Umuganda ni kimwe mu bikorwa by’ubudasa bw’u Rwanda rwagezeho gihuriza hamwe abaturage buri wa Gatandatu wa nyuma w’ukwezi, cyashyizweho n’itegeko No 53/2007 ryo ku wa 17/11/2007 ryavuguruwe kugeza ubu. Ukorwa hagamijwe guteza imbere ibikorwa by’amajyambere n’isuku, kunganira ingengo y’imari mu bijyanye no gusana ibikorwaremezo no gutuma abantu basabana.

Muri Norvège basanzwe bakora igikorwa cy’umuganda bifatanyije n’Abanyarwanda mu rwego rwo kubaganiriza ku kurengera ibidukikije n’uburyo u Rwanda rwabashije kugera kuri gahunda yo guca pulasitike.

Iki gikorwa kandi cyakurikiwe n’igitaramo cyitabiriwe na Massamba Intore na Bruce Melodie cyateguwe mu rwego rwo gushyigikira umushinga wo gutunganya no kubika indirimbo Nyarwanda hakoreshejwe ikoranabuhanga.

Ambasaderi w’u Rwanda muri Norvège, Dr Gashumba Diane, yavuze ko bifuje gukora iki gikorwa cy’umuganda kugira ngo baganirize bagenzi babo uburyo bwo kubungabunga ibidukikije.

Ati “Abanyarwanda batuye muri Norvège bafatanyije n’inshuti zabo bateguye igikorwa cy’umuganda, tukimenyereye mu gihugu cyacu ariko na hano ni ikintu duhuriyeho.”

“Twateguye umuganda wo gusukura ahantu tugiye gukorera mu kanya ariko tuganira ku buryo bwo kubungabunga ibidukikije na gahunda igihugu cyihaye yo kugabanya imyuka ihumanya ikirere. Bifuje ko tubabwira uburyo twageze ku gikorwa cyo gukumira pulasitike nk’igihugu twabashije kubigeraho nabo barifuza kubigeraho.”

Yakomeje avuga ko bifuje no gusangira ikawa y’u Rwanda kugira ngo babashe kuyimenyekanisha.

Ati “Ikindi gikorwa cyiza gukurikiraho ni ugusangira ikawa y’u Rwanda, hari ikigo gikorera aha ngaha cyitwa ‘Love bag’ gicuruza ikawa y’u Rwanda niyo mu bindi bihugu nabo rero bifuje kugira ngo batubwire ibyiza by’ikawa yacu tunayisongoreho nabo muri Norvège bayimenye.”

Uhagarariye Umuryango w’Abanyarwanda batuye muri Norvège, Mugisha Peter, yavuze ko iki gikorwa ari icyo kwishimira kuko cyahurije hamwe Abanyarwanda n’inshuti zabo.

Ati “Iki gikorwa twacyakiriye neza rwose kubona abantu bavuye mu bihugu byo mu Majyaruguru y’u Burayi na ambasaderi wacu nawe ari hano, turi kumwe n’inshuti z’u Rwanda tugiye gukora igikorwa cy’umuganda.”

Uwitabiriye ibi bikorwa wese yahawe ikawa y’u Rwanda mu rwego rwo kurushaho kuyimenyekanisha.

Uyu muco wo gukora Umuganda, Abanyarwanda biyemeje gukomeza kuwusakaza muri Norvège

Uretse umuganda, ni umwanya wo gusabana ku Banyarwanda n'inshuti z'u Rwanda

Benshi bari bambaye imyambaro igaragaza u Rwanda nk'ahantu heza ho gusura

Ambasaderi w’u Rwanda muri Norvège, Dr Gashumba Diane, yitabiriye uyu muganda rusange

Muri ibi bikorwa habayeho kumenyekanisha u Rwanda binyuze mu mpano zatanzwe

Bakoze umuganda ahantu hagombaga kubera igitaramo

Bruce Melody na Ambasaderi Dr Gashumba mu bitabiriye umuganda

Abitabiriye uyu muganda barimo abanyamahanga bafite akanyamuneza

Uyu muganda witabiriwe n'abantu b'ingeri zose

Abanyarwanda n'inshuti zabo bahuriye mu muganda rusange muri Norvège

Abanyarwanda baserutse mu mwambaro wa Visit Rwanda

Gukora umuganda ni igikorwa gisanzwe mu muco nyarwanda

Abanyamahanga nabo baje kwifatanya n'Abanyarwanda

Muri ibi bikorwa habayeho kumenyekanisha u Rwanda binyuze mu mpano zatanzwe

Umunyamakuru wa IGIHE, Karirima Ngarambe Aimable, mu bitabiriye umuganda

Uyu muganda witabiriwe n'abantu b'ingeri zose

Nyuma y'Umuganda Rusange, abawitabiriye bafashe ifoto y'urwibutso