Abanyarwanda baba muri Singapore bibutse ku nshuro ya 27 Jenoside yakorewe Abatutsi mu 1994

Yanditswe na Dufitumukiza Salathiel
Kuya 7 Mata 2021 saa 01:40
Yasuwe :
0 0

Ambasade y’u Rwanda muri Singapore, Australie,Nouvelle-Zélande, na Indonésie yateguye umuhango wo kwibuka ku nshuro ya 27 inzirakarengane zazize Jenoside yakorewe Abatutsi mu 1994, umuhango wabaye kuri uyu wa 7 Mata 2021, mu gutangiza iminsi 100 yo kwibuka abarenga miliyoni bavukijwe ubuzima bazira uko bavutse.

Ni umuhango wabaye hifashishijwe ikoranabuhanga hirindwa icyorezo cya COVID-19, witabirwa n’abayobozi ba Ambasade, Abanyarwanda baba muri ibyo bihugu n’inshuri z’u Rwanda.

Hafashwe umunota wo guha icyubahiro inzirakarekane zazize Jenoside yakorewe Abatutsi, hacanwa urumuri rw’icyizere nk’ikimenyetso cy’ahazaza heza;hanerekanwa filime mbarankuru ngufi igaragaza uko Jenoside yakorewe Abatutsi yabaye yarateguwe.

Ambasaderi w’u Rwanda muri Singapore Uwihanganye Jean de Dieu, yihanganishije abarokotse Jenoside yakorewe Abatutsi mu 1994, avuga ko imbaraga n’umurava byabo n’inzira y’ubwiyunge no kubabarirana “byomoye ibikomere binagira uruhare mu rugendo rwo kongera kubaka u Rwanda.”

Yibukije ko mu bihe byo kwibuka ari bwo abakwirakwiza amakuru y’ibinyoma, abapfobya n’abahakana Jenoside yakorewe Abatutsi biyongera, ahamagarira abitabiriye uwo muhango gushikama bagahangana nabo.

Yakomeje ati “Ibihe byo kwibuka ni amahirwe yo kwibutsa Isi ko gushyira hamwe kw’ibihugu byose ari yo nzira yonyine izageza imbere y’ubutabera abakekwaho uruhare muri Jenoside[yakorewe Abatutsi mu 1994]; bacyihishahisha hirya no hino mu bihugu bitandukanye. [Ibyo] bizatuma abagizweho ingaruka nayo babona ubutabera, ndetse birinde kuba hari ahandi hazaba Jenoside mu Isi.”

Ni ku nshuro ya Kabiri u Rwanda rwinjira mu minsi 100 yo kwibuka Jenoside yakorewe Abatutsi mu 1994 Isi igihanganye n’icyorezo cya Coronavirus aho ibikorwa byinshi byo kwibuka bizakorwa hifashishijwe ikoranabuhanga.

Mu Rwanda, uwo muhango watangirijwe ku Rwibutso rwa Jenoside rwa Kigali ruri ku Gisozi, aho Perezida wa Repubulika Paul Kagame yacanye urumuri rw’icyizere. Witabiriwe n’abantu bake, abandi Banyarwanda bari mu Gihugu no hanze bawukurikiranira mu ngo zabo biciye ku itangazamakuru no ku ikoranabuhanga ritandukanye.

Ambasaderi Uwihanganye Jean de Dieu yihanganishije abarokotse Jenoside, ababwira ko imbaraga n’umurava byabo n’inzira y’ubwiyunge no kubabarira byagize uruhare mu rugendo rwo kongera kubaka u Rwanda
Abanyarwanda n'inshuti z'u Rwanda batuye muri Singapore, Australie,Nouvelle-Zélande, na Indonésie bunamiye inzirakarengane zazize Jenoside yakorewe Abatutsi mu 1994, hifashishijwe ikoranabuhanga
Hacanywe urumuri rw'icyizere mu kwerekana icyerecyezo cy'u Rwanda rushya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .