse Jenoside yakorewe Abatutsi mu Rwanda, wize umwuga ujyanye n’ubumenyi bw’uburezi mu Kigo cya UQAM (Université du Québec à Montréal) mu Ishami ryita ku Burezi n’Amahoro mu rubyiruko.

Ni umwe mu bagize umuryango uharanira inyungu z’abacitse ku icumu rya jenoside yakorewe Abatutsi witwa Page-Rwanda ukorera muri Canada.

Mu kiganiro yagiranye na IGIHE, Dr Gicali yavuze byinshi ku gitabo yanditse akacyita ‘On n’oublie jamais rien’, bisobanuye mu Kinyarwanda ngo ‘Ntitwibagirwa’.

IGIHE: Iki gitabo wise ‘On n’oublie Jamais rien’ watekereje ute kucyandika?

Dr Gicali: Iki gitabo ni amateka maranye mu byukuri imyaka 25, kikaba gikubiyemwo ibice navuga ko ari bitatu.

Ubuto bwanjye aho nkomoka i Karongi ya Mubuga (Kibuye), igice nerekana uko twabayeho tubona jenoside itutumba tukiri bato kugeza ubwo tuyikorewe n’abo twari kumwe, hagaheruka igice cya gatatu cya nyuma ya jenoside cyo kwiyubaka, nkanongeraho ko kuvuga aya mateka ari ngombwa cyane ku bayirokotse kuko nibo ba mbere bafite byinshi byo kuvuga ngo atazavugwa uko atari.

Kwandika iki gitabo kuri njye kandi ni inshingano kugira ngo aya mateka yacu abe ari twe tuyavuga, bikongera kuba inshingano kuko ndi umubyeyi, kugira ngo abazankomokaho na bo bazamenye uko kuri batabibwiwe n’abandi, cyane cyane ko abana banjye bavukiye mu mahanga.

Ikindi ni uko nubwo nababaye cyane ariko sinaheranwe n’agahinda kuko narwanye n’ubuzima, ubu mpagaze nemye nibyo nshaka ko umwana wanjye azambonaho mbere y’ibindi bikamuha n’imbaraga, aho ari nawe akagira ishema aho guhora yigunze kuko nyina yabaye muri jenoside.

IGIHE: Muri make mu mapaje 277 agize iki gitabo wayavugaho iki ?

Dr Gicali : Buri gice cyose kigize iki gitabo cyamvuye ku mutima kuko buri cyose cyagiye gihamagara ikindi, ni uruhererekane rw’ibitekerezo.

Nagarutse cyane ku ijambo ‘Bene gihanga’ kuko ni ijambo nkunda cyane ryerekana ko ubundi abanyarwanda bari bamwe. Iri jambo rikomoza ku mateka y’uko abanyarwanda ubundi bari bateye nabishyize mu gitabo kubera ko abanyamahanga bakunze kwibaza uko twabagaho mbere y’uko tugera aho abanyarwanda bica abandi banyarwanda bagenzi babo.

Ikindi gice navuzeho, ndibuka ku itariki 24 abasirikare n’Interahamwe badusanga muri Saint Paul badusohora kujya kutwica bakatwaka indangamuntu buri wese, umwe umwe bamushyira hariya bakubwira bati wowe byarangiye wapfuye jya hariya, gupfa wabaga wabyakiriye mbese ahubwo wifuza ko bakugirira vuba, kuko sinatekerezaga ko hazongera kubaho ubuzima.

Ikindi navuze ni uburyo nabonye Data wari wararokokeye mu Bisesero, ndababara cyane kumubona nta mubiri agifite yarashenguwe n’akaga, ibintu bitagira imvugo, ariko kandi ni nabwo nongeye kumva ko ngomba kugarura ubushake bwo kubaho no kugira imbaraga.

Ikindi kintu cyongeye kumpa imbaraga zikomeye ni igihe Abasirikare ba FPR Inkotanyi batubwiraga bati nimuhumure jenoside irarangiye turayihagaritse, ni hahandi uvuga uti ibyo ndimo ni inzozi cyangwa ni filimi ndimo ndeba, ibi byose byatumye ahari urupfu haba ubuzima, ahari ukwiheba hagaruka icyizere.

Ndibuka ko ku myaka irindwi umwarimu watwigishaka yakoreshaga amagambo akomeye yatumye menya ko ndi Umututsi ubwo baduhagurutsaga mu ishuri batandukanya amoko y’abana twiganaga, ati “Utunyenzi Nkotanyi hariya, Abahutu hariya n’Abatwa.

Nta no kujya gushakira kure kuko kumvisha abantu ko ari udukoko ari utunyenzi, ujya kubica nawe abica yumva koko ko arimo akora neza yivanaho utwo tuntazi yigishijwe ko ari tubi cyane. Ni aho rero izingiro rikomeye riri mu itegurwa rya jenoside yakorewe Abatutsi.

Uretse ayo mateka ababaje nakubwiye hejuru, ngaruka kandi ku kuvuga ubwiza bw’u Rwanda, mvuga icyo kiyaga cya Kivu nakuze ndeba, nkavuga imisozi nkavuga imirambi, bikaba uburyo bwanjye bwo kumva ko byibura mfite aho nkomoka heza bikanduhura umutima.

Kuvuga ubwiza bw’u Rwanda uko nduzi ndubona byatumye mbwirwa n’abasomye iki gitabo bo mu Burayi ko bituma bataremererwa n’amateka akomeye ari mu gitabo.

IGIHE: Iyo uvuga u Rwanda wumva urwishimiye, wansobanurira ute uko abacitse ku icumu rya jenoside yakorewe Abatutsi batavanye umutima wabo aho bababariye kuko ubundi aho umuntu yagiriwe nabi ntiyifuza kuhasubira?

Dr Gicali: Kuri jye birasobanutse, si abanyarwanda bose bakunze u Rwanda kuko hari abasize baruhekuye bakagenda batanashizwe, kuri bo bumva rwaba rwahanaguritse ku ikarita y’Isi.

Kubona aho u Rwanda rwivanye naho rugeze, kuko rwa Rwanda rwabakomerekeje muri jenoside, ni rwa Rwanda rwashibutsemo igihugu kitagira uko gisa, ni u Rwanda ubu ruri kubomora imitima, ni u Rwanda ruduha ishema n’icyizere cyo gukomeza kubaho. Ni u Rwanda rw’umutekano, rw’iterambere, ruha abantu Inka, umugore yahawe umwanya, ibi byose nabigarutseho mu gitabo.

Nk’ubu urundi rugero naguha, njya ngira ntya nkumva abana banjye bavuye ku ishuri bati wari uzi ko u Rwanda ari urwa mbere muri ibi n’ibi cyangwa rwakoze iki n’iki, ukabona ko bishimiye kugira igihugu nk’icyo bakanabivuga koko.

Nk’ubu umwana wanjye w’umuhungu niwe wabwiye se ko mu Rwanda batashye ARENA niwe wantanze kubimenya. Ni ikintu gikomeye mu kubaka imitima y’abantu bibagarurira icyizere twe barokotse cyane cyane.

Ntakubeshye iyo u Rwanda ruguma mu macakubiri sinari kuzarusubiramo bibaho, kuko jenoside irangiye numvaga ntanashaka kubyara ngo nderere muri icyo gihugu cy’amacakubiri. Kuko ubuzima nagiriye mu Rwanda, nifuzaga ko ntawankomokaho cyangwa undi wese nabwifuriza.

Ariko mujya mwibuka ko nta bwoko bukiba mu ndangamuntu, hari igihe mbyibuka nkasesa urumeza.

Ibintu nagarutseho muri iki gitabo ni no kwerekana ko u Rwanda rutarangwa n’amateka ya jenoside gusa, ko ari igihugu cy’isuku cyiza cyakira kigendwa gituje kirinzwe, nifuza ko abo tubana bambaza amakuru y’iwacu kuko mba mfite ibyiza mbabwira.

IGIHE: Tugarutse ku mateka yawe muri jenoside yakorewe Abatutsi, wowe wari he?

Dr Gicali: Icyo gihe nigaga muri Kaminuza ya Nyakinama, mu biruhuko bya Pasika twese twari turi mu rugo iwacu usibye musaza wanjye umwe wari mu mahanga. Naje kuva ku Kibuye rero tariki ya 6 Mata 1994 ngiye i Kigali, muri iryo joro nibwo abantu baraye bicwa, tubonye bikomeye bukeye duhungira muri Saint Paul. Aho rero niho namaze igihe kinini tuhihishe, nyuma nza kujyanwa muri Hotel des Mille Collines, aho twavuye tujya i Kabuga aho Ingabo za FPR Inkotanyi zari zarafashe zihagira inkambi nini yo kwakira abo bagendaga barokora muri Kigali no mu nkengero zaho.

Ku itariki ya 9 rero nibwo bateye mu rugo iwacu hicwa Mama na musaza wanjye wiciwe mu Bisesero n’abandi benshi bo mu muryango wanjye n’inshuti, ibi nabibwiwe na murumuna wanjye warokotse ubwo bwicanyi icyo gihe.

Data we yaje kurokokera mu bantu 1000 baje kurokokera mu Bisesero mu ntangiriro z’ukwezi kwa karindwi. Nyuma naje kubonana na Papa na musaza wanjye wari mu mahanga ubwo turongera turisuganya.

Nyuma rero nibwo naje muri Canada ubu nkaba nubatse mfite umugabo wo muri iki gihugu twabyaranye abana babiri, umukobwa w’imyaka 15 n’umuhungu w’imyaka 12.

Nkaba kandi ndi umwe mu bagize umuryango w’abacitse ku icumu rya jenoside yakorewe Abatutsi witwa PAGE-Rwanda

IGIHE: Mu gusoza, wowe nk’umuntu wize ibijyanye n’uburezi buganisha ku mahoro y’urubyiruko (Science de l’éduction pour la paix auprès des jeunes) muri Kaminuza ya UQAM, ni ubuhe butumwa mwaha urubyiruko ruzasoma iki kiganiro?

Dr Gicali: Ni ikibazo cyiza kuko ndagisubiza nk’ubikora kandi nk’umubyeyi.

Nize muri UQAM, niho nanakoreye ubushakashatsi. Ubu ndikorera, mfite umusinga w’uburezi bwibanda ku mahoro. Ndandika nkanatanga ibiganiro mu nama zitandukanye.

Ubundi ku Isi nta muntu uvukana urwango, ariko ibyo twahawe mu burezi iwacu, ku ishuri n’ahandi nibyo bitugira abo turibo ubu.

Nkaba nifuza ko twakomeza mu nzira yo guca ikintu cyose kibuza umuntu amahoro, burya umuntu ashobora kubaho nta ntambara arimo ariko akabaho nta mahoro afite, kwita ku bidukikije, gukora rukarwanya ubukene nabyo bituma umuntu abura amahoro.

Urubyiruko rw’uyu munsi nirwo dutezeho amahoro kuko nibo Rwanda rw’ejo nibo bayobozi b’ejo twifuza. Ibi bikaba bireba n’abakuru bikaba umuco.

Kumenya gutanga ibitekerezo byawe ukagira ijambo mu ruhame nabyo biri mu bigarura amahoro, urubyiruko rurusheho kwitekerereza rukanashishoza, kumva n’iby’abandi, kumenya kuvuga n’igihe cyo kuvuga bijyanye no gukemura ibibazo.

Njyewe rero mu gutanga ubuhamya nshinshikariza abarokotse n’abandi bose babibonye gutanga ubuhamya kuko igice cya nyuma mu bigize jenoside ni uko abayikoze bayihakana. Ibi nabyo ni ubutumwa naha urubyiruko kuba maso ntihabeho gupfobya cyangwa guhakana amateka ya jenoside yakorewe Abatutsi mu Rwanda.

Mu kinyarwanda baravuga ngo ‘Igi ryahanuye inyoni’ aba bana turera bavukiye mu Rwanda rushya nibo bazakosora ababyeyi babo (aseka) mbafitiye icyizere.

Dr Marie Josée Gicali, ni umwe mu barokotse jenoside yakorewe Abatutsi mu Rwanda
’On n’oublie jamais rien’ ni igitabo cyanditswe na Dr Gicali Marie-Josée

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza