Hakenewe ubushake bwa Politiki ngo hafatwe abakekwaho Jenoside bose-Amb. Nduhungirehe

Yanditswe na Karirima A. Ngarambe
Kuya 19 Mata 2021 saa 09:12
Yasuwe :
0 0

Ambasaderi uhagarariye u Rwanda mu Buholandi, Nduhungirehe Olivier, yatangaje ko hakenewe ubushake bwa Politiki kugira ngo abagize uruhare muri Jenoside yakorewe Abatutsi bakihishashisha hirya no hino bagezwe mu butabera.

Yabitangaje ku wa Gatandatu tariki 17 Mata 2021 ubwo Ambasade y’u Rwanda mu Buholandi yahuzaga impuguke zitandukanye mu kiganiro mbwirwaruhame cyaganiriwemo uburyo bwo guhashya ihanakana rya Jenoside yakorewe Abatutsi.

Ni ikiganiro cyabaye hifashishijwe ikoranabuhanga cyari gifite insanganyamatsiko igira iti "Nyuma y’imyaka 27 hakozwe Jenoside yakorewe Abatutsi, twarandura dute burundu ihakana ryayo?” Cyayobowe na Diane Mpyisi.

Ambasaderi Nduhungirehe yavuze ko hashize igihe bigaragara ko guhakana no gupfobya Jenoside yakorewe Abatutsi bigenda byiyongera mu mahanga, kandi ko biri kuboneka cyane mu cyiciro cy’abitwa ko ari abanyabwenge.

Ati “Usanga itakiri mu bayikoze cyangwa mu miryango yabo no mu nshuti zabo ahubwo yarageze no mu biyita abanyabwenge, mu banyamakuru, abiyita inzobere ugasanga na bo barandika ibitabo bihakana cyangwa se bipfobya Jenoside yakorewe Abatutsi. Iki kiganiro rero twaganiriye kuri iyo ngingo ngo turebe ko hari umwanzuro twagifatira.”

Umushinjacyaha Mukuru w’Urwego Mpuzamahanga Rwashyiriweho Gukora Imirimo y’Insigarira y’Inkiko Mpanabyaha, Serge Brammertz, yavuze ijambo ryibutsa icyo urukiko rwashyiriweho u Rwanda (TPIR) rwemeje ku byerekeye Jenoside, aho rwemeje ko iyakorewe Abatutsi ko ari ihame, itagomba gukomeza kugibwaho impaka.

Yanashyigikiye ko habaho amategeko mu bindi bihugu ahana bapfobya n’abahakana Jenoside yakorewe Abatutsi.

Mu bandi batanze ibiganiro harimo Dr Roland Moeland, Umwarimu muri Kaminuza ya Maastrict akaba atanga amasomo ajyanye n’iperereza ku byaha (Criminologie). Yanditse n’igitabo ku byerekeye guhakana Jenoside yakorewe Abatutsi yise "The Killing of Death: Denying the Genocide Against the Tutsi" (Kwica urupfu: Guhakana Jenoside yakorewe Abatutsi).

Mu kiganiro yatanze, yerekanye ko guhakana no gupfobya biri mu mugambi wa Jenoside, ikaba imwe mu ntera ziyisoza kuko utegura Jenoside aba yaranateguye uko azayihakana. Yavuze ko bigamije guhakana icyaha, gutoneka no gushinyagurira abayirokotse.

Umuyobozi mukuru w’Umuryango Aegis Trust mu Rwanda n’urwibutso rwa Kigali, Mutanguha Freddy, yibanze cyane ku kwibuka, avuga ku byerekeye kwigisha amateka ya Jenoside yakorewe Abatutsi n’uburyo bwo kuyirwanya hifashishijwe imbuga nkoranyambaga n’ibindi.

Providence Umurungi, Umuyobozi Mukuru muri Minisiteri y’Ubutabera ushinzwe urwego rw’ubufatanye mpuzamahanga mu Butabera, yavuze ku guca umuco wo kudahana abakoze jenoside yakorewe Abatutsi, ashimangira ko kubafata ari ngombwa kugira ngo bibere abandi isomo.

Yakomeje asaba ibihugu bicumbikiye abasize bakoze Jenoside kubafata bakagezwa mu butabera.

Ati “Twoherereje amahanga impapuro zisaga 1000 z’abantu bagomba gufatwa kubera ibyo bakekwa ko bakoze muri Jenoside yakorewe Abatutsi, ariko twohererejwe gusa abantu 23 nyuma y’imyaka 27 yose twaraberetse impapuro z’abarenga igihumbi.”

Ambasaderi Olivier Nduhungirehe yibukije ko Jenoside aricyo cyaha cya mbere gikomeye ku Isi kibaho mu mategeko yose ahana, ati “Bikaba byumvikana rero ko kigomba kwitabwaho kurusha ibindi.”

Yavuze ko kuba Jenoside yakorewe Abatutsi yaramaze kwemezwa ku rwego mpuzamahanga ndetse bikanemezwa n’inkiko, nta zindi mpaka zikwiriye kubaho abantu bayiha izindi nyito.

Ati “Bivuze ko ubu mu 2021 nta mpaka zindi zigomba gukorwa zo guhakana no kuyipfobya, yewe no mu biganiro nta kubyibeshyaho, ibyo byararangiye. Hagomba gukurikiraho gushyira mu bikorwa iyo myanzuro y’umuryango w’Abibumbye.”

Ambasaderi Nduhungirehe yavuze ko ibikwiriye kuba bikorwa kuri ubu ari uguca umuco wo kudahana, hafatwa abasize bakoze Jenoside yakorewe Abatutsi.

Ati “Icya mbere ni uguca umuco wo kudahana, ni ugufata abakekwaho gukora icyaha cya Jenoside […] ntabwo byumvikana ukuntu imyaka 27 ishize hari ibihugu bitaragira icyo bikora ngo bifate abakekwaho icyo cyaha ngo bibohereze mu Rwanda cyangwa bibacire imanza aho bari. Imyaka 27 ni myinshi abakekwaho icyo cyaha cya Jenoside bamwe bamaze gusaza, abandi barapfuye ku buryo hari n’abandi bashobora gupfa ubwo butabera butarabaho.”

Yavuze kandi ko amateka ya Jenoside yakorewe Abatutsi akwiriye kwigishwa mu mashuro, urubyiruko rukabimenya.

Ati “Icyo twifuza ni uko amateka ya Jenoside yakorewe Abatutsi yakwigishwa mu bihugu byose, kuko ni icyaha ndengakamere buri mwana wo kuri iyi Si agomba kumenya uko byateguwe, uko byagenze nk’uko benshi biga ubu uko Jenoside yakorewe Abayahudi yagenze.”

Ambasaderi Nduhungirehe yavuze ko hakenewe n’ubushake bwa politiki kugira ngo ibihugu bishyireho amategeko ahana ihakana n’ipfobya rya Jenoside yakorewe Abatutsi.

Ati “Kuko ntiwashyiraho itegeko udafite ubushake. Ni ngombwa rero mu gufata abayikekwaho ko bayikoze no kurwanya abayihakana n’abayipfobya. Twasanze muri iyi nama twazakomeza gufatanya n’ibindi bihugu bitandukanye kugira ngo turebe ukuntu hagira igikorwa kuri izo ngingo zose.”

Yakomeje agira ati “Ni ukugira ngo Guverinoma z’ibihugu biri kuri iyi Si zihe agaciro cyangwa se zumve uburemere bwa jenoside yakorewe Abatutsi kandi kugira ngo babyumve neza ntabwo ari ukujya mu cyunamo gusa ngo bavuge ijambo ryiza cyangwa bashyire indabo ahari urwibutso gusa, ibyo ntibihagije. Ibyo twifuza ni ibikorwa.”

Yavuze ko uretse gufata abakekwaho uruhare muri Jenoside, ibyo bihugu bikwiriye no kugaragaza ubushake bwabyo binyuze mu “kurwanya ingengabitekerezo ya Jenoside n’abahakana bagapfobya Jenoside yakorewe Abatutsi.”

Ati “Urugero hari amaradiyo akorera muri Amerika ahamagarira kurimbura Abanyarwanda bakoresheje amagambo y’ibanga ngo ‘Abantu ba Kagame’. Hari Radio yigeze kubivuga rwose ku mugaragaro ko ngo ‘u Rwanda nirutemera imishyikirano tuzica abantu ba Kagame kugeza no ku Mudugudu’ bakabivuga, tukabibwira Leta zibishinzwe ugasanga nta gikozwe.”

Nduhungirehe yagarutse no ku mitwe y’iterabwoba igamije guhungabanya umutekano w’u Rwanda ihabwa rugari n’ibihugu by’amahanga, agaragaza ko bidakwiriye kandi ko igikenewe ngo ibyo byose bicike ari ubushake bwa politiki.

Ambasaderi Nduhungirehe yagaragaje ko hakenewe ubushake bwa politiki kugira ngo abagize uruhare muri Jenoside bagezwe mu butabera ndetse hashyirweho n'amategeko mu bihugu bitandukanye ahana abapfobya n'abahakana Jenoside yakorewe Abatutsi
Dr. Roland Moeland, umwe mu batanze ikiganiro ni Umwarimu muri Kaminuza ya Maastrict akaba atanga amasomo ajyanye na Criminologie. Yanditse n’igitabo ‘ The Killing of Death: Denying the Genocide Against the Tutsi’ kivuga ku guhakana Jenoside yakorewe Abatutsi
Umushinjacyaha Serge Brammertz yashyigikiye ko habaho amategeko mu bindi bihugu ahana bapfobya n’abahakana jenoside yakorewe Abatutsi
Providence Umurungi, Umuyobozi mukuru muri Minisiteri y’Ubutabera ushinzwe urwego rw’ubufatanye mpuzamahanga mu Butabera, yavuze ko hakenewe guca umuco wo kudahana hafatwa abagize uruhare muri Jenoside bakihishe mu mahanga
Umuyobozi mukuru w’Umuryango Aegis Trust mu Rwanda n’urwibutso rwa Kigali, Mutanguha Freddy yasabye imbaraga mu guhangana n’abahakana bakanapfobya Jenoside yakorewe Abatutsi cyane cyane banyuze ku mbuga nkoranyambaga
Ibiganiro byayobowe na Diana Mpyisi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .