IBUKA – Italia yizihije isabukuru y’imyaka itanu imaze ishinzwe

Yanditswe na Karirima A. Ngarambe
Kuya 23 Ugushyingo 2020 saa 06:05
Yasuwe :
0 0

Umuryango Uharanira Inyungu z’Abacitse ku Icumu rya Jenoside yakorewe Abatutsi, IBUKA – Italia, wizihije isabukuru y’imyaka itanu umaze uvutse mu muhango watangiwemo ibiganiro ku mateka igihugu cyanyuzemo n’uko cyashoboye kwiyubaka.

Uyu muhango wabaye hifashishijwe ikoranabuhanga mu rwego rwo kwirinda ikwirakwizwa ry’icyorezo cya Coronavirus, ku wa 21 ugushyingo 2020. Witabiriwe n’abanyamuryango ba IBUKA, abafatanyabikorwa bayo n’inshuti zabo.

Mu batanze ibiganiro harimo abayobora Imiryango ya Ibuka mu bihugu by’u Burayi birimo u Buholandi, u Bufaransa, u Bubiligi, u Budage, u Busuwisi ndetse na Ibuka Rwanda.

Ni umuhango wanitabiriwe na Béathe Ntamanyoma uyobora Diaspora Nyarwanda mu Butaliyani ndetse wanatumiwemo Ambasaderi Ngarambe François Xavier uhagarariye u Rwanda mu Butaliyani ufite icyicaro mu Bufaransa.

Umuyobozi wa IBUKA-Italia, Dr Mujyambere Honorine, wayoboye uyu muhango yashimye abifatanyije na bo mu gikorwa cyo kwizihiza isabukuru y’uyu muryango.

Yashishikarije abatakurikiranye ibiganiro imbonankubone kwifashisha imbuga nkoranyambaga za IBUKA-Italia zirimo Facebook na Youtube bakakireba cyose.

Ibiganiro byatanzwe byibanze cyane ku mpamvu y’ishingwa rya Ibuka mu Butaliyani, yiyongereye ku zindi zose zihurije ku ntego imwe yo kuba umuvugizi w’amateka ya Jenoside yakorewe Abatutsi, kuvugira abayirokotse n’ababakomokaho bose no guharanira ko habaho ubutabera hakurikiranwa abateguye bakanakora Jenoside yakorewe Abatutsi.

Umuyobozi wa Diaspora Nyarwanda mu Butaliyani, Ntamanyoma Béathe, yashimiye Ibuka ibikorwa byinshi ikorera muri icyo gihugu, cyane ku birebana no gutegura ibikorwa byo kwibuka.

Muri iki gihugu kugeza ubu hari ahantu hatatu hashyizwe ibimenyetso byo kwibuka Jenoside yakorewe Abatutsi mu 1994 mu Mujyi wa Roma, muri Tradate (Milano) [aho rwashyizweho hasabwe ku bufatanye bw’Ishyirahamwe INSHUTI na IBUKA-Italia n’ahandi hateganyijwe gutahwa mu Mujyi wa Torino.

Ntamanyoma yijeje ko mu gihe cyose bazakomeza kubaba hafi mu bikorwa byabo.

-  Abayobozi ba IBUKA mu bihugu by’i Burayi batanze ubutumwa

Abitabiriye iki gikorwa kandi basangijwe inararibonye rya IBUKA aho buri muyobozi yasangije abandi ibyakozwe, inzitizi zabayeho n’uko bazikuramo kugira ngo basangire ubumenyi no gukorera hamwe.

Umuyobozi wa IBUKA-Belgique, Félicité Lyamukuru, yagarutse ku kubaka ahazaza ha IBUKA igihe abacitse ku icumu bazaba bageze mu za bukuru cyangwa se batakiriho.

Yagize ati “Ikigamijwe n’Umuryango wa IBUKA, kiramutse gikozwe neza ibikorwa bya IBUKA byazakomeza kubaho.’’

Yavuze ikibazo bahura nacyo cyo gukomeza kwamaganira kure ko ari icy’abahakana bakanapfobya Jenoside yakorewe Abatutsi, bakorera ku butaka bw’u Burayi.

Umuyobozi wungirije wa Ibuka Rwanda, Freddy Mutanguha, yavuze ku kibazo gikomeye cy’ihungabana n’agahinda gakomeye bifitwe na bamwe mu barokotse Jenoside ndetse hakaba hari n’umubare munini w’abana barangije kwiga barihiwe n’Umuryango wita ku barokotse Jenoside yakorewe Abatutsi (FARG) ariko ntibabashe kubona imirimo.

Yashimiye imiryango yose ya Ibuka zose z’i Burayi uburyo zafashije abacitse ku icumu mu gihe cy’icyorezo cya COVID-19, anashimangira ko urugamba rwo kurwanya ingengabitekerezo ya Jenoside rukwiye gukomeza.

Umuyobozi wa IBUKA yo mu Budage, Jacqueline Mukandanga Blam, yagaragaje ko COVID-19 yatumye batabasha guhura ariko icyangombwa ari uko IBUKA yamaze gushingwa kandi ko na mbere yuko ivuka muri icyo gihugu ibikorwa byo kwibuka byari bisanzwe bikorwa.

César Murangira uyobora IBUKA yo mu Busuwisi, yashimangiye igitekerezo ko IBUKA yazashingwa ahantu hose hari Abanyarwanda bacitse ku icumu, mu rwego rwo guhererekanya amateka ya Jenoside yabakorewe no kwirinda ko yagorekwa.

Yagize ati “Hari abashinjwa gukora Jenoside bakidegembya bakaba bagomba gushyikirizwa ubutabera, hakenewe gukomeza byimbitse gushyira imbaraga hamwe ngo tubashe kurwanya n’ingaruka za Jenoside.’’

Christine Safari Uyobora IBUKA yo mu Buholandi yagarutse ku buryo amategeko ahana abakoze ibyaha bya Jenoside arimo imbogamizi nubwo hari bamwe bamaze gucirwa imanza.

Umuyobozi wa Ibuka-France, Nsanzimana Etienne, yibanze cyane ku kureba urugendo rumaze gukorwa na Ibuka muri rusange ndetse no kureba ejo hazaza hayo.

Yavuze ibimaze kugerwaho mu Bufaransa nk’igihugu kiyoboye IBUKA-Europe nko kuba iki gihugu cyaratoye itegeko rihana abapfobya Jenoside kandi itariki ya 7 Mata ikaba yaremejwe nk’itariki yo kwibuka Jenocide yakorewe abatutsi mu Rwanda.

Nsanzimana yagaragaje ko iyo ari intambwe ikomeye cyane ku mateka y’u Rwanda.

Ambasaderi Ngarambe François yashimiye abayobozi ba IBUKA mu Burayi ubufatanye bukomeje kubaranga.

Yakomeje ati “Leta y’u Rwanda mpagarariye ntizahwema gutera ingabo mu bitugu IBUKA; tuzafatanya kurwanya no kwamagana n’abagifite ingengabitekerezo ya Jenoside.’’

Ambasaderi Ngarambe wigeze kuyobora IBUKA yasabye abayobozi b’uyu muryango mu bihugu bitandukanye gukomeza gushyira hamwe, kugirana inama no guhanahana amakuru mu nyungu z’abo bahagarariye.

Ati “Sinabagira inama ntahereye ku bibazo n’uburemere bw’ihungabana rigaragara mu barokotse Jenoside yakorewe Abatutsi. Hakwiye kwishakamo ibisubizo by’ibyo bibazo byose.’’

Yanagarutse ku kibazo cy’ipfobya gisaba guhozaho, kuko hakiri abantu benshi bahakana Jenoside yakorewe Abatutsi, bagamije kugoreka amateka.

Ati “Hakwiye gushakwa ingamba z’uburyo cyarangira, nkuko ibimaze kugerwaho ari byinshi kandi byiza, bityo bikazafasha mu kubaka umutamenwa.’’

Ibikorwa byo kwizihiza isabukuru y’imyaka itanu IBUKA – Italia imaze ishinzwe bizakomeza ku wa 28 Ugushyingo 2020, ahateguwe ikiganiro kizahuriramo abarimu, abafatanyabikorwa, abanditsi b’ibitabo n’inshuti z’u Rwanda na IBUKA. Iki kiganiro kizakorwa mu rurimi rw’Igitaliyani, ibizavugirwamo bizibanda ku buryo bwo kwigisha Jenoside mu mashuri atandukanye na za Kaminuza.

Ambasaderi Ngarambe François yashimiye abayobozi ba IBUKA mu Burayi ubufatanye bukomeje kubaranga
Umuyobozi wa Diaspora Nyarwanda mu Butaliyani, Ntamanyoma Béathe, yashimye intambwe IBUKA-Italia imaze gutera
Christine Safari uyobora IBUKA yo mu Buholandi mu bitabiriye iki gikorwa
César Murangira uyobora IBUKA yo mu Busuwisi yashimangiye igitekerezo ko IBUKA yazashingwa ahantu hose hari Abanyarwanda bacitse ku icumu
Umuyobozi wa IBUKA-Italia, Dr Mujyambere Honorine, yashimye abifatanyije na bo mu gikorwa cyo kwizihiza isabukuru y'imyaka itanu uyu muryango umaze ushinzwe
Umuyobozi wa IBUKA-France, Nsanzimana Etienne, yibanze cyane ku kureba urugendo rumaze gukorwa na Ibuka muri rusange
Umuyobozi wa IBUKA-Belgique, Félicité Lyamukuru
Umuyobozi wa IBUKA yo mu Budage, Jacqueline Mukandanga Blam
Umuyobozi wungirije wa Ibuka Rwanda, Freddy Mutanguha

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .