Hagomba gukazwa ingamba zo guhashya abapfobya n’abahakana Jenoside yakorewe Abatutsi- Amb Rwakazina

Yanditswe na Karirima A. Ngarambe
Kuya 12 Mata 2021 saa 07:33
Yasuwe :
0 0

Ambasaderi Marie-Chantal Rwakazina uhagarariye u Rwanda i Genève mu Busuwisi no mu Muryango w’Abibumbye (Loni) yavuze ko hakenewe ingamba zikomeye ku rwego mpuzamahanga mu guhashya abahakana n’abapfobya Jenoside yakorewe Abatutsi.

Yabitangaje tariki 7 Mata i Genève mu Biro bya Loni mu gikorwa cyo kwibuka ku nshuro ya 27 Jenoside yakorewe Abatutsi. Yabigarutseho kandi mu ijoro ryo kwibuka tariki ya 10 Mata mu Busuwisi.

Mu muhango wo kwibuka wabereye muri Loni, witabiriwe n’abarimo Umuyobozi Mukuru w’Ibiro by’Umuryango w’Abibumbye i Genève, Tatiana Valovaya; Umuyobozi Mukuru w’Ibiro bya Loni i Vienne akayobora n’Ibiro bishinzwe kurwanya Ibiyobyabwenge n’ubugizi bwa nabi, Ghada Waly; Umuyobozi w’Umuryango wa Ibuka-Mémoire & Justice Suisse, César Murangira, abahagarariye ibihugu byabo mu Busuwisi no muri Loni n’Abanyarwanda n’inshuti z’ u Rwanda zakurikinaga umuhango ku ikoranabuhanga.

Hari habanje umuhango wo gushyira indabo ku rwibutso rwa Jenoside yakorewe Abatutsi ruri imbere y’amarembo y’Ibiro bya Loni i Genève.

Abayobozi batandukanye bahatangiye ubutumwa barimo Murangira César wayoboye icyo gikorwa, Amb. Rwakazina, Tatiana Vlovaya, Beatrice Ferrari, Uyobora ibiro bireba imibanire mpuzamahanga muri Kanto ya Genève, Frédérique Perler wungirije Umuyobozi mukuru w’Umujyi wa Genève, Rafaela Trochéry, Nathalie Arnoid na Line Behr, bagize umuryango urwanya ivangura ry’amoko n’ibinyoma bijyana nabyo, Leon Saltiel wo mu muryango w’Abayahudi urwanya irondamoko, Yves Cyaka uyobora Diaspora Nyarwanda mu Busuwisi na Marie-Noelle Kamikazi, wungirije umuyobozi w’umuryango Urunana wo mu Busuwisi, abanyarwanda n’inshuti zabo zituye mu Busuwisi.

Mu ijambo Ambasaderi Rwakazina yavugiye muri Loni, yashimye Nadia Galinier watanze ubuhamya bw’uburyo yarokotse Jenoside akiri umwana, mu gihe ababyeyi be bishwe areba.

Yavuze ko kugira ubutwari bwo gutanga ubuhamya ari “uguhamagarira Isi yose kumenya ukuri nyuma y’imyaka 27 ibaye mu Rwanda”.

Yashimye n’abandi barokotse uburyo bakomeje kugira imbaraga zo gusigasira amateka no kirwanaho ngo badaheranwa n’agahinda.

Ambasaderi Rwakazina yavuze ko hakenewe ubuvugizi bwihariye mu mijyi itandukanye hirya no hino ku Isi hakaba urwibutso n’ibimenyetso bya Jenoside yakorewe Abatutsi kugira ngo bifashe urubyiruko kumenya amateka.

Ati “Ndasaba ko habaho uburyo hakorwa ubuvugizi mu bihugu n’imijyi itandukanye hirya no hino ku Isi hakaba urwibutso kugira ngo dufashe urubyiruko kumenya neza aya mateka.”

Yavuze ku mateka y’itegurwa n’ishyirwa mu bikorwa rya Jenoside yakorewe Abatutsi biciye mu butegetsi bwagiyeho nyuma y’ubwigenge bwahonyoraga uburenganzira bw’Abatutsi. Yavuze ko Abatutsi bibasiwe guhera mu 1962, 1963, 1964, 1967, 1973, 1990, 1991, 1992, Jenoside izaza ari umusozo mu 1994.

Yavuze nko mu 1964, ubwicanyi bwakorewe Abatutsi bwanyuze mu bitangazamakuru bitandukanye nka Le Figaro; Courrier d’Afrique, Radio France Internationale na Radio Vatican nyamara ntihagira igikorwa ngo bihagarikwe cyangwa byamaganwe.

Rwakazina yavuze ko nka La Radio du Vatican yabivuze igira iti “Nyuma ya Jenoside yakorewe Abayahudi hari indi Jenoside iri gukorwa muri Afurika yo Hagati. Abantu ibihumbi n’ibihumbi baricwa buri munsi mu Rwanda.”

Yakomeje avuga uburyo no mu 1994, umuryango mpuzamahanga ntacyo wakoze mu gihe miliyoni y’abatutsi yicwaga.

Ati “Umuryango mpuzamahanga ntacyo wakoze kandi waramenyeshwaga umunsi ku wundi ubwo bwicanyi biciye mu bitangazamakuru birimo Radio, Televiziyo by’Isi yose n’imiryango imwe itabogamiye kuri Leta.”

Mu gihe amahanga yari yatereranye u Rwanda, Ambasaderi Rwakazina yavuze ko ingabo za FPR Inkotanyi zari ziyobowe na Paul Kagame zahagobotse “zibakavana mu maboko y’abicanyi aho gihugu cyari cyibasiwe no kumena amaraso.”

Nyuma ya Jenoside hashyizweho Urukiko Mpanabyaha Mpuzamahanga rwashyiriweho u Rwanda i Arusha (TPIR) kugira ngo hakurikiranwe abacyekwaho kuba barayoboye bakanategura Jenoside yakorewe Abatutsi mu Rwanda.

Ambasaderi Rwakazina yavuze ko hari bamwe bafashwe, nubwo hari na benshi bakidegembya kugeza ubu.

Kuba umwaka ushize muri Gicurasi harafashwe Kabuga Felicien ufatwa nk’umwe mu bacurabwenge ba Jenoside yakorewe Abatutsi, Rwakazina asanga ari “ubutumwa bukomeye ku bandi bakiruka hirya no hino babundabunda mu bihugu bitandukanye, ko nabo ubucamanza buzabageraho. Dukomeje gusaba ibihugu bibacumbikiye ko bashyikirizwa ubutabera.”

Yagarutse ku buryo bakiriye icyemezo giherutse gufatwa n’Urwego Mpuzamahanga rwashyiriweho gukora imirimo y’insigarira y’inkiko Mpanabyaha (IRMICT), ruyobowe n’Umucamanza Carmel Agius aho banze kurekura Théoneste Bagosora. Rwakazina yavuze ko ari icyemezo gishimishije.

Ku kijyanye n’abahakana bagapfobya Jenoside, yahamagariye buri wese kubarwanya yivuye inyuma.

Ati “Ubasangamo cyane abanyamakuru, abanyamategeko, abari muri za Kaminuza, muri Politiki, mu basirikare bakuru bakoranye bya hafi n’ingabo zakoze jenoside mu Rwanda, abagize imiryango imwe itegamiye kuri Leta, bamwe mu bana bakomoka ku bagize uruhare mu gutegura no gushyira mu bikorwa ubwicanye muri jenoside n’abandi.”

“Ndahamagarira buri wese urebwa n’iki gikorwa ko twarwanya twivuye inyuma aba bose bapfobya bahakana jenoside yakorewe Abatusi.”

Ubu butumwa bwo kurwanya abahakana n’abapfobya Jenoside, Rwakazina yanabugarutseho mu ijoro ryo kwibuka ryateguwe na Ibuka-Suisse tariki ya 10 Mata 2020.

Yagize ati “Ndashimira Leta y’u Rwanda n’ibindi bihugu byashyizeho itegeko rihana abapfobya n’abahakana Jenoside yakorewe Abatutsi, mpamagariye n’Umuryango Mpuzamahanga kubidufashamo, tugaca irondamoko, uturere n’ivangura iryo ari ryo ryose.”

Rwakazina yanashimiye Guverinoma y’u Rwanda ikomeje kuba hafi abacitse ku icumu rya Jenoside yakorewe Abatutsi cyane abatishoboye bakabasha kwiyubaka no kubaka igihugu.

Amb. Rwakazina yatanze ubutumwa bwo guhaguruka hakarwanywa byimbitse abahakana cyangwa bapfobya Jenoside yakorewe Abatusi
Amb. Rwakazina yashimiye cyane Nadia Galinier wemeye gusangiza ubuhamya bw’amateka atoroshye yaciyemo ari umwana w’umukobwa muto muri Jenoside
Amb. Rwakazina yanashimiye Murangira César uyobora Ibuka-Suisse, n’abacitse ku icumu bagize uyu muryango n’abandi bari hirya no hino ku Isi uburyo bakomeje kugira imbaraga zo gusigasira amateka no kudaheranwa n'agahinda
Amb. Rwakazina yitabiriye kandi ijoro ryo kwibuka tariki ya 10 Mata mu Busuwisi aho yatanze ubutumwa bwo guhaguruka hakarwanwa byimbitse Abahakana cyangwa bapfobya jenoside yakorewe Abatutsi, akanakomeza Abacitse ku icumu rya Jenoside yakorewe Abatutsi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .