00:00:00 IGIHE NETWORK KN KINYARWANDA EN ENGLISH FR FRANCAIS

Abanyarwanda batuye muri Sénégal bunamiye abazize Jenoside hazirikanwa ubutwari bwa Capt. Mbaye

Yanditswe na IGIHE
Kuya 9 April 2022 saa 01:26
Yasuwe :

Ambasade y’u Rwanda muri Sénégal inashinzwe ibihugu bya Mali, Gambia, Cap-Vert na Guinea Bissau ifatanyije n’Abanyarwanda batuye muri iki gihugu hamwe n’inshuti z’u Rwanda, bibutse ku nshuro ya 28 Jenoside yakorewe Abatutsi mu Rwanda mu 1994.

Iyi gahunda yitabiriwe n’abantu bagera kuri 250 barimo abahagarariye ibihugu byabo n’Imiryango Mpuzamahanga muri Sénégal n’inshuti z’u Rwanda, ku wa 7 Mata 2022.

Yabimburiwe no gushyira indabo no kunamira inzirakarengane zazize Jenoside kuri ’Place du Souvenir Africain’ i Dakar ahari ikimenyetso cyo kwibuka, ikomereza kuri ’Musée des Civilisations Noires.’

Minisitiri w’Ingabo muri Sénégal wari uhagarariye Guverinoma, Sidiki Kaba, yavuze ko Sénégal yifatanyije n’Abanyarwanda mu kunamira abazize Jenoside.

Yagaragaje ko u Rwanda ubu ari igihugu cy’intangarugero mu bumwe bw’abagituye no mu iterambere n’imibereho yabo, anashimangira uruhare rwarwo ku rwego mpuzamahanga by’umwihariko uruhare ntagereranywa rwa Nyakubahwa Paul Kagame mu mavugururwa y’Umuryango w’Ubumwe bwa Afurika.

Yongeye kwibutsa igihango cy’amateka y’umusirikare wa Sénégal, Capitaine Mbaye Diagne wabaye intwari akagerageza gukiza bamwe mu bahigwaga, akanahasiga ubuzima afatanyije na bagenzi be bo muri Sénégal barimo na Gen. Babacar Faye wanatanze ubuhamya.

Ambasaderi wa Gabon muri Sénégal, Regis Onanga Ndiaye wavuze mu izina ry’abahagarariye ibihugu n’Imiryango Mpuzamahanga muri Sénégal, yagarutse ku mwanzuro w’Inteko Rusange y’Umuryango w’Abibumbye yemeje ko itariki ya 7 Mata 2022 ya buri mwaka ari umunsi mpuzamahanga wo kuzirikana Jenoside yakorewe Abatutsi mu Rwanda mu 1994.

Yashimye Perezida Paul Kagame wayoboye urugamba rwahagaritse Jenoside no guteza imbere igihugu bishingiye ku kugarura amahoro na gahunda y’ubwiyunge mu Banyarwanda.

Yagaragaje ko kwibuka ari umwanya ukomeye wo gukomeza guha agaciro abakambuwe muri Jenoside ariko ko ari n’umwanya wo kurushaho gutuma isi imenya ayo mateka asharira kugira ngo atazongera ukundi.

Ambasaderi w’u Rwanda muri Sénégal, Jean Pierre Karabaranga, yasobanuye ko Jenoside atari impanuka ko ahubwo ari umugambi utegurwa kugeza ushyizwe mu bikorwa.

Yagaragaje uko ingengabitekerezo y’ivangura rishingiye ku moko yigishijwe ku mugaragaro mu miryango, mu mashuri ndetse hakanifashishwa itangazamakuru kugeza kuri Jenoside yari igamije kurimbura Abatutsi.

Yasobanuye ko Jenoside yagiye igeragezwa hirya no hino mu gihugu kugeza mu 1994 hicwa abantu basaga miliyoni, bashyira mu bikorwa umugambi watangiye mu 1959.

Ati "Kwibuka ni umwanya wo kugaragariza amahanga ko Jenoside idakwiye kongera kubaho ukundi kuko amahanga yakuye isomo rikomeye mu kuba hatarabaye gutabara inzirakarengane ari na yo mpamvu abayikoze, abayihakana n’abayipfobya bakwiye gukurikiranwa kuko bagikurura urwango."

Yagaragaje ko Jenoside yarangiye ari uko ingabo zari iza FPR zari ziyobowe na Perezida Paul Kagame, zatsinze ingabo z’abajenosideri bityo ko kwibuka ari n’umwanya wo gushima izo ntwari.

Ambasaderi Karabaranga yavuze ko abarokotse Jenoside yakorewe Abatutsi bashimirwa kuba barabaye mu ba mbere mu kwitabira gahunda za Leta zo kubaka igihugu harimo n’abatuye muri Sénégal.

Muri iki gikorwa cyo kwibuka, habaye ikiganiro kirambuye cyagarutse ku mateka ya Jenoside yakorewe Abatutsi cyarimo Adama Dieng wahoze ari Umunyamabanga Mukuru Wungirije w’Umuryango w’Abibumbye wagaragaje ko ihakana n’ipfobya bya Jenoside bigenda bifata indi ntera kubera ko hari amakuru menshi atari yo asigaye atangazwa hifashishijwe ikoranabuhanga.

Yasabye ko hakorwa ubuvugizi amateka ya Jenoside akigishwa mu mashuri anasaba ko urubyiruko rw’abanyeshuri rwihatira kumenya amateka nyayo kuri Jenoside yakorewe Abatutsi. Yasabye ko abantu bose bakwiye kwamagana abahakana bakanapfobya Jenoside kuko kuyihakana ari ko gukomeza kuyikora.

Gen. El Hadji Babacar Faye wari ufite ipeti rya Capitaine mu gihe cya Jenoside yagaragaje ko inshingano yabo yari iyo kugarura amahoro kuko bageze mu Rwanda mu gihe hasinywaga amasezerano y’amahoro ya Arusha.

Baza mu Rwanda ngo ntabwo bigeze batekereza ko hari Jenoside yahakorerwa ariko uko iminsi ihita bakabona ibimenyetso ko iri gutegurwa. Kuri za bariyeri ngo bahasangaga Interahamwe kandi ubona ko zifite n’abaziyobora mu byo zikora bigaragaza uko ubwicanyi bwari bwarateguwe.

Ibyo babonye byatumye bafata icyemezo cyo kurenga ku mabwiriza bahabwaga n’abayobozi babo, biyemeza kugira abo barokora, banakura bamwe mu Batutsi bari muri Hotel des Mille Collines babajyana mu gice cyagenzurwaga na FPR-Inkotanyi.

Boris Babacar Diop, Umwanditsi wo muri Sénégal wanditse igitabo ku mateka ya Jenoside i Murambi (Murambi, le Livre des Ossements) yagaragaje ko ubwicanyi bwakorewe i Murambi bugaragaza ubukana Jenoside yakoranywe kimwe n’uruhare rw’abayobozi ndetse n’urw’abanyamahanga bamwe.

Yagaragaje ko Musenyeri Augustin Misago yabujije abatutsi guhungira mu Burundi abizeza ko bazacungirwa umutekano ahubwo bakarundwa mu ishuri aho baje kwicirwa. Aho kandi ni naho ingabo z’u Bufaransa zari muri « Opération Turquoise » zari zikambitse.

Perezida wa Ibuka Sénégal, Yves Munana Rwogera, yagaragaje ko kwibuka bigomba kuba iby’igihe cyose kandi ari inshingano kuri buri wese kuko kubyibagirwa byaha icyuho abafite gahunda yo gukomeza umugambi wa Jenoside.

Ati "Kwibuka kandi bituma hakomeza guharanirwa ubutabera kuko byibutsa buri wese ibibi byakozwe kandi bigomba guhanwa. Kwibuka binaca intege abateguye bakanashyira mu bikorwa umugambi mubi wabo kuko bibagaragariza ko batageze ku ntego yabo."

Yanagarutse ku nshingano yo kurwanya ingengabitekerezo yayo kimwe n’ihakana ryayo. Yagaragaje ko ari ngombwa kwigisha amateka nyayo ya Jenoside yakorewe abatutsi kugira ngo hatagira abakomeza kuyagoreka.

Abanyarwanda n'inshuti z'u Rwanda bifatanyije muri uyu muhango wo kwibuka ku nshuro ya 28 Jenoside yakorewe Abatutsi
Ambasaderi w’u Rwanda muri Sénégal, Jean Pierre Karabaranga, yasobanuye ko Jenoside atari impanuka ko ahubwo ari umugambi utegurwa kugeza ushyizwe mu bikorwa
Abitabiriye umuhango wo kwibuka bari bakurikiye ibiganiro
Minisitiri w’Ingabo muri Sénégal wari uhagarariye Guverinoma, Sidiki Kaba, yavuze ko Sénégal yifatanyije n’Abanyarwanda mu kunamira abazize Jenoside
Abakiri bato na bo bakurikiye uyu muhango kugira ngo babashe kumenya amateka ya Jenoside yakorewe Abatutsi
Adama Dieng wahoze ari Umunyamabanga Mukuru Wungirije w’Umuryango w’Abibumbye yagaragaje ko ihakana n’ipfobya bya Jenoside bigenda bifata indi ntera
Gen. El Hadji Babacar Faye yagaragaje ko inshingano yabo yari iyo kugarura amahoro mu Rwanda
Perezida wa Ibuka Sénégal, Yves Munana Rwogera, yagaragaje ko kwibuka bigomba kuba iby’igihe cyose kandi ari inshingano kuri buri wese
Solange Zuba Burabyo wari umuhuza w'ibiganiro
Jessica Kabandana wayoboye ibiganiro
Boris Babacar Diop, Umwanditsi wo muri Sénégal wanditse igitabo ku mateka ya Jenoside i Murambi (Murambi, le Livre des Ossements)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .