00:00:00 IGIHE NETWORK KN KINYARWANDA EN ENGLISH FR FRANCAIS

Abanyarwanda baba North Dakota, Atlanta na Iowa beretswe ibyiza byo kuvuga amateka yabo

Yanditswe na IGIHE
Kuya 10 May 2022 saa 10:34
Yasuwe :

Abanyarwanda n’inshuti z’u Rwanda baba muri Leta za North Dakota, Atlanta na Iowa muri zunze ubumwe za Amerika bibutse ku nshuro ya 28 Jenoside yakorewe Abatutsi mu 1994.

Ni ibikorwa byabereye muri izi Leta uko ari eshatu mu bihe bitandukanye kuri uyu wa Gatandatu tariki 7 Gicurasi 2022.

Ubutumwa bwatanzwe bwibanze ku kamaro ku mateka ya Jenoside yakorewe abatutsi, akamaro ko kwibuka,gusura inzibutso, intambwe zatewe na leta y’u Rwanda mu kwimakaza ubumwe n’ubwiyunge , ndetse no kohereza mu Rwanda abakurikiranyweho ibyaha bifitanye isano na Jenoside yakorewe abatutsi ndetse no kwifashisha imbugankoranyambaga mu guhangana n’abapfobya.

Prof. Drew Kahn, umwarimu muri Kaminuza muri Amerika wigisha uburyo kubara inkuru bigira ingaruka ku buzima bw’umuntu, yatanze ikiganiro agaragaza akamaro ko kuvuga no kwigisha amateka y’u Rwanda.

Yifashishije amwe mu magambo y’imbwirwaruhame ya Perezida Paul Kagame mu gutangiza icyunamo aho yagize ati “ Nitwe tugomba kwihitiramo , ntitugomba guhitirwamo n’undi muntu uwo ari we wese icyo tugomba kuba cyo n’uburyo tugomba kubaho”.

Prof. Drew Kahn yavuze ko abanyarwanda aribo bagomba kuvuga inkuru yabo bakavuga amateka ya Jenoside yakorewe abatutsi , avuga ko abanyarwanda nibatabikora bizakorwa n’abandi kandi bakabikora nabi.

Yagize ati “Ndi umunyamerika ufite inkomoko mu Bayahudi hashize imyaka ibihumbi bitatu abantu bavuga amateka y’abayahudi uko atari. Ngomba rero guhaguruka nkavuga nti dore inkuru yacu uko iri, nkuko abanyarwanda babikoze.”

Umujyanama wa kabiri muri Ambasade y’u Rwanda i Washington wari uhagarariye Ambasaderi muri iki gikorwa cyabereye North Dakota, Charles Ntageruka, yasabye urubyiruko gufata iya mbere mu kurwanya abapfobya cyangwa bagahakana Jenoside yakorewe abatutsi.

Yagize ati “Urubyiruko nirwo bayobozi b’ejo hazaza b’iyi si, mugomba gufata iya mbere muri uru rugamba. Mukoreshe imbuga nkoranyambaga murinde igihugu cyanyu umuntu wese washaka kugoreka amateka [...] ikindi mukomeze gusigasira iterambere igihugu cyanyu cyagezeho.”

Muri Leta ya Iowa, Dr. Jean Kayitsinga umwarimu muri Kaminuza ya Michigan State University, ni umwe mu batanze ikiganiro ku mateka ya Jenoside yakorewe abatutsi.

Yagaragaje uruhare rwa leta ya Gregoire Kayibanda na Juvenal Habyarimana mu gushyiraho ingengabitekerezo yo kwanga abatutsi.

Yavuze ko ubuyobozi bwiza ari igisubizo mu kubaka igihugu. Ati “Dukeneye ubuyobozi bwiza nk’ubwo dufite mu Rwanda uyu munsi buyobowe na Perezida Paul Kagame bwita ku bibabo by’abantu bose”.

Hanagaragajwe kandi uburyo ihungabana rituruka kuri Jenoside rishobora kuba uruhererekane mu muryango bityo ari ngombwa kuba hafi no gufasha abacitse ku icumu rya Jenoside yakorewe abatutsi.

Hanatanzwe ubuhamya bw’abarokotse Jenoside yakorewe abatutsi burimo ubwa Nishimwe Consolée Jenoside yabaye afite imyaka 14.

Yagaragaje inzira y’umusaraba yanyuzemo ari umwana muto ari nayo yatumye yandika igitabo ‘Tested to the Limit: A Genocide Survivor’s Story of Pain, Resilience and Hope’ gikubiyemo ubuhamya bwe.

Nishimwe yashimangiye ko nyuma y’ibyo yanyuzemo byose yanze guheranwa n’agahinda, ahubwo agerageza kwigirira icyizere.

Abanyarwanda n’inshuti z’u Rwanda muri Atlanta nabo mu gikorwa cyo kwibuka Jenoside yakorewe abatutsi cyabahurije hamwe kuri uyu wa Gatandatu bibukijwe gukomeza kugaragaza ukuri ku mateka y’u Rwanda by’umwihariko ku ya Jenoside yakorewe abatutsi mu 1994.

Karenzi David uyobora abanyarwanda baba Atlanta yagize ati “Ni inshingano zacu gukomeza gushyira imbere ukuri n’ubutabera tukavuguruza ibinyoma.”

Lt. Col Raoul Bazatoha ushinzwe ibikorwa bya gisirikare muri Ambasade y’u Rwanda i Washington , yashimiye abanyarwanda n’inshuti z’u Rwanda muri Atlanta kuri iki gikorwa cyo Kwibuka bateguye.

Yashimiye by’umwihariko abacitse ku icumu rya Jenoside yakorewe abatutsi kwihangana bagize bagaharanira iterambere ry’igihugu.

Ati “U Rwanda rwariyubatse ndetse abacitse ku icumu bagize uruhare rukomeye mu iterambere. Benshi bagaragaje kwihangana, bongera kubaka ubuzima bwabo."

David Karenzi uhagarariye abanyarwanda baba Atlanta atanga ikiganiro
Abanyarwanda n'inshuti z'u Rwanda muri North Dakota bakurikiranye ibiganiro
Urubyiruko ruri mu bakanguriwe kumenya neza amateka y'u Rwanda
Abanyarwanda batuye muri North Dakota bifatanyije kwibuka ku nshuro ya 28 Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .