Abanyarwanda batuye mu Busuwisi bizihije Umunsi w’Intwari (Amafoto)

Yanditswe na IGIHE
Kuya 5 Gashyantare 2020 saa 09:57
Yasuwe :
0 0

Abanyarwanda batuye mu Busuwisi bifatanyije n’inshuti zabo mu birori byo kwizihiza ku nshuro ya 26 Umunsi w’Intwari, byabereye mu Mujyi wa Genève.

Ibirori byo kwizihiza Umunsi w’Intwari wahawe insanganyamatsiko igira iti “Ubutwari mu Banyarwanda, Agaciro kacu’’ byabaye ku wa 1 Gashyantare 2020.

Ibi birori byabimburiwe no kwerekana Filimi yitwa “The 600: Soldiers’ Story”, yerekanwe bwa mbere mu Busuwisi.

Iyi filimi igaragaza uburyo Batayo ya Gatatu y’Ingabo zahoze ari iza FPR-Inkotanyi yari mu nyubako y’Inteko Ishinga Amategeko yahoze yitwa CND, yarokoye Abatutsi benshi muri Jenoside yakorewe Abatutsi mu 1994 kandi ingabo zari ziyigize zararutwaga ubwinshi n’abasirikare ba Leta yateguye Jenoside.

Yanditswe inakorwa na Richard Hall ukomoka muri Leta Zunze Ubumwe za Amerika, muri Great Blue Productions. Uyu yatwaye igihembo cya Emmy Award, akaba atunganya ibiganiro bya za televiziyo i Los Angeles. Hall amaze imyaka 25 akora uyu mwuga wo gutunganya filime.

Gutunganya iyi filimi yabifashijwemo na A Wize Media y’i Kigali ya Annette Uwizeye ari nayo ihagarariye iyo filime.

Nyuma yo kureba filimi, hakurikiyeho ubusabane bwaranzwe n’imbyino n’imihamirizo by’Itorero Urunana rigizwe n’abana b’Abanyarwanda batuye mu Busuwisi.

Ambasaderi w’u Rwanda mu Busuwisi, Rwakazina Marie Chantal, yasobanuriye abitabiriye ibi birori ko Umunsi w’Intwari ukomeye cyane ku Banyarwanda, wizihizwa kugira ngo twibuke, dushimire ndetse dusingize ibikorwa bifitiye u Rwanda akamaro intwari z’ingeri zose zakoze mu bihe bitandukanye.

Yasobanuye ko u Rwanda rwagize umugisha wo kugira intwari mu bihe bitandukanye.

Ambasaderi Rwakazina yasangije abitabiriye iki gikorwa ibice bitandukanye by’intwari u Rwanda rufite.

Intwari z’u Rwanda ziri mu byiciro bitatu ari byo Imanzi igizwe n’Umusirikare utazwi na General Major Fred Gisa Rwigema; Imena zirimo Umwami Mutara wa III Rudahigwa, Rwagasana Michel, Agathe Uwiringiyimana, Niyitegeka Félicité n’Abanyeshuri b’Inyange. Icyiciro cya gatatu n’Ingenzi ariko nta ntwari n’imwe irashyirwamo.

Yanagarutse cyane ku butwari bw’Ingabo zahoze ari iza FPR-Inkotanyi zari ziyobowe na Paul Kagame maze zigahagarika Jenoside yakorewe Abatutsi ndetse zikabohora u Rwanda.

Yibukije ko n’ubwo ingabo za FPR zari zifite ubushobozi buke ugereranyije n’umwanzi bahanganaga, bitanze batizigamye maze inzozi zabo bazigeraho zo kubaka u Rwanda rubereye bose, rutekanye, rufite amahoro, ituze n’imiyoborere myiza.

Ati “Uburyo bwiza bwo kwizihiza no kuzirikana intwari z’u Rwanda ni ukugera ikirenge mu cyazo. Ubutwari mu Banyarwanda niko Gaciro kacu.’’

Abanyarwanda basabwe kugira ubudasa mu byo bakora byose no mu myitwarire yabo, baharanira ibikorwa by’ubutwari.

Urubyiruko by’umwihariko rwabwiwe ko guha umuco warwo agaciro ari ingenzi ku hazaza harwo n’ah’igihugu cyarwibarutse.

Ambasaderi Rwakazina ati “Ni ngombwa gusigasira ibyagezweho no kubiteza imbere, guhanga ibishya bigamije iterambere n’imibereho y’Abanyarwanda, gukora cyane ndetse no gukora umurimo unoze. Ni byiza gushyigikira ubumwe n’ubufatanye bw’Abanyarwanda na gahunda zijyanye n’iterambere ry’igihugu.’’

Umunsi Mukuru w’Intwari wari witabiriwe n’abantu bagera kuri 300 baturutse mu mpande zitandukanye z’u Busuwisi. Byasojwe ababyitabiriye basangira banasabana.

Ambasaderi w’u Rwanda mu Busuwisi, Rwakazina Marie Chantal, yasobanuye agaciro k'Umunsi w’Intwari ufite amateka akomeye ku Banyarwanda
Abanyarwanda batuye mu Busuwisi bifatanyije n'inshuti zabo mu kwizihiza Umunsi w’Intwari
Ibi birori byitabiriwe n'abantu b'ingeri zitandukanye bagera kuri 300
Intore zaserutse mu mbyino igaragaza umuco Nyarwanda
Abitabiriye ibi birori bacinye akadiho
Berekanye ubuhanga mu kubyina bya Kinyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza