Abakoze Jenoside aho bari hose ntibazagira amahoro kuko icyo cyaha kidasaza- Amb Nkulikiyinka

Yanditswe na Karirima A. Ngarambe
Kuya 20 Mata 2021 saa 10:03
Yasuwe :
0 0

Ku wa 17 Mata 2021, Ambasade y’u Rwanda ifite icyicaro muri Suéde, inahagarariye u Rwanda mu bihugu biherereye mu majyaruguru y’u Burayi yifatanyije n’Abanyarwanda batuye muri Denmark kwibuka ku nshuro ya 27 Jenoside yakorewe Abatutsi mu 1994.

Uyu muhango wari watumiwemo abayobozi barimo Ladislas Ngendahimana, Umunyamabanga Mukuru w’Ishyirahamwe ry’Uturere n’Umujyi wa Kigali (RALGA) watanze ikiganiro gifite insanganyamatsiko igira iti ‘Dusobanukirwe kandi turwanye ihakana rya jenoside yakorewe Abatutsi n’ingengabitekerezo yayo’.

Judence Kayitesi wanditse igitabo yise “A Broken Life” yatanze ubuhamya bw’uburyo yarokotse. Yagarutse ku bihe bikomeye yanyuzemo mu gihe cya Jenoside yakorewe Abatutsi. Icyo gihe yari akiri umwana muto wimyaka 11.

Ambasaderi Christine Nkulikiyinka uhagarariye u Rwanda muri Denmark ndetse no mu bindi bihugu nka Norvège, Finland afite icyicaro muri Suède yashimiye itsinda ryateguye ibikorwa byo kwibuka jenoside yakorewe Abatutsi mu Rwanda.

Ati “Ni ikimenyetso gikomeye cyo kwereka abana ko aya mateka yabayeho atagomba kwibagirana na rimwe. Ndabashimira ko mwitabiriye muri benshi.”

Yakomeje agira ati “Murabizi ko muri Jenoside yakorewe Abatutsi muri 1994, hishwe abantu barenga miliyoni. Muri iyi minsi 100 yo kwibuka, turabibuka. Turabibuka kuko bari abacu, bari ababyeyi, abavandimwe, inshuti. Bari bafite uwo babereye nyirakuru cyangwa Sekuru, uwo bari babereye umwana cyangwa nyirasenge, nyirarume, nyina wabo, cyangwa Se wabo. Iyo tubibuka, twibuka buri muntu kuko ari ikiremwa Imana yiremeye.”

Amb Nkulikiyinka yavuze ko aba bose nta n’umwe utari ufite izina kandi buri wese afite ibyo yakoze yibukirwaho.

Ati “Ariko kubera ubugome ndengakamere, barishwe kandi nta kindi bazize. Abantu barenga miliyoni bishwe bazize ko bavutse ari Abatutsi. Turabibuka, tukabaha icyubahiro n’agaciro bakwiye bambuwe. Twibuka cyane ndetse n’imiryango yazimye kuko irazwi.”

Yabwiye abitabiriye ibikorwa byo kwibuka ko bakwiye guharanira ko Jenoside itazasubira ukundi.

Yavuze kandi ko bagomba guhora bari menge barwanya abapfobya cyangwa bagahakana Jenoside yakorewe Abatutsi ndetse n’abagifite ingengabitekerezo yayo.

Ati “Nkuko bizwi mu gihe bakoraga ayo mahano, bageragezaga guhisha cyangwa gusibanganya ibimenyetso ariko ntibyashoboka. Ntibinashoboka rwose.”

Muri iyi minsi abahakana n’abapfobya Jenoside yakorewe Abatutsi bongeye kwigaragaza cyane. Ibintu Amb Nkulikiyinka aheraho atanga umukoro ku Banyarwanda wo guhangana n’aba bantu.

Yavuze ko ibikorwa byo kwibuka nabyo bifasha kurwanya abagifite iyo ingenbagitekerezo ya Jenoside n’abayihakana.

Yakomeje avuga ko icyaha cya Jenoside ari icyaha kidasaza ari nayo mpamvu n’ubwo hari benshi bagize uruhare muri Jenoside bakidegembya igihe kizagera bakaryozwa ibyo bakoze.

Ati “Icyaha cya jenoside ntigisaza, ni ukuvuga ngo na nyuma y’imyaka 50 cyangwa irenga, aho ubutabera bugushyikiriye, urabibazwa, aho bari hose, ntibazagira amahoro kuko icyaha cyabo kidasaza.”

Ladislas ngendahimana, Umunyamabanga mukuru w’ishyirahamwe ry’uturere n’umujyi wa Kigali yagarutse ku ntangiriro y’ingengabitekerezo ya Jenoside yakorewe Abatutsi, uko ingengabitekerezo ya jenoside yakwirakwijwe, uko jenoside yakorewe abatutsi yashyizwe mu bikorwa n’uko guhakana jenoside biteye.

Yavuze ku ishingwa ry’ishyaka Parmehutu ryari rishingiye ku ngengabitekerezo yo kwanga Abatutsi ari nayo yashamikiyeho andi mashyaka yavutse nyuma nka APROSOMA, MDR, MRND, CDR n’andi. Urwo rwango yavuze ko ari rwo rwazamutse rukageza kuri Jenoside yakorewe Abatutsi. Mu ntangiriro, Ababiligi nibo bashyigikiye cyane ayo mashyaka n’abategetsi bakwirakwizaga urwango.

Ngendahimana kandi yavuze ku binyamakuru byavutse ahagana mu 1989, bigamije gukwirakwiza urwango mu bahutu, bibasaba kwikiza abatutsi birimo Kangura, RTLM n’ibindi bikorwa by’ubugizi bwa nabi byakorerwaga abatutsi mu mugambi wo gutegura Jenoside.

Yavuze ko no mu butegetsi bwari bushyize imbere kwikiza abatutsi, aho ababaga bishe cyangwa bicishije abatutsi benshi aribo bashimwaga.

Yagarutse ku bantu bakomeje gupfobya Jenoside yakorewe Abatutsi, cyane cyane bakomoka ku babyeyi basize bakoze Jenoside cyangwa abayigizemo uruhare mu buryo buziguye.

Ati “Twabonye ko jenoside ari ingengabitekerezo mbere na mbere. Abantu nk’abo muri Jambo ASBL kubita abajenosideri si ukubeshya kuko bayobotse ingengabitekerezo ya Jenoside bagamije kuyikomeza no kuyitoza abandi. Kuba bataragize uruhare muri jenoside yakorewe abatutsi ntibibuza ko baba abajenosideri, kuko n’abitwa abakirisitu si uko babanye na Yezu Kristu, ahubwo ni uko bayobotse imibereho, imitekerereze n’imikorere bye mu gihe yariho.”

Yagarutse ku banyamahanga bifatanya n’abahakana cyangwa bagapfobya Jenoside barimo nka Judi Rever, Peter Verlinden, Filip Reyntjens n’abandi.

Ngendahimana yavuze ko bene abo bahora mu mpaka zidafite ishingiro haba ku nyito cyangwa imibare y’abazize Jenoside.

Ati “Jenoside yakorewe Abatutsi ntabwo ari imibare, ni umugambi wateguwe igihe kirekire, ushyirwa mu bikorwa na Leta zanyuranye kuva ku bakoloni b’Ababiligi muri 1959, ababafashije nk’abayobozi ba Kiliziya Gatolika n’abahutu bari abanyapolitiki icyo gihe.”

Yavuze ko uburyo bwiza bwo guhashya abo bahakana, abapfobya Jenoside n’ababashyigikiye ari ugukomeza kwibuka kugira ngo ayo mateka atibagirana ndetse no kugaragaza ukuri kw’ayo mateka nta gucika intege.

Yavuze ko ari ngombwa kandi guharanira ko abajenosideri bakurikiranwa, “badatuza, batagira amahoro, tukirinda ko biharira urubuga rwo gupfobya no guhakana jenoside yakorewe abatutsi”.

Ngendahimana yavuze ko ubundi buryo ari uguharanira ko hashyirwaho amategeko ahana abahakana Jenoside yakorewe abatutsi kandi agashyirwa mu bikorwa no kwandika cyane, kuko amateka atanditse asibangana.

Ambasaderi Christine Nkulikiyinka uhagarariye u Rwanda muri Denmark ndetse no mu bindi bihugu nka Norvège, Finland yavuze ko nta mahoro abakoze Jenoside yakorewe Abatutsi bazagira igihe cyose bataragezwa mu butabera ngo bishyure ibyo bakoze
Ladislas Ngendahimana yavuze ko uburyo bwiza bwo guhashya abo bahakana, abapfobya Jenoside n’ababashyigikiye ari ugukomeza kwibuka kugira ngo ayo mateka atibagirana ndetse no kugaragaza ukuri kw’ayo mateka nta gucika intege.
Judence Kayitesi wanditse igitabo yise “ A Broken Life” yatanze ubuhamya bw'uburyo yarokotse Jenoside afite imyaka 11
Abanyarwanda batandukanye bo mu bihugu bya Denmark, Norvège, Finland bifatanyije mu muhango wo kwibuka ku nshuro ya 27 Jenoside yakorewe Abatutsi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .