Ambasaderi Yasmin D. Amri Sued yaganiriye n’Abanyarwanda batuye muri Korea y’Epfo

Yanditswe na IGIHE
Kuya 8 Ugushyingo 2020 saa 07:27
Yasuwe :
0 0

Ambasaderi w’u Rwanda muri Koreya y’Epfo, Yasmin D. Amri Sued, yaganiriye n’Abanyarwanda batuye mu Mujyi wa Daegu uri mu bilometero 300 uvuye mu Murwa Mukuru w’iki gihugu, Seoul.

Iki gikorwa cyabaye ku wa Gatandatu, tariki ya 7 Ugushyingo 2020; Ambasaderi Yasmin D. Amri Sued yacyitabiriye aherekejwe n’umunyamabanga wa mbere muri Ambasade y’u Rwanda n’abayobozi bahagarariye Diaspora Nyarwanda muri Koreya y’Epfo

Cyakozwe muri gahunda Ambasade yihaye yo gusura intara zituyemo Abanyarwanda benshi dore ko mu minsi ishize bitashobokaga kubera ingamba zari zashyiriweho kwirinda ikwirakwira rya Coronavirus.

Ambasaderi w’u Rwanda muri Koreya y’Epfo, Yasmin D. Amri Sued, yakanguriye Abanyarwanda batuye muri Daegu gukomeza kurangwa n’ubumwe bafatanya muri byose kandi bakomeza no kwirinda Coronavirus.

Umujyi wa Daegu ni wo utuwe n’Abanyarwanda benshi nyuma ya Seoul, hafi ya bose bakaba ari abanyeshuri biga mu byiciro bitandukanye.

Ambasaderi Yasmin D. Amri Sued yanabakanguriye kuzitabira inama izabahuza n’abayobozi babahagarariye muri Minisiteri y’Ububanyi n’Amahanga n’abandi bo mu nzego za Leta ndetse n’izikorera izaba ku wa 22 Ugushyingo 2020.

Abanyarwanda bagararagaje imbogamizi bahura nazo zirimo kutabona amakuru ahagije ajyanye n’isoko ry’umurimo mu Rwanda, bijejwe ko iyo nama iri gutegurwa aricyo izaba igamije.

Abitabiriye iki gikorwa bashimiye Ambasade ko yababaye hafi mu gihe Coronavirus yari imeze nabi muri Daegu dore ko ari naho yagaragaye bwa mbere muri Koreya y’Epfo.

Abanyarwanda basabye kujya basurwa kenshi bagategura n’imikino inyuranye hagati yabo cyangwa n’abandi banyamahanga bigana nabo.

Ambasaderi Yasmin D. Amri Sued yabasabye ko bakoresha ubumenyi bahaha muri Koreya y’Epfo bagateza imbere igihugu cyabo bishakamo ibisubizo.

Umuyobozi wa Diaspora Nyarwanda muri Koreya y’Epfo, Uzabakiriho Abdulkhalim na we wari waherekeje Ambasaderi yasabye abo Banyarwanda batuye muri Daegu kuzitabira amatora, azaba hakoreshejwe ikoranabuhanga muri uku kwezi yo kwihitiramo abayobozi babo bashya kuko abariho ubu manda yabo irimo kurangira.

Nyuma yo kuganira n’Abanyarwanda, Ambasaderi Yasmin D. Amri Sued, yanasuye Yeungnam University, Kaminuza yizeho Abanyarwanda benshi i Daegu aganira na Perezida waryo amusaba kongera gufata abanyeshuri b’Abanyarwanda dore ko umwaka ushize batabakira.

Perezida wa Yeungnam University yasabye Ambasaderi kureba uburyo bageza ku Banyarwanda ‘Saemaul Undong movement’ [wagereranya n’umuganda ukorwa mu buryo buteye imbere], uburyo Korea y’Epfo yakoresheje yiteza imbere mu mashuri yo mu Rwanda ikigishwa.

Bahawe umwanya batanga ibitekerezo bitandukanye biganisha ku kubaka igihugu kibereye buri wese
Ambasaderi w’u Rwanda muri Koreya y’Epfo, Yasmin D. Amri Sued, yaganiriye n’Abanyarwanda batuye mu Mujyi wa Daegu
Umujyi wa Daegu utuwe n’Abanyarwanda biganjemo abanyeshuri biga mu byiciro bitandukanye
Ambasaderi Yasmin D. Amri Sued yafashe ifoto ari kumwe n'umuyobozi wa Yeungnam University
Ambasaderi Yasmin D. Amri Sued hamwe n'abayobozi ba Yeungnam University, Kaminuza yizeho Abanyarwanda benshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .