Abanyarwanda baba muri Canada bizihije Umunsi wo #Kwibohora26

Yanditswe na Karirima A. Ngarambe
Kuya 15 Nyakanga 2020 saa 11:56
Yasuwe :
0 0

Abanyarwanda batuye muri Canada bahuriye mu gikorwa cyo kwizihiza Umunsi wo Kwibohora baganirizwa ku rugendo rw’imyaka 26 igihugu kimaze kivanywe mu maboko y’ubutegetsi bubi.

Uyu muhango wabaye ku wa 12 Nyakanga 2020, wabaye hifashishijwe ikoranabuhanga kubera icyorezo cya Coronavirus. Abawitabiriye bawukurikiye bifashishije imbuga nkoranyambaga za YouTube na Facebook.

Mugabo Clémence wawuyoboye yavuze ko nubwo Isi yugarijwe n’icyorezo cya COVID-19 ariko bikwiye ko hizihizwa umunsi ukomeye mu mateka u Rwanda rwaciyemo ahibukwa ihagarikwa rya Jenoside yakorerwaga Abatutsi n’igikorwa cyo kubohora u Rwanda.

Abanyarwanda bitabiriye uyu muhango baganirijwe ku gisobanuro cyo kwibohora nuko byabyazwa umusaruro.

Yakomeje ati “Batwereka ko u Rwanda dufite ubu atari rwa Rwanda twari dufite yemwe no mu bihe biri imbere ruzagenda rutera imbere. Tubikesha cyane kandi ubwitange bw’ingabo zabiharaniye ndetse n’ubuyobozi bwiza buyobowe na Perezida Paul Kagame.’’

Yavuze ko nk’urubyiruko bashimira by’umwihariko ingabo za RPF Inkotanyi zagize ubwitange mu kubohora igihugu.

Ibikorwa byo kwibohora muri uyu mwaka byahawe insanganyamatsiko igira iti “Twibohore kandi twubaka u Rwanda twifuza.’’

Mu batanze ibiganiro muri uyu muhango harimo Amb Denis Polisi umwe mu bagize Urwego Ngishwanama rw’Inararibonye waganirije urubyiruko amateka y’urugamba rwo kwibohora n’uruhare rw’umuturage mu kubaka u Rwanda rushya; Umunyamabanga wa Leta muri Minisiteri y’Umuco n’Urubyiruko, Bamporiki Edouard, waganirije urubyiruko uruhare rufite mu gukomeza kubaka u Rwanda rwifuza ndetse n’Umuyobozi w’Umuryango Nyarwanda muri Canada, Mutezintare Joachim.

Batanze ibiganiro mu buryo bwimbitse banagira umwanya wo gusubiza ibibazo babajijwe ku nsanganyamatsiko zijyanye n’ibyo bavuzeho.

Ambasaderi w’u Rwanda muri Canada, Higiro Prosper, yashimangiye ko ibiganiro byatanzwe byerekanye ishusho y’intambwe yatewe mu myaka 26 n’ahagikeneye kunozwa.

Yashimiye Abanyarwanda batuye muri Canada uruhare bakomeje kugira mu bufatanye bukomeza kwerekana ko hariho kubaka igihugu hamwe no gutekereza icyakomeza kukigirira akamaro.

Yanashimiye umuhanzi Jean Paul Samputu mu ndirimbo zerekana amateka y’urugamba rwo kubohora igihugu.

Yagize ati “Muri Canada hatuye Abanyarwanda benshi, birashimishije kuba mwaragize uruhare mu gihe cy’urugamba ndetse na nyuma, aho mubikora muciye mu mashyirahamwe atandukanye.’’

“Ndibutsa ko mu kwa karindwi 1994 u Rwanda rwari mu icuraburindi, rumaze gutakaza Abanyarwanda barenga miliyoni, bazira uko bavutse, murabyibuka abari bahari, mujya mubibwirwa namwe rubyiruko mwari mukiri bato cyangwa mutaranavuka. Ibiranga ubuyobozi byose nta cyari gihari byabaye gutangira bundi bushya, habaye ah’abagabo. Ingabo za FPR Inkotanyi zaturemyemo icyizere muri ibyo bibazo byose by’inzitane twikuramo imbaraga arizo zubatse u Rwanda rw’uyu munsi.’’

Ambasaderi Higiro yavuze ko habayeho gufata ingamba zitandukanye zo kugira ngo igihugu kive mu icuraburindi.

Ati “Habayeho kureba amateka yaranze imiyoborere mibi yari mu Rwanda yari imaze igihe kirenga imyaka 30, harimo kwikubira, guheza abantu mu bikorwa by’igihugu bitandukanye, guheza Abanyarwanda mu buhunzi n’ibindi, politiki y’icyenewabo, iringaniza, umuco wo kudahana…’’

Yagaragaje agaragaza ko akarengane kari mu gihugu katumye abana b’Abanyarwanda biyemeza gutangiza urugamba rwo kubohora u Rwanda n’Abanyarwanda.

Ati “Nyuma y’iyi myaka 26 hari byinshi byakozwe mu gukosora ayo makosa n’ibibazo. Nanavuga ko n’abatari Abanyarwanda babibona kuko birivugira. Icyiza ni uko binari mu nzego zose.’’

Ambasaderi Higiro yagaragaje ko kwizihiza isabukuru yo kwibohora ku nshuro ya 26 bikwiye kujyana no kuzirikana ko hari ibyagezweho mu cyerekezo 2020.

Ati “Izataragezweho nizo nke, turizera ko mu cyerekezo cya 2035/2050 nabyo bizagerwaho mu guteza imbere igihugu cyacu n’Abanyarwanda bose muri rusange. Ikindi umuntu yavuga mu myaka 26 ni agaciro kahawe Umunyarwanda, imigambi yose, ibikorwa byose bishingira ku Munyarwanda mbere ya byose.’’

Mu butumwa bwe yikije cyane ku kurwanya amacakubiri, ingengabitekerezo ya Jenoside, guharanira kudasubira mu bihe bibi igihugu cyanyuzemo no guteza imbere imibereho myiza y’abagituye.

Abitabiriye uyu muhango bashimye Leta y’u Rwanda, yahaye abaturage icyizere igashyira imbere ibibereye Umunyarwanda, akabasha kwisanga mu gihugu cye no mu mahanga binyuze mu kubaka ubucuti n’abandi.

Ubu u Rwanda ni igihugu gihagarariwe neza mu bihugu 38 mu mahanga ndetse gifite ijambo kuri urwo ruhando mu gihe mbere ya 94 kitarenzaga ibihugu 10 cyangwa 12.

Yagaragaje ko u Rwanda na Canada bifitanye umubano mwiza nyuma y‘ibiganiro bitandukanye byabaye mu bihe bishize hagati y‘inzego nkuru z‘ibihugu byombi, bikaba aribyo kwishimira.

Ambasaderi w’u Rwanda muri Canada, Higiro Prosper, yashimye abitabiriye ibiganiro n'uruhare rwabo mu kubaka igihugu
Mugabo Clémence ni we wayoboye umuhango wo #Kwibohora26
Umuyobozi w’Umuryango Nyarwanda muri Canada, Mutezintare Joachim, yavuze ku mateka y’uko y'uyu muryango n’uko ugendana na gahunda zo kubaka igihugu
Umunyamabanga wa Leta muri Minisiteri y’Umuco n’Urubyiruko, Bamporiki Edouard, yaganirije urubyiruko uruhare rufite mu gukomeza kubaka u Rwanda
Amb Denis Polisi uri mu bagize Urwego Ngishwanama rw’Inararibonye yaganirije urubyiruko amateka y’urugamba rwo kwibohora n’uruhare rw’umuturage mu kubaka u Rwanda rushya
umuhanzi Jean Paul Samputu azwi no mu ndirimbo zerekana amateka y’urugamba rwo kubohora igihugu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .