Ibuka-France yashimye ubutwari bw’abarokotse Jenoside banze guheranwa n’agahinda

Yanditswe na Karirima A. Ngarambe
Kuya 15 Mata 2021 saa 09:45
Yasuwe :
0 0

Umuyobozi w’Umuryango Ibuka France, Nsanzimana Etienne yashimye ubutwari bw’abarokotse Jenoside yakorewe Abatutsi mu kongera kwiyubaka no guharanira kubaho hejuru y’ibihe bibi banyuzemo n’ibikomere bafite ku mutima.

Yabitangarije mu muhango wo kwibuka Jenoside yakorewe Abatutsi wabereye mu Bufaransa. Uyu mwaka nk’uko bisanzwe, abanyarwanda n’inshuti zabo ziba muri icyo gihugu bibutse ku nshuro ya 27 Jenoside yakorewe Abatutsi, igikorwa cyatangiye tariki ya 7 Mata 2021, ibikaba bikomeje hirya no hino mu turere dutandukanye tw’icyo gihugu.

Tariki ya 7 Mata wabaye umunsi wakozwemo ibikorwa bitandukanye mu kwibuka. Nk’ibisanzwe, Ibuka-France igira insanganyamatsiko iharira buri mwaka, kuri iyi nshuro ya 27 bari bayihaye igira iti “Kwibuka, guhanahana amakuru y’amateka ya Jenoside yakorewe Abatutsi turwanya abayihakana”.

Igikorwa cya mbere cyatangiriye i Paris saa yine za mu gitondo ahari ikimenyetso cy’urwibutso rwa Jenoside yakorewe Abatutsi mu Rwanda mu 1994, ruherereye mu busitani bw’ahitwa ‘Jardin de mémoire’ (Paris 13éme).

Cyitabiriwe n’uyobora Umujyi wa Paris, Anne Hidalgo; Ambasaderi w’u Rwanda mu Bufaransa, Dr Ngarambe François Xavier; Umuyobozi Mukuru w’Ikigo kibungabunga amateka ya Jenoside yakorewe Abayahudi bita Le Mémoire de la Shoah, Jacques Fredj; Minisitiri ushinzwe u Burayi n’Ububanyi n’Amahanga wa Guverinoma y’u Bufaransa, Jean Yves le Drian.

Saa tanu za mu gitondo hakurikiyeho kujya ku rwibutso rw’Abayahudi ‘Mémoire de la Shoah’ ari nabwo hitabiraga na Minisitiri w’Uburezi bw’Igihugu n’Urubyiruko muri Guverinoma y’u Bufaransa, Jean Michel Blanquer.

Nsanzimana Etienne uyobora Ibuka-France na Ambasaderi Ngarambe n’abashyitsi bakuru bose bahavugiye ijambo rijyanye no Kwibuka.

Tariki ya 9 Mata, Ibuka-France mu rwego rwo kwibuka ku nshuro ya 27 Jenoside yakorewe Abatutsi mu Rwanda, yateguye ikiganiro mbwirwaruhame bise “Déconstruire les discours négationnistes” . ]

Ibiganiro byatanzwe n’Umunyamateka, Umushakashatsi Hélène Dumas; Umwarimu w’Amateka, Romain Poncet; Uwahoze ari Umusirikare Mukuru mu Ngabo z’Abafaransa muri Opération Turquoise mu 1994 mu Rwanda, Guillaume Ancel na François Graner ugize ishyirahamwe ‘ Survie’ ryo mu Bufaransa. Ni ibiganiro byayobowe na Anmeric Givord, ugize Inama Nkuru ya Ibuka-France.

Tariki ya 11 Mata hateguwe na none ibiganiro mbwirwaruhame hakoreshejwe ikoranabuhanga baganira ku nsanganyamatsiko bise "Lutter pour l’universel : mener son combat, ceux des autres et celui de l’humanité (quelle solidarité militante ?).

Abatumirwa barimo Ara Toranian, umwe mu bashinze umuryango CCAF, Albert Herszkowicz, uyobora ishyirahamwe ‘Mémoire 98’, Iannis Roder; Umwarimu w’amateka n’ibidukikije, umwe mu batanga amahugurwa mu muryango ‘Mémoire de la Shoah’ na Etienne Nsanzimana Uyobora Ibuka-France wayoboye ibiganiro.

Nsanzimana uyobora Ibuka-France mu muhango utangiza igikorwa cyo kwibuka uyu mwaka mu Bufaransa, yavuze ko kwibuka ari uguha agaciro inzirakarengane zisaga miliyoni zishwe zizira uko zavutse.

Ati “Duteraniye hano ngo twibuke, twahagaritse imirimo y’indi itureba mu nzego zitandukanye kugira ngo dutekereze, tuzirikane amahano yabaye hakicwa Miliyoni y’Abatutsi muri gahunda yizweho neza yo kumaraho ubwoko bumwe ariyo Jenoside. Hari muri Mata mu 1994, ubwo insengero zahindukaga ibagiro ry’Abantu, ubwo amashuri, aharererwaga abana hahindutse ubwiciro. Abihayimana, Abahanzi bakomeye bazwi, abizewe n’abaturage basanzwe baje kuba abicanyi.”

Yasabye abitabiriye kuzirikana no kuba hafi abarokotse Jenoside bafite intege nke n’abandi batabashije kubona uko bibuka ababo kubera ibihe isi irimo byo kwirinda Coronavirus.

Ati “Nubwo turi muri iyi gahunda, nagira ngo dutekereze ku bacitse ku icumu rya Jenoside yakorewe Abatutsi bagifite intege nke, batabasha kubona uko bibuka ababo bakundaga kubera iki cyorezo cya Covid-19 kitwugarije cyabongereye akababaro, tugomba kubaba hafi mu buryo bushoboka bwose.”

Yagarutse ku butwari bw’abarokotse Jenoside barenze ku kababaro n’agahinda ko kwicirwa ababo, bagakomeza guharanira kubaho.

Ati “Nagira ngo mbabwire ko abarokotse Jenoside yakorewe Abatutsi mu Rwanda, bakorewe ibibi bitagira urugero, bagerageje kuba mu Isi igoye kandi badafite aho bahera kuko ntacyo babasigiye na kimwe. Urugendo rwababanye rurerure, barahanga bundi bushya kugira ngo babe abo baribo uyu munsi. Batanga kandi umusanzu mu kubaka igihugu cyabo bakunda.”

Nsanzimana yashimiye kandi Ingabo za FPR Inkotanyi zarokoye abicwaga, zigahagarika Jenoside. Yavuze ko iyo zitahaba bamwe batari kuba bariho bavuga amateka babayemo.

Etienne Nsanzimana Uyobora Ibuka-France yashimiye abarokotse Jenoside yakorewe Abatutsi bakomeje guharanira kubaho birengagije ibikomere basigiwe na Jenoside
Ambasaderi uhagarariye u Rwanda mu Bufaransa Dr Ngarambe François Xavier ageza ijambo ku bitabiriye
Umuyobozi w'Umujyi wa Paris, Anne Hidalgo ageza ijambo ku bitabiriye umuhango wo kwibuka
Minisitiri w’uburezi bw’Igihugu n’Urubyiruko muri Guverinoma y’'u Bufransa, Jean Michel Blanquer
Bageze mu kigo cy’Abayahudi bita « Le Mémoire de la Shoah, kiyoborwa na Jacques Fredj
Uyobora Umujyi wa Paris, Anne Hidalgo (iburyo) na Etienne Nsanzimana Uyobora Ibuka-France (ibumoso ) bagiye gushyira indabo ahari ikimenyetso cy’urwibutso rwa jenoside yakorewe Abatutsi mu Rwanda mu 1994, ruherereye mu Busitani bw’ahitwa « Jardin de mémoire (Paris 13éme).
Ambasaderi w'u Rwanda mu Bufaransa, Dr Ngarambe François Xavier, n'Umugore we bagiye gushyira indabo ku kimenyetso cy’urwibutso rwa Jenoside yakorewe Abatutsi mu Rwanda mu 1994, ruherereye mu Busitani bw’ahitwa Jardin de mémoire (Paris 13éme)
Ambasaderi w'u Rwanda mu Bufaransa, Dr Ngarambe François Xavier, aganira n'abarimo Umuyobozi w'Umujyi wa Paris, Anne Hidalgo
Indabo Ibuka-France yashyizwe ahari ikimenyetso cy’urwibutso rwa Jenoside yakorewe Abatutsi mu Rwanda mu 1994, ruherereye mu Busitani bw’ahitwa Jardin de mémoire (Paris 13éme)
Ambasaderi Ngarambe ashyira indabo ku kimenyetso cy'urwibutso rwa Jenoside yakorewe Abatutsi mu Bufaransa
Nsanzimana uyobora Ibuka France ashyira indabyo ku kimenyetso cy'urwibutso rwa Jenoside yakorewe Abatutsi i Paris
Indabo Ambasade y'u Rwanda mu Bufaransa yashyize ahari ikimenyetso cy’urwibutso rwa Jenoside yakorewe Abatutsi
Ahari ikimenyetso cy’urwibutso rwa Jenoside yakorewe Abatutsi mu Rwanda mu 1994, ruherereye mu Busitani bw’ahitwa Jardin de mémoire (Paris 13éme)
Umunyamateka Hélène Dumas atanga ikiganiro
Uwahoze ari Umusirikare Mukuru mu Ngabo z’Abafaransa zari muri Opération Turquoise mu 1994 mu Rwanda, Guillaume Ancel atanga ikiganiro tariki ya 9 Mata

Amafoto:HENRI GARAT

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .