Oya si ibyo gucecekwa- Ubuhamya bw’inkuru yo kurokoka kwa Mukayiranga Adorata

Yanditswe na Karirima A. Ngarambe
Kuya 16 Kamena 2020 saa 09:53
Yasuwe :
0 0

Buri mwaka abarokotse Jenoside yakorewe Abatutsi mu 1994 bibuka amezi atatu biciwe ababyeyi, abavandimwe, inshuti, abo bakoranaga cyangwa biganaga. Ni umwanya biha byimbitse wo gusigasira aya mateka adasanzwe nubwo kwibuka ari ubuzima bwabo bwa buri munsi.

Kuri ubu Abanyarwanda n’inshuti zabo baracyari mu minsi ijana yo kwibuka Jenoside yakorewe Abatutsi, yahitanye ubuzima bw’inzirakarengane zirenga miliyoni mu minsi 100.

Mu banyuze mu bihe bikomeye, bahigwa amanywa n’ijoro harimo Mukayiranga Adorata utuye mu Bubiligi. Uyu mubyeyi avuka i Rukumberi, agace kiciwemo benshi bo mu muryango we muri Jenoside yakorewe Abatutsi.

Mu kiganiro na IGIHE, yagarutse ku buhamya bwe n’abo bari kumwe kwa Se wabo mu 1994 i Kigali hafi yaho bita kuri Plateaux hafi y’ahahoze Radio Rwanda na Hotel Isimbi.

Mukayiranga muri filime mbarankuru yiswe ‘‘Oya sibyo gucecekwa’’ yavuze uko hiciwe abantu 11 bo mu miryango yari yahahungiye bizeye kurindwa n’Ingabo za Loni zari zihakambitse. Baje gutungurwa no kubona zizinze ibyazo byose zikigendera hacika icyuho; icyo gihe Interahamwe n’abasirikare barindaga kuri Radio n’ahandi hafi aho hose bagize urwo rugo akarima kabo bategeka icyo bashatse, bashinyagurira, bacira mu maso, batuka uko bashatse abari bahihishe.

Abasirikare b’Ababiligi bari muri Minuar bavuye muri ako gace tariki ya 11 Mata 1994. Tariki 16 Gicurasi 1994 ni wo munsi hiciweho Madamu Ngirumpatse, Kayirangwa Florence, Munyaneza Athanase, Rushemeza Charlotte, Rushemeza Alice, Rushemeza Solange, Rushemeza Ange, Primitive, Rubangura Roger, Rubangura Colombe, Rubangura Alice na Gahima Patrick (Fiston).

Mu bantu 12, Mukayiranga Adorata ni we warokotse wenyine ndetse no mu muryango avukamo kwa se na nyina wari utuye Rukumberi naho yisanze ariwe wasigaye gusa.

Mu buhamya bwe yerekana ko Jenoside yakorewe Abatutsi ari umugambi wacuzwe by’igihe kirekire, ndetse kuva mu 1990 bakorerwaga ihohoterwa mu ikinamico ryafunzwemo benshi hirya no hino mu magereza y’igihugu bitwa ibyitso by’Abatutsi.

Yifashishije urugero yagize ati “Rubangura yishwe mu bo bise ibyitso urugamba rw’Inkotanyi rugitangira, yari avuye i Byumba aho yigishaga. Na Madamu wa Ngirumpatse, Kayirangwa Florence na bagenzi be bafunzwe bitwa ibyitso.’’

Muri filime mbarankuru ya Mukayiranga agaragaza ibyabereye mu gace yari atuyemo birimo ibikorwa by’iyicarubozo.

Avuga ko ‘ibyahabereye birasa n’ibyaberaga mu tundi duce twa Kigali cyangwa mu gihugu hirya no hino.’’

Mukayiranga nubwo yarokokeye i Kigali avuga ku babyeyi baciriwe mu gace ka Rukumberi n’ubutegetsi bubi bwifuzaga ko Abatutsi bazicwa n’isazi ya TseTse.

Yagize ati “Ariko uko babishakaga siko byagenze kuko barahabaciriye baraza batema ishyamba, barahahinga barahubaka, Rukumberi igira imiharuro igira imigendererano igira abakobwa n’abahungu barorora baratunga, bahagira ahantu heza bivuye mu ngufu zabo.’’

Ibi ntibyabujije umwanzi kurangiza umushinga yari yaratangiye wo kubacira mu mashyamba ngo bazicwe na Tsetse, kuko muri Jenoside yawushyize mu bikorwa.

Yagize ati “Turi intumwa ntabwo tugomba kuba abasigariye ubusa, tugomba gukora twishimira ubuzima turimo, twishimira no kuba dufite igihugu, tukibuka rya jambo Inkotanyi zatubwiye ziti ‘Humura ntugipfuye’. Abantu batuvugutiye igihugu, bakigira nk’igikatsi ariko ubu kirakeye nta wutacyifuza, turashimira Inkotanyi cyane.’’

Mu butumwa bwa Mukayiranga ku buhamya ku mateka ya Jenoside yakorewe Abatutsi, agaragaza ko uwarokotse afite inshingano zikomeye ku mateka no kuyasigasira ngo abato batazagwa mu mutego.

-  Kurikira ubuhamya bwa Mukayiranga buri muri Filime Mbarankuru

Mukayiranga yavuze ko filime zitanga ubuhamya ku mateka ya Jenoside yakorewe Abatutsi ari ingenzi kuko zifasha gusigasira amateka
Mukayiranga Adorata mu kiganiro na Karirima Ngarambe wa IGIHE
Mukayiranga Adorata yavuze kuri filime mbarankuru yasohoye, yubakiye ku mateka yo kurokoka kwe
Kayirangwa Florence yishwe ku wa 16 Gicurasi, ari muri 11 bishwe icyo gihe
Madamu wa Ngirumpatse witwa Kayirangwa Florence (uwa mbere ibumoso) ari mu bafashwe bashinjwa kuba ibyitso by'Inkotanyi. Aha yari kumwe na bagenzi be
Ifoto igaragaza umuryango wa Rubangura Etienne wishwe mu byitso, akajya no kujugunywa atwawe mu ngorofani i Byumba. Abandi bose bishwe muri Jenoside yakorewe Abatutsi mu 1994, ubu ni umuryango wazimye. Uhereye ibumoso: Rubangura Remy, Rubangura Marie Colombe, Mukapasika Hilaria, Rubangura Léon, Rubangura Etienne, Rubangura Chantal, Rubangura Lambert, Mukapasika Alice na Rudasingwa Egide

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .