Abanyarwanda n’inshuti zabo basezeye Jacques Kabale wari umaze imyaka 10 ari ambasaderi i Paris (Amafoto)

Yanditswe na Karirima A. Ngarambe
Kuya 20 Nzeri 2019 saa 09:48
Yasuwe :
0 0

Abanyarwanda batuye, biga cyangwa bakorera mu Bufaransa, bishyize hamwe basezera Ambasaderi Jacques Kabale nyuma y’imyaka 10 yari amaze i Paris ahagarariye u Rwanda mu bihugu nka Monaco, u Butaliyani, Espagne na Portugal.

Ni umuhango wabereye mu nzu y’ubuyobozi bw’agace k’Umujyi wa Paris yitwa ’Mairie du 3e arrondissement de Paris’.

Mu ijambo rye nk’inshuti y’Abanyarwanda yakoranye bya hafi na Amb. Kabale, Pierre Aidenbaum uyobora aka gace k’Umujyi wa Paris, yashimiye Abanyarwanda n’inshuti zabo kuba yifatanyije na bo mu gushimira Amb. Kabale igihe bamaze bakorana.

Ati "Uretse n’ibyo mperuka mu Rwanda, imvugo niyo ngiro, ntakuntu umuntu atakwishimira gukorana neza n’abayobozi b’igihugu nk’u Rwanda kigaragaza mu iterambere niboneye."

"Ni iby’agaciro kubabona muteraniye muri iyi ngoro y’umujyi, biraduhesha ishema kubera abo muri bo n’imibanire myiza iri hagati y’ibihugu byacu byombi, murisanga." Yabwiye Amb. Kabale ati "nkwifurije ishya n’ihirwe mu yindi mirimo uzashingwa."

Amb. Kabale yashimiye abagize igitekerezo cyo guhuza Abanyarwanda n’inshuti zabo ngo bamusezereho, nyuma y’imyaka 10 bahuzwa na byinshi.

Ati "Nibyo koko igihe kirageze nsubiye mu Rwanda, ariko ntabwo ngiye kure tuzakomeza dufatanye mu gukorera ibihugu byacu byombi mu buryo butandukanye, kuko umuturage mwiza ahora ari ambasaderi w’igihugu cye."

Yashimiye byimazeyo Abanyarwanda bitabiriye icyo gikorwa kandi wari umunsi w’akazi.

Ati "Biranyereka ko twabanye neza kandi kubagira byaramfashije mu kazi kanjye, inama twagiranye, ibyo twakoranye byose byari umusaruro mwiza ku gihugu cyacu."

"Tariki ya 22 Nzeri 2019 nibwo nzasubira mu Rwanda, ariko kandi ndabamenyesha ko mudasigaye mwenyine kuko hari Amb. Ngarambe François Xavier uzansimbura arabageraho mu gihe gito, muzakomeze mukorane nawe neza nk’uko bisanzwe azaze yisanga rwose."

Dr Rutayisire François wavuze ijambo mu izina ry’Abanyarwanda bo mu Bufaransa, yashimye byimazeyo ibyagezweho byose mu gihe Amb. Kabale yari mu Bufaransa.

Ati "Ntabwo byari byoroshye, wakoze mu bihe twese tuzi ko bitari byoroshye muri dipolomasi hagati y’u Rwanda n’u Bufaransa ariko ugiye rwose umubano wacu uhagaze neza, turagushimira uruhare wabigizemo nka Ambasaderi. Abanyarwanda bantumye ngo nkubwire nti ’warakoze kandi Imana ikomeze ibarinde n’umuryango wawe.’"

Habayeho umwanya wo guha ijambo buri wese akagira icyo abwira Amb. Kabale n’umuryango we, batanga ubuhamya bw’uko babanye muri iyo myaka 10 ahamaze.

Amb. Kabale ati "Ndagira ngo mbashishikarize kandi kwibuka gahunda ikomeye cyane ya Rwanda Day izabera i Bonn mu Budage tariki ya 5 Ukwakira, aho umukuru w’igihugu n’abandi bayobozi batandukanye b’u Rwanda bazaza guhura n’Abanyarwanda, inshuti z’u Rwanda, abashoramari, n’abandi, iyi gahunda mukomeze mwiyandikishe muzabe muri benshi muhure na Perezida muganire."

Uyu mugoroba wasojwe n’ubusabane.

Amb Kabale yifotozanya n'abitabiriye ibirori byo kumusezera
Abantu batandukanye batanze ubuhamya bw'uko babanye bakanakorana na Amb. Kabale
Amb. Jacques Kabale ashimira Abanyarwanda bakoranye imyaka 10 amaze ahagarariye u Rwanda i Paris mu Bufaransa
Bacinye akadiho mu busabane
Amb. Kabale avuga ijambo
Dr Dave Haguma (ibumoso) aganira na bagenzi be baje gusezera Amb. Kabale
Dr Rutayisire François wavuze mu izina ry'Abanyarwanda, ashima kandi asezera Amb. Kabale usoje ubutumwa bwe mu Bufaransa
Emmanuel Rugema avuga Ijambo
Ifoto y'urwibutso na bamwe mu bitabiriye uyu munsi bakikije Amb. Kabale
Igihe Pierre Aidenbaum uyobora agace k’umujyi wa Paris bita 3eme arrondissement, yavugaga ijambo ryo gushima no gusezera Amb. Kabale
Inshuti y'u Rwanda yagiye gusezera kuri Amb. Kabale
Jeanne Allaire Kayigirwa, washimiye mu izina rya Ibuka-France uko Amb. Kabale yakoranye nabo
Kabuguza Beatrice, umwe mu bagize umuryango nyarwanda aha Amb. Kabale impano bamugeneye
Me Gisagara Richard hagati aganira na Rugema Emmanuel uri iburyo ubwo bari mu gihe cy'ubusabane
Nyambo Serge wayoboye ibiganiro
Pierre Aidenbaum uyobora agace k’umujyi wa Paris bita 3eme Arrondissement, ubwo yakiraga Amb. Kabale aho yatumiwe gusezerwaho n'Abanyarwanda n'inshuti zabo
Tessy Kayitana, Alain na Dafrosa Gauthier bateze amatwi ijambo rya Amb. Kabale
Ubwo Amb. Kabale yari ageze aho yakiriwe bamusezera i Paris
Umuhanzi Ben Kayiranga afata ifoto y'urwibutso na Amb. Kabale
Umuhanzi Bruce Clarke (ibumoso) aganira n'abo mu muryango wa Alain Gauthier uyobora Collectif des Parties Civiles pour le Rwanda - CPCR
Umuhanzi Gaël Faye yitabiriye igikorwa cyo gusezera Amb. Kabale
Umunyamabanga wa mbere muri Ambasade y'u Rwanda i Paris, Yves Muneza, akurikiye ijambo rya Amb. Kabale
Ni umugoroba waranzwe n'urugwiro rukomeye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza